ନୂଆଦିଲ୍ଲୀ/ଶ୍ରୀନଗର,୧୫।୨: ଜମ୍ମୁ-କଶ୍ମୀରର ପୁଲ୍ଓ୍ବାମାରେ ଆତଙ୍କବାଦୀ ଆକ୍ରମଣକୁ ମଙ୍ଗଳବାର ୪ ବର୍ଷ ପୂରିଛି। ୨୦୧୯ ଫେବୃୟାରୀ ୧୪ରେ ଆତଙ୍କବାଦୀଙ୍କ ବିସ୍ଫୋରଣରେ ସିଆର୍ପିଏଫ୍ର ଏକ ଗାଡ଼ି ଧ୍ୱଂସ ହେବା ସହ ୪୦ ଯବାନ ଶହୀଦ ହୋଇଥିଲେ। ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସିଆର୍ପିଏଫ୍ ଏବଂ ସେନା ଅଧିକାରୀମାନେ ଶହୀଦ ଯବାନମାନଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ବୀର ଯବାନମାନଙ୍କ ବଳିଦାନକୁ ଦେଶ କେବେ ଭୁଲିବ ନାହିଁ। ସେମାନଙ୍କ ସାହସ ଆମକୁ ସଶକ୍ତ ଓ ବିକଶିତ ଭାରତ ଗଠନ ଲାଗି ପ୍ରେରଣା ଯୋଗାଇବ ବୋଲି ପ୍ରଧାନମନ୍ତ୍ରୀ ଟୁଇଟ୍ କରିଛନ୍ତି। ସ୍ବତନ୍ତ୍ର ନିର୍ଦ୍ଦେଶକ ଜେନେରାଲ ଦଲ୍ଜିତ ସିଂ ଚୌଧାରୀଙ୍କ ନେତୃତ୍ୱରେ ସିଆର୍ପିଏଫ୍ ଅଫିସର, ଜମ୍ମୁ-କଶ୍ମୀର ପୋଲିସ ଏବଂ ଭାରତୀୟ ସେନା ପୁଲ୍ଓ୍ବାମା ଶହୀଦମାନଙ୍କ ସ୍ମାରକୀରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ପୁଲ୍ଓ୍ବାମା ବିସ୍ଫୋରଣରେ ୧୯ ଆତଙ୍କବାଦୀ ସମ୍ପୃକ୍ତ ଥିଲେ। ସେମାନଙ୍କ ମଧ୍ୟରୁ ଇତିମଧ୍ୟରେ ୮ ଜଣ ନିହତ ହେବା ସହ ଅନ୍ୟ ୭ ଜଣଙ୍କୁ ଗିରଫ କରାଯାଇଥିବା ଜମ୍ମୁ-କଶ୍ମୀର ପୋଲିସ କହିଛି। ଏହି ଆକ୍ରମଣରେ ସମ୍ପୃକ୍ତ ୩ ପାକିସ୍ତାନୀଙ୍କ ସମେତ ୪ ଜଣ ଜୀବିତ ରହିଥିବା କଶ୍ମୀର ପୋଲିସ ଏଡିଜି ବିଜୟ କୁମାର କହିଛନ୍ତି।