ଖଇରା,୨।୭(ଉତ୍କଳବନ୍ଧୁ ପଣ୍ଡା)ବାଲେଶ୍ୱର ଜିଲା ଅଧୀନ ଖଇରା, ଔପଦା ଓ ସୋର ବ୍ଲକର କିଛି ଅଂଶ ଚାଷଜମିକୁ ଜଳସେଚିତ କରିବାକୁ ଏବେ ଭୂତଳଜଳ ପାଇପ ଜଳସେଚନ ପ୍ରକଳ୍ପ କାର୍ଯ୍ୟ ଚାଲୁଛି। ହେଲେ ଠିକାଦାର ଏହାକୁ ଠିକ୍ ଢଙ୍ଗରେ କରୁ ନ ଥିବାରୁ ଚାଷୀଙ୍କ ମଧ୍ୟରେ ଭାଳେଣି ପଡିଛି। ଜମିଗୁଡିକୁ ଖୋଳାଖୋଳି କରାଯିବା ପରେ ତାକୁ ଠିକ୍ ଭାବେ ପୋତି ସମାନ କରାଯାଉନାହିଁ କି ଜମି ହିଡକୁ ଠିକ୍ ଭାବେ ଦିଆଯାଉନାହିଁ। ଫଳରେ ଚଳିତବର୍ଷ ୮ହଜାର ହେକ୍ଟର ଜମି ପଡିଆ ପଡିବା ନିଶ୍ଚିତ ହୋଇଯାଇଛି। ତୁରନ୍ତ କାର୍ଯ୍ୟ କରୁଥିବା ଗୁଜରାଟ ଠିକାଦାରଙ୍କ ବେପରୁଆ କାର୍ଯ୍ୟ ଉପରେ ଅଙ୍କୁଶ ଲଗାଇବାକୁ ହଜାର ହଜାର ଚାଷୀ ଦାବି କରିଛନ୍ତି।
ଖଇରା, ଔପଦା ଓ ସୋର ବ୍ଲକର ୯ହଜାର ୮୦୩ ହେକ୍ଟର ଚାଷଜମିକୁ ଭୂତଳ ପାଇପ ମାଧ୍ୟମରେ ଜଳସେଚିତ କରିବାକୁ ପାଖାପାଖି ୨୫୦କୋଟି ଟଙ୍କା ପ୍ରଦାନ କରାଯାଇଥିଲା। ଆନନ୍ଦପୁର କେନାଲ ଡିଭିଜନ ଅଧୀନକୁ ଏହି କାର୍ଯ୍ୟ ସମ୍ପୂର୍ଣ୍ଣ କରିବାକୁ ଦାୟିତ୍ୱ ଦିଆଯାଇଛି। ଆମ୍ବହତା କେନାଲର ୧୨ଟି ଡିଷ୍ଟ୍ରିବ୍ୟୁଟାରିରୁ ୧୨୦କି.ମି. ମୁଖ୍ୟ ପାଇପଲାଇନ ଓ ୬୯୦ କି.ମି. ଶାଖା ପାଇପଲାଇନ ମାଧ୍ୟମରେ ପ୍ରତି ହେକ୍ଟର ଚାଷଜମିକୁ ପାଣି ମାଡିବା ପାଇଁ ଗୋଟିଏ ଗୋଟିଏ ପମ୍ପିଂ ପଏଣ୍ଟ ବ୍ୟବସ୍ଥା ଲକ୍ଷ୍ୟ ରଖାଯାଇଛି। ୧୮ମାସ ମଧ୍ୟରେ ଶେଷ ହେବାକୁ ଥିବା କାର୍ଯ୍ୟର ମନ୍ଥର ଗତି ପାଇଁ ୧୨ମାସ ମଧ୍ୟରେ ମାତ୍ର ୫୦ ପ୍ରତିଶତ କାର୍ଯ୍ୟ ଶେଷ ହୋଇଛି। ଅଧାପନ୍ତରିଆ କାର୍ଯ୍ୟ ପାଇଁ ଏ ବର୍ଷ ଚାଷ ବ୍ୟାପକ ଭାବେ ପ୍ରଭାବିତ ହେବା ଆଶଙ୍କା ଦେଖାଦେଇଛି। ପରୀକ୍ଷାମୂଳକ ଭାବେ ଚଳିତବର୍ଷ ନୟାଖଣ୍ଡି ଓ ସୁଣ୍ଢିରା ଡିଷ୍ଟ୍ରିବ୍ୟୁଟାରି ଅଧୀନରେ ଆସୁଥିବା ଚାଷଜମିକୁ ଖରିଫ ଋତୁରେ ଜଳସେଚନ କରାଯିବାକୁ ପ୍ରସ୍ତୁତି ଚାଲିଛି। ଏହି କାରଣରୁ ଅନ୍ୟ ଚାଷଜମିଗୁଡିକ ନିଶ୍ଚିତ କ୍ଷତିଗ୍ରସ୍ତ ହେବା ଅବଶ୍ୟମ୍ଭାବୀ। କାରଣ ମୁଖ୍ୟ ଲାଇନରେ ୬ଫୁଟରୁ ୭ଫୁଟ ଗଭୀରତାରେ ଏବଂ ଶାଖା ଲାଇନରେ ୩.୫ ଫୁଟରୁ ୪ ଫୁଟ ଗଭୀରତାରେ ପାଇପ ବିଛା କାର୍ଯ୍ୟ ଚାଲୁରହିଛି। ଗର୍ତ୍ତଗୁଡିକୁ ଠିକ୍ ଭାବେ ସମତୁଲ କରାଯାଉ ନ ଥିବାରୁ ଜମିଗୁଡିକ କେଉଁଠି ୩ ଫୁଟ ଉଚ୍ଚ କେଉଁଠି ୩ ଫୁଟ ଖାଲୁଆ ରହିଥିବାରୁ ଚାଷକାର୍ଯ୍ୟରେ ବାଧକ ସାଜିବା ଆଶଙ୍କା ଦେଖାଦେଇଛି। ସେହିଭଳି ମହତୀପୁର, ଗୋଳିହା, ବଟେଶ୍ୱର-ମଳିହା, ଓଝାପାଖେରୀ-ଅଡା ଭଳି ୧୦ରୁ ଅଧିକ ମୁଖ୍ୟ ସଡକ ପଥକୁ କାଟି ତା’ ତଳେ ପାଇପ ସଂଯୋଗ କରାଯାଉଛି। ପରବର୍ତ୍ତୀ ପର୍ଯ୍ୟାୟରେ ଏଗୁଡିକୁ ମରାମତି କରାଯାଉ ନ ଥିବାରୁ କାଦୁଅ ପଚ ପଚ ରାସ୍ତାରେ ଯାତ୍ରୀ ଦୁର୍ଘଟଣାର ଶିକାର ହେଉଥିବା ନେଇ ଅଭିଯୋଗ ହୋଇଛି। ସେହିଭଳି ରାସ୍ତା ପାର୍ଶ୍ୱ ଡ୍ରେନ୍ଗୁଡିକରୁ ମାଟି ପରିଷ୍କାର କରାଯାଉ ନ ଥିବାରୁ କୃତ୍ରିମ ବନ୍ୟାକୁ ନିମନ୍ତ୍ରଣ କରୁଛି। ବାରମ୍ବାର ଅଭିଯୋଗ ପରେ ମଧ୍ୟ ରାସ୍ତାଗୁଡିକ ପୂର୍ବବତ୍ ମରାମତି କରାଯାଉ ନ ଥିବା ବହୁ ଗ୍ରାମବାସୀ ଅଭିଯୋଗ କରିଛନ୍ତି। ଏ ସମ୍ପର୍କରେ ଆନନ୍ଦପୁର କେନାଲ ଡିଭିଜନର ନିର୍ବାହୀଯନ୍ତ୍ରୀ ସୁଶାନ୍ତ କୁମାର ମାଝିଙ୍କୁ ଯୋଗାଯୋଗ କରିବାରେ ଚାଷୀମାନେ ଯେଭଳି କ୍ଷତିଗ୍ରସ୍ତ ନ ହେବେ ସେଥିଲାଗି ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି।