ଲୋଇସିଂହା,୪।୮(ସୁଶାନ୍ତ ବାରିକ): ବଲାଙ୍ଗୀର ଜିଲାରେ ଗତ ତିନିଦିନ ହେଲା ଲଘୁଚାପ ଜନିତ ବର୍ଷା ତାଣ୍ଡବ ରଚିଛି। ଲୋଇସିଂହା ବ୍ଲକରେ ଗତ ତିନିଦିନରେ ୧୬୩ ମିମି ବର୍ଷା ହୋଇଛି। ଗୁରୁବାର ପୂର୍ବାହ୍ନରୁ ବର୍ଷା ଥମିଛି। ହେଲେ ଉପରମୁଣ୍ଡାରେ ଅତ୍ୟଧିକ ବର୍ଷା ଯୋଗୁ ଲୋୟର ସୁକତେଲ ଡ୍ୟାମରେ ୨ଶହ କ୍ୟୁସେକ ପାଣି ପଶୁଛି। ଡ୍ୟାମର ପଛୁଆ ପାଣିରେ ୮ଖଣ୍ଡ ବିସ୍ଥାପିତ ଗାଁ ସମ୍ପୂର୍ଣ୍ଣ ବୁଡି ଯାଇଥିବାବେଳେ ବଡତେଲେନପାଲି ଓ ସାନତେଲେନପାଲି ଗାଁକୁ ଆଂଶିକ ପ୍ରଭାବିତ କରିଛି। ପାଣି ମାଡି ଯିବା ଭୟରେ ସେମାନେ ଆତଙ୍କିତ ଅବସ୍ଥାରେ ରହିଛନ୍ତି। ସମ୍ପୂର୍ଣ୍ଣ ବୁଡି ଯାଇଥିବା ଗାଁଗୁଡିକ ଗଡଶଙ୍କର ଡୁଙ୍ଗରିପାଲି, ବନଛୋରପାଲି, ବିଜାପାଟି, ପୋଡମୁଣ୍ଡ, କହିଣ୍ଡାପାଲି, ପରଧିଆପାଲି, ଖବସାବାହାଲ ଓ ଖୁଣ୍ଟପାଲି ବୋଲି ଜଣାପଡିଛି।
ବଲାଙ୍ଗୀର ଜିଲାର ଜୀବନରେଖା କୁହାଯାଉଥିବା ଲୋୟର ସୁକତେଲ ପ୍ରକଳ୍ପ ଡ୍ୟାମରେ ଚଳିତ ବର୍ଷ ପାଣି ଅଟକା ଯାଇଥିଲା। ଡ୍ୟାମର ପଛୁଆ ପାଣି ବିସ୍ଥାପିତ ଡୁଙ୍ଗରିପାଲି ଓ ବନଛୋରପାଲି ଗାଁକୁ ଛୁଇଁବାରୁ ଉଭୟ ଗାଁର ଲୋକେ ଆତଙ୍କିତ ହୋଇ ପଡିଥିଲେ। ଆଗକୁ ବର୍ଷା ହେଲେ ଗାଁ ବୁଡି ଯିବା ଆଶଙ୍କାରେ ଜିଲା ପ୍ରଶାସନ ପକ୍ଷରୁ ବିସ୍ଥାପିତ ଗ୍ରାମବାସୀଙ୍କୁ ସ୍ଥାନାନ୍ତରଣ କାମକୁ ଯୋରଦାର କରାଯାଇଥିଲା। ବଳପୂର୍ବକ ସ୍ଥାନାନ୍ତରକୁ ଲୋକେ ବିରୋଧ କରିଥିଲେ ହେଁ ପରିସ୍ଥିତିକୁ ଦେଖି ଗତ ଜୁଲାଇ ୨୮ତାରିଖରେ ଗ.ଡୁଙ୍ଗରିପାଲି ଗ୍ରାମବାସୀ ଜଗନ୍ନାଥ ମହାପ୍ରଭୁଙ୍କୁ ଧରି ଝାଙ୍କରପାଲିସ୍ଥିତି ଆରଆର କଲୋନୀକୁ ଯାଇଛନ୍ତି। ଏବେ ଲଘୁଚାପଜନିତ ବର୍ଷା ସାଙ୍ଗକୁ ଉପରମୁଣ୍ଡରେ ଅଧିକ ବର୍ଷା ହେବାରୁ ସୁକତେଲ ଓ ଦୟା ନଦୀରେ ପାଣି ଆସି ଲୋୟର ସୁକତେଲ ଡ୍ୟାମରେ ପଶୁଛି। ଜଗନ୍ନାଥ ମହାପ୍ରଭୁଙ୍କ ମନ୍ଦିର ବୁଡି ଯାଇ କେବଳ ଶିଖର ଦେଖା ଯାଉଛି। ଅନେକ ବିସ୍ଥାପିତଙ୍କ ଘର ପାଣିରେ ବୁଡି ରହିଛି। ଆଖି ଆଗରେ ଭିଟାମାଟି ବୁଡିଯାଉଥିବା ଦୃଶ୍ୟ ବିସ୍ଥାପିତଙ୍କ ଆଖିରେ ଲୁହ ଭରି ଦେଇଛି। ଅପରପକ୍ଷେ ପାଟଣାଗଡ ଅଞ୍ଚଳର ପୋଡମୁଣ୍ଡ ଗ୍ରାମରେ ଅବସ୍ଥିତ ମା’ କାୟାଘଟୁଆଣି ଦେବୀଙ୍କୁ ଅଦ୍ୟାବଧି ସ୍ଥାନାନ୍ତରଣ କରାଯାଇନାହିଁ।ଫଳରେ ସୁକତେଲ ନଦୀରେ ଏହି ପୀଠ ଜଳ ସମାଧି ନେବାକୁ ଯାଉଛି। ଏହା ଉପାସକ ଓ ଭକ୍ତଙ୍କୁ ଗଭୀର ଆଘାତ ଦେଇଛି।