ଝାରସୁଗୁଡ଼ା ଅଫିସ,୧୧ା୨: ଆର୍ଆଇ ଟିକେନାଥ କାଲୋଙ୍କ ହତ୍ୟା ମାମଲାର ରାୟ ପ୍ରକାଶ ପାଇଛି। ଅତିରିକ୍ତ ଜିଲା ଦୌରଜଜ୍ ସତ୍ୟବ୍ରତ ମିଶ୍ର ମାମଲାର ବିଚାରକରି ଅଭିଯୁକ୍ତ ବ୍ରଜରାଜନଗର ଗଙ୍ଗାନଗରର ସଞ୍ଜୀତ ଗୁପ୍ତାଙ୍କୁ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ରାୟରେ ଉଲ୍ଲେଖ ରହିଛି ୩୯୪, ୩୯୭ ଦଫାରେ ୧୦ବର୍ଷ ସଶ୍ରମ କାରାଦଣ୍ଡ ସହିତ ୫ହଜାର ଟଙ୍କା ଜରିମାନା ଓ ୨୦୧ଦଫାରେ ୫ବର୍ଷ କାରାଦଣ୍ଡ ସହିତ ୩ହଜାର ଟଙ୍କା ଜରିମାନା ରହିଛି। ଆର୍ଆଇଙ୍କ ପକ୍ଷରୁ ସରକାରୀ ପବ୍ଲିକ୍ ପୋସିକ୍ୟୁଟର (ଏପିପି) ଗଙ୍ଗାଧର ଗଡନାୟକ ମାମଲା ପରିଚାଳନା କରୁଥିଲେ।
ସୂଚନା ମୁତାବକ, ଝାରସୁଗୁଡା ଜିଲା ଲଖନପୁର ବ୍ଲକ୍ ବନହରପାଲି ଗ୍ରାମର ଟିକେନାଥ କାଲୋ କିର୍ମିରା ତହସିଲରେ ଆର୍ଆଇ ଭାବେ କାର୍ଯ୍ୟରତ ଥିଲେ। ୨୦୧୪ରେ ସେ କିର୍ମିରାରୁ ବାଇକ୍ରେ ଫେରୁଥିବାବେଳେ ଗାନ୍ଧୀଛକ-ବେଲପାହାଡ ୪୯ନଂ ଜାତୀୟ ରାଜପଥ ଆମ୍ବଦରହ ନିକଟରେ ଦୁର୍ବୃତ୍ତମାନେ ତାଙ୍କୁ ଅଟକାଇଥିଲେ। ପରେ ତାଙ୍କୁ ରାସ୍ତା ପାର୍ଶ୍ୱ ଜଙ୍ଗଲକୁ ନେଇ ଛୁରିଭୂଷି ହତ୍ୟାକରି ତାଙ୍କ ନିକଟରୁ ବାଇକ୍, ମୋବାଇଲ୍ ଓ ଟଙ୍କା ଆଦି ଲୁଟିନେଇଥିଲେ। ପୁଅ ଘରେ ନ ପହଞ୍ଚତ୍ବାରୁ ପରିବାର ଲୋକେ ପ୍ରଥମେ ବନହରପାଲି ଥାନାରେ ଲିଖିତ ଅଭିଯୋଗ କରିଥିଲେ। ଘଟଣାର ୪ଦିନ ପରେ ଓରିଏଣ୍ଟ ଥାନା ପୋଲିସ ୪୯ନଂ ଜାତୀୟ ରାଜପଥରେ ଯାନବାହନ ଯାଞ୍ଚ କରୁଥିବା ବେଳେ ଏକ ବାଇକ୍ର କାଗଜପତ୍ର ଯାଞ୍ଚ କରି ତାହା ଆର୍ଆଇ ଟିକେନାଥଙ୍କ ନାମରେ ଥିବା ଜାଣିଥିଲେ। ବାଇକ୍ ଚଳାଉଥିବା ଯୁବକ ସଞ୍ଜୀତ ଗୁପ୍ତାଙ୍କୁ ପୋଲିସ ଜେରା କଲାବେଳେ ସେ ୩ଜଣ ମିଶି ଆର୍ଆଇଙ୍କୁ ହତ୍ୟାକରି ବାଇକ୍ ଲୁଟ୍ କରିଥିବା ପୋଲିସ ଆଗରେ ସ୍ବୀକାର କରିଥିଲେ। ପରେ ପୋଲିସ ଜଙ୍ଗଲରୁ ଆର୍ଆଇଙ୍କ ଗଳିତ ମୃତଦେହ ଉଦ୍ଧାର କରିଥିଲା। ପରିବାର ଲୋକେ ପହଞ୍ଚତ୍ ମୃତଦେହ ଚିହ୍ନଟ କରିଥିଲେ। ସେତେବେଳେ ମୁଖ୍ୟ ଅଭିଯୁକ୍ତ ସଞ୍ଜୀତ ସାବାଳକ ଥିବାବେଳେ ଅନ୍ୟ ୨ଜଣ ନାବାଳକ ଥିଲେ। ଓରିଏଣ୍ଟ ଥାନା ପୋଲିସ ଆଇପିସି ଦଫା ୩୦୨ରେ ମାମଲା (ନଂ୧୧୬/୧୪) ରୁଜୁକରି ତଦନ୍ତ ଚଳାଇଥିଲା। ପରେ ପୋଲିସ ସଞ୍ଜୀତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। କୋର୍ଟଙ୍କ ନିର୍ଦ୍ଦେଶକ୍ରମେ ତାଙ୍କୁ ଜେଲ୍ ହାଜତକୁ ପଠାଇ ଦିଆଯାଇଥିଲା।