ଅନୁଗୋଳ ଅଫିସ, ୧୩ା୧୦: ଅନୁଗୋଳ ଜିଲା ତାଳଚେର ପୌରପାଳିକାର ଜଣେ କନିଷ୍ଠ ଯନ୍ତ୍ରୀ(ଜେଇ) ଏକ ପୋଖରୀ ପୁନରୁଦ୍ଧାର ବିଲ୍ରେ ୮ ଲକ୍ଷ ଟଙ୍କା ହେରଫେର କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ଏ ନେଇ ପୌର ନିର୍ବାହୀ ଯନ୍ତ୍ରୀ ଜୟନ୍ତ କୁମାର ପରିଡ଼ା ସମ୍ପୃକ୍ତ କନିଷ୍ଠ ଯନ୍ତ୍ରୀଙ୍କୁ କାରଣ ଦର୍ଶାଅ ନୋଟିସ ଜାରି କରିବା ସହ ପୌର ନିର୍ବାହୀ ଅଧିକାରୀ ଏବଂ ଜିଲାପାଳଙ୍କ ନିକଟରେ ଲିଖିତ ଅଭିଯୋଗ କରିଛନ୍ତି। ତେବେ ନିର୍ଦ୍ଧାରିତ ସମୟ ଅତିକ୍ରାନ୍ତ ହୋଇଯାଇଥିଲେ ମଧ୍ୟ କନିଷ୍ଠ ଯନ୍ତ୍ରୀ ନୋଟିସର ଉତ୍ତର ରଖି ନ ଥିବା ନିର୍ବାହୀ ଯନ୍ତ୍ରୀ ପରିଡ଼ା ପ୍ରକାଶ କରିଛନ୍ତି।
ନିର୍ବାହୀ ଯନ୍ତ୍ରୀ କହିଛନ୍ତି, ପୌରପାଳିକା ୪ ନମ୍ବର ୱାର୍ଡରେ ଥିବା ଜୁବୁଲି ପୋଖରୀର ପୁନରୁଦ୍ଧାର ନିମନ୍ତେ ୧୧ ଲକ୍ଷ ୪୭ ହଜାର ୬୦୦ ଟଙ୍କା ବ୍ୟୟ ବରାଦ କରାଯାଇଥିଲା। ମୁକ୍ତା ଯୋଜନାରେ ହେଉଥିବା ଏହି ଉନ୍ନୟନ କାର୍ଯ୍ୟ ୨୦୨୦ ମସିହାରେ ଆରମ୍ଭ ହୋଇ ୨୦୨୨ରେ ଶେଷ ହୋଇଛି। ବ୍ୟୟ ଅଟକଳ ମଧ୍ୟରୁ ୨୦୨୧ ଜାନୁୟାରୀ ୩୧ ତାରିଖ ସୁଦ୍ଧା ୯ଲକ୍ଷ ୧୮ ହଜାର ୯୨୮ ଟଙ୍କା ପ୍ରଦାନ କରାଯାଇସାରିଛି। ଅବଶିଷ୍ଟ ୨ ଲକ୍ଷ ୨୮ ହଜାର ୬୭୨ ଟଙ୍କା କାର୍ଯ୍ୟ ଶେଷ ପରେ ପ୍ରଦାନ କରାଯିବ ବୋଲି ସ୍ଥିର ହୋଇଥିଲା। କିନ୍ତୁ ଗତ ସେପ୍ଟେମ୍ବରରେ ପୌର କନିଷ୍ଠ ଯନ୍ତ୍ରୀ ଉକ୍ତ ବିଲ୍ରେ ଚଞ୍ଚକତା କରି ୮ ଲକ୍ଷ ୨୧ ହଜାର ୬୮୩ ଟଙ୍କା ହେରଫେର କରିବାକୁ ଉଦ୍ୟମ କରିଥିଲେ। ଏ ନେଇ ସମ୍ପୃକ୍ତ ଜେଇଙ୍କୁ ପଚରାଯାଇଥିଲେ ମଧ୍ୟ ସନ୍ତୋଷଜନକ ଉତ୍ତର ମିଳି ନ ଥିଲା। ତେଣୁ ତାଙ୍କୁ ୩ ଦିନ ମଧ୍ୟରେ ଉତ୍ତର ରଖିବାକୁ ନୋଟିସ ଦିଆଯାଇଥିଲା। କିନ୍ତୁ କନିଷ୍ଠ ଯନ୍ତ୍ରୀ ଉତ୍ତର ରଖି ନାହାନ୍ତି। ଘଟଣା ସମ୍ପର୍କରେ ଗତ ୨୯ ତାରିଖରେ ଜିଲାପାଳଙ୍କୁ ଲିଖିତ ଭାବେ ଜଣାଇ ଦିଆଯାଇଥିବା ନିର୍ବାହୀ ଯନ୍ତ୍ରୀ ପରିଡ଼ା ପ୍ରକାଶ କରିଛନ୍ତି। ଏପରି ଅଭିଯୋଗ ମିଳିଥିବା ଅନୁଗୋଳ ଜିଲା ପ୍ରଶାସନ ପକ୍ଷରୁ କୁହାଯାଇଛି। ତେବେ ଅଭିଯୋଗ ସମ୍ପର୍କରେ ପୌର କନିଷ୍ଠ ଯନ୍ତ୍ରୀଙ୍କ ସହ ଯୋଗାଯୋଗ ସମ୍ଭବ ହୋଇପାରି ନ ଥିବାରୁ ମତାମତ ମିଳିପାରି ନାହିଁ।