ନନ୍ଦପୁର, ୧୬ା୯ (ଶଙ୍କର ପୂଜାରୀ): ଲଘୁଚାପଜନିତ ଲଗାଣ ବର୍ଷା ପ୍ରଭାବରେ ନନ୍ଦପୁର ତହସିଲ ଅଧୀନ ଥୁବା ଓ କୁଲାରସିଂ ରାଜସ୍ବ ମଣ୍ଡଳରେ ୬ଟି ଘର ଭାଙ୍ଗିଥିବା ଜଣାପଡିଛି। ସେହିଭଳି ନନ୍ଦପୁର ଥାନା ଅନ୍ତର୍ଗତ ଲମତାପୁଟ ତହସିଲ ଅଧୀନ କୁମାରଗନ୍ଧନା ପଞ୍ଚାୟତର ଦାସପୁଟ ଗ୍ରାମରେ ଘର ପାର୍ଶ୍ୱରେ ଥିବା ଗଛ ଉପୁଡ଼ି ୨ଟି ଘର ଭାଙ୍ଗିଛି। ସମସ୍ତ କ୍ଷତିଗ୍ରସ୍ତ ପରିବାରକୁ ନନ୍ଦପୁର ଓ ଲମତାପୁଟ ତହସିଲଦାରଙ୍କ ନିର୍ଦ୍ଦେଶ ମତେ ରାଜସ୍ବ ନିରୀକ୍ଷକ ମାନେ ପଲିଥିନ ଯୋଗାଇ ଦେଇଛନ୍ତି। ନନ୍ଦପୁର ତହସିଲ ଅଧୀନ କୁଲାରସିଂ ରାଜସ୍ବ ମଣ୍ଡଳ ଗୋଲୁର ପଞ୍ଚାୟତର ଚୁଆଫୁଲ ଗ୍ରାମର ଲିଙ୍ଗୁ ହନ୍ତାଳ, ଚିରଞ୍ଜି ଖିଲ ଓ ଲଚୁ ହନ୍ତାଳ ଏବଂ ଥୁବା ରାଜସ୍ବ ମଣ୍ଡଳର ରୁଢ଼ିଚୁଆ ଗ୍ରାମର ସଦା ପାଙ୍ଗି, ଦାଣ୍ଡଗୁଡା ଗ୍ରାମର ମୁକୁନ୍ଦ ହନ୍ତାଳ ଓ ଖୁଡ଼ାଶିଙ୍ଗ ଗ୍ରାମର ଲକ୍ଷ୍ମଣ ଜାନିଙ୍କ ଘର ବର୍ଷା ଯୋଗୁ ଭାଙ୍ଗି ଥିଲା। ସେହିଭଳି ଦାସପୁଟ ଗ୍ରାମରେ ଗଛ ଉପୁଡ଼ି ମାଧବ ବଡନାୟକଙ୍କ ଘର ଓ ଘେନୁ ବଡନାୟକଙ୍କ ଗୁହାଳ ଉପରେ ପଡ଼ିବାରୁ ଘରର କାନ୍ଥ ଆଜବେଷ୍ଟସ ଓ ଗୁହାଳର କାନ୍ଥ ଓ ଟାଇଲି ଛପର ଭାଙ୍ଗି ନଷ୍ଟ ହୋଇଛି। ରାଜସ୍ବ ନୀରିକ୍ଷକଙ୍କ ଦ୍ୱାରା କ୍ଷୟକ୍ଷତି ଆକଳନ ପରେ କ୍ଷତିଗ୍ରସ୍ତ ପରିବାରକୁ ସହାୟତା ପ୍ରଦାନ କରାଯିବ ବୋଲି ନନ୍ଦପୁର ତହସିଲଦାର ନରସିଂହ ଗାଦବା ଓ ଲମତାପୁଟ ତହସିଲଦାର ଜୟନ୍ତ ମେହେର କହିଛନ୍ତି।