ପାପଡ଼ାହାଣ୍ଡି, ୭ା୫ (ଡି.ଏନ୍.ଏ.) ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ବିରିଗୁଡା ଦେଇ ଯାଇଥିବା ଭାରତମାଳା ରାସ୍ତାରେ ପୋଲ ସ୍ଥାନାନ୍ତର ଯୋଗୁ ୧୦ ଏକର ଜମିରେ ପାଣି ଜମିଛି। କାଳ ବୈଶାଖୀ ବର୍ଷାରେ ବର୍ତମାନ ଜମିରେ ୮ ଫୁଟ ଉଚ୍ଚର ପାଣି ଜମି ରହିଛି। ବର୍ଷା ଦିନେ ଚାଷ ଜମିଗୁଡିକ ସମ୍ପୂର୍ଣ୍ଣ ଜଳ ମଗ୍ନ ହେବା ଆଶଙ୍କା ରହିଛି। ଯାହାକୁ ନେଇ ସ୍ଥାନୀୟ ଅଞ୍ଚଳର ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଚାଷୀମାନେ ପ୍ରସ୍ତାବିତ ସ୍ଥାନରେ ନୂଆ ପୋଲ ନିର୍ମାଣ ନ କରି ପୁରୁଣା କସମମୁଣ୍ଡା କର୍ଲଭଟ ସ୍ଥାନରେ ହିଁ ପୋଲ ତିଆରି କରିବାକୁ ଦାବି କରିଛନ୍ତି।
ସୂଚନା ମୁତାବକ କଷମମୁଣ୍ଡା କୋନାରି ନିକଟରେ ଭାରତମାଳା ଯୋଜନାରେ ନିର୍ମିତ ପୋଲ ଯୋଗୁ ୧୦ ଏକର ଚାଷ ଜମିରେ ବର୍ଷା ପାଣି ଜମି ରହିଛି। ଗତକାଲି ହୋଇଥିବା ଅଳ୍ପ ବର୍ଷାରେ ବିରିଗୁଡା ଅଞ୍ଚଳର କଷମମୁଣ୍ଡା କୋନାରୀ ନିକଟରେ ୧୦ ଏକର ଚାଷ ଜମିରେ ୮ ଫୁଟ ର ପାଣି ମାଡି ଯାଇଛି। ଏହି କଷମମୁଣ୍ଡା କୋନାରୀରେ କୁଶଗୁଡା, ପଲକାଜାମା ଦାମାପାଲା,ତିଲିଆପାଣି, ଚଚରାଗୁଡା ଅଞ୍ଚଳରୁ ବର୍ଷା ପାଣି ଆସି କଷମମୁଣ୍ଡା କୋନାରୀ ହୋଇ ମୋକିଆ ନଦୀରେ ପ୍ରବାହିତ ହୋଇଥାଏ। ପୂର୍ବରୁ ସରକାର ଦ୍ୱାରା ହୋଇଥିବା କର୍ଲଭଟ ଦେଇ ପାଣି ନିଷ୍କାସନ ହୋଇ ଯାଉଥିଲା। ବର୍ତ୍ତମାନ ଭାରତମାଳା ରାସ୍ତା ହେବା ଯୋଗୁ ଏହି ସ୍ଥାନ ଉଚ୍ଚା ହେବା ସହ ପୂର୍ବ କର୍ଲଭଟ ଭାଙ୍ଗି ଦିଆଗଲା। ବର୍ତ୍ତମାନ ପୂର୍ବ ସ୍ଥାନରେ ପୋଲ ନିର୍ମାଣ ନକରି ତାଠାରୁ ଟିକେ ଉଚ୍ଚା ସ୍ଥାନରେ ପୋଲ ତିଆରି କାମ ଆରମ୍ଭ କରାଯାଇଛି। ବର୍ଷା ପାଣି ଜମିଲେ ବିରିଗୁଡା ଓ ଚଚରାଗୁଡା ପ୍ରଧାନମନ୍ତ୍ରୀ ରାସ୍ତା ମଧ୍ୟ ଖରାପ ହେବା ଆଶଙ୍କା ରହିଛି। ଯଦି ବର୍ଷା ପାଣି ନିଷ୍କାସନ ନ ହୁଏ ତେବେ ଚଚରାଗୁଡା ଗାଁରେ ମଧ୍ୟ ପାଣି ପଶିବା ଆଶଙ୍କା ରହିଛି। ପୂର୍ବ କର୍ଲଭଟ ସ୍ଥାନରେ ନୂତନ ପୋଲ ହେଲେ ଚାଷୀ ଉପକୃତ ହେବେ। ନଚେତ ଫସଲ ନଷ୍ଟ ହେବା ଆଶଙ୍କା ରହିଛି ବୋଲି ଗ୍ରାମର ଗୋପୀନାଥ ଗୌଡ଼, ପର୍ଶୁରାମ ଗୌଡ଼, ଗୋବର୍ଦ୍ଧନ ଗୌଡ଼, ମନୋହର ଗୌଡ଼, ଅନନ୍ତରାମ ଗୌଡ଼, ଚକ୍ର ବିଷୋୟୀ, ନର ବିଷୋୟୀ, କମଳ ବିଷୋୟୀ, ଅର୍ଜୁନ ବିଷୋୟୀ, ନରସିଂହ ଗୌଡ଼, ଭୁବନ ଗୌଡ଼, ଦେବରାଜ ଭତରା, ଲକି ଗୌଡ଼, ଡ଼ମ୍ବରୁ ବିଷୋୟୀ, ଘନ ବିଷୋୟୀ, ଜୟରାମ ବିଷୋୟୀ, ଫଗଣୁ ବିଷୋୟୀ କହିଛନ୍ତି।
