କିଏ ସମୁଦ୍ରରେ ପହଁରିବାକୁ ତ କିଏ ସମୁଦ୍ର କୂଳରେ ସମୟ ବିତାଇବାକୁ ଭଲ ପାଏ। ତଥାପି ସମୁଦ୍ର କୂଳରେ ନାନା ବିପଦ ରହିଛି। ଏବେ ଜଣେ ୮ ବର୍ଷର ବାଳକ ସହ ସେମିତି ଏକ ଘଟଣା ଘଟିଛି। ବାଳକ ଜଣକ ତାଙ୍କ ପିତାଙ୍କ ସହ ସମୁଦ୍ରରେ ଗାଧୋଉଥିଲେ। ଏହି ସମୟରେ ଏକ ସାର୍କ ସହ ତାଙ୍କର ମୁହାଁମୁହିଁ ହୋଇଥିଲା। ତା’ ପରେ ଯାହା ଘଟିଲା, ଜାଣନ୍ତୁ ସେ ସମ୍ପର୍କରେ…
୮ ବର୍ଷୀୟ ନ୍ୟାପେଟ ଚ୍ୟାଇରକ କ୍ରିଷ୍ଟେଙ୍କୋ ଥାଇଲ୍ୟାଣ୍ଡର ଫୁକେଟରେ ସମୁଦ୍ରକୁ ପିତାଙ୍କ ସହ ଗାଧୋଇ ଯାଇଥିଲେ। ଏହି ସମୟରେ ତାଙ୍କ ଗୋଡ଼ରେ ପ୍ରବଳ ଯନ୍ତ୍ରଣା ହୋଇଥିଲା ଏବଂ ନ୍ୟାପେଟ କାନ୍ଦିବାକୁ ଲାଗିଥିଲେ। ଏହି ଯନ୍ତ୍ରଣା ବଢ଼ିବାରୁ ଏହା କୌଣସି ଛୋଟ ପ୍ରାଣୀ ନ ଥିଲା, ଏହା ସାର୍କ ବୋଲି ନିଶ୍ଚିତ ହୋଇଥିଲା।
ତାଙ୍କ ପିତା ଏହା ଜାଣିବା ବେଳକୁ ସାର୍କଟି ନ୍ୟାପେଟଙ୍କ ଗୋଡ଼କୁ କାମୁଡ଼ି ଧରିଥିଲା। ନ୍ୟାପେଟ କହିଛନ୍ତି, ପୂର୍ବରୁ ତାଙ୍କୁ ଏତେ ଯନ୍ତ୍ରଣା ହେଉ ନ ଥିଲା। ଯେତେବେଳେ ସେ ତାଙ୍କ ଗୋଡ଼ ତଳକୁ ଚାହିଁଲେ, ଏକ ସାର୍କକୁ ଦେଖିଥିଲେ। ସାହସୀ ପିଲାଟି ସାର୍କର ମୁହଁରେ ଜୋରରେ ପିଟିବାକୁ ଲାଗିଲେ। ସାର୍କ ଆଘାତ ପାଇବା ପରେ ଗୋଡ଼ ଛାଡ଼ି ଦେଇଥିଲା। ଏହି ସମୟରେ ତାଙ୍କ ପିତା ନ୍ୟାପେଟଙ୍କୁ କୂଳକୁ ଟାଣି ନେଇଥିଲେ। ବିଶେଷଜ୍ଞଙ୍କ ମତରେ ଶିଶୁର ଗୋଡ଼କୁ ଏକ ବିରାଟ ସାର୍କ ଧରିଥିଲା। ଏହାର ଲମ୍ବ ୮୦-୧୨୦ ସେମି ଲମ୍ବ। ମେଘୁଆ ପାଗ ହେତୁ ସାର୍କ ହୁଏତ ଶିଶୁର ଗୋଡ଼କୁ ମାଛ କିମ୍ବା ଅନ୍ୟ ସାମୁଦ୍ରିକ ପ୍ରାଣୀ ଭାବରେ ଧରିଥାଇପାରେ। ଏବେ ନ୍ୟାପେଟ ସୁସ୍ଥ ଥିବା ଜଣାପଡ଼ିଛନ୍ତି।