ବଡ଼ଗାଁ, ୧୬ା୯(ଡି.ଏନ.ଏ.): ସୁନ୍ଦରଗଡ଼ ଜିଲା ବଡ଼ଗାଁ ବ୍ଲକ ଅଞ୍ଚଳର ୭୦ ପ୍ରତିଶତ ପରିବାର ଚାଷ ଉପରେ ନିର୍ଭର କରି ପରିବାର ପ୍ରତିପୋଷଣ କରନ୍ତି। ବ୍ଲକ ଅଞ୍ଚଳରେ ଥିବା ୧୦ ଟି କ୍ଷୁଦ୍ର ଜଳସେଚନ ପ୍ରକଳ୍ପର ପାଣିରେ ପ୍ରାୟ ୮ ଶହ ଏକର ଜମି ଜଳସେଚିତ ହୋଇଥାଏ। ବାକି ସମସ୍ତ ଜମିରେ ବର୍ଷା ଜଳ ଉପରେ ନିର୍ଭର କରି ଚାଷ ହୋଇଥାଏ। ଖରିଫ୍ ଧାନ ଚାଷ ଉପରେ ସମସ୍ତ ଚାଷୀ ନିର୍ଭର କରୁଥିବାରୁ ସ୍ବଳ୍ପ କିମ୍ବା ଅନିୟମିତ ବର୍ଷା ହେଲେ ଚାଷ ନଷ୍ଟ ହୋଇଥାଏ। ଏହାକୁ ଦୃଷ୍ଟିରେ ରଖି ସରକାର ସଫେଇ ନଦୀରେ ମେଗା ଜଳସେଚନ ପ୍ରକଳ୍ପ ନିର୍ମାଣ ୨୦୧୮ରେ ଆରମ୍ଭ କରିଥିଲେ। ୮୦ କୋଟି ଟଙ୍କା ବ୍ୟୟରେ ନିର୍ମିତ ଏହି ପ୍ରକଳ୍ପର ଫଳକକୁ ୨୦୨୦ ଫେବୃଆରୀ ୨ ତାରିଖ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଘାଟନ କରିଥିଲେ। ସେଠାରେ ପ୍ରଦର୍ଶିତ ଭିଡିଓରେ ଚାଷୀ ହସୁଥିବାର ଦେଖାଇଥିଲେ। ବର୍ତ୍ତମାନ ଚାଷୀ ପ୍ରକଳ୍ପକୁ ଭାଙ୍ଗି ଦେବେ ବୋଲି ଚେତାବନୀ ଦେଇଥିବାରୁ ସରକାରଙ୍କ ମିଥ୍ୟା ପ୍ରଚାର ପଦାରେ ପଡ଼ିଛି। ଏହି ପ୍ରକଳ୍ପ ଚାଷୀଙ୍କ ଆବଶ୍ୟକତାକୁ ପୂରଣ କରିପାରୁନାହିଁ। ପ୍ରକଳ୍ପ ନିର୍ମାଣ ହେଲେ ୩୮ ଶହ ହେକ୍ଟର ଜମି ଜଳସେଚିତ ହେବ କୁହାଯାଇଥିଲା। କିନ୍ତୁ ୮୦ କୋଟି ଟଙ୍କା ଖର୍ଚ୍ଚ ହୋଇଥିଲେ ମଧ୍ୟ ୮୦ ହେକ୍ଟର ଜମିକୁ ପାଣି ଯାଉନାହିଁ। ମେଗା ପ୍ରକଳ୍ପ କର୍ମଚାରୀଙ୍କ ମନମୁଖୀ କାର୍ଯ୍ୟ ଯୋଗୁ ଚାଷୀମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ନଦୀ ଚିରସ୍ରୋତା ହୋଇ ନ ଥିବାରୁ ଚେକ୍ଡେମ ନିର୍ମାଣ ନ କଲେ ଜମିକୁ ଜଳସେଚିତ କରିବା ସମ୍ଭବ ନୁହେଁ ବୋଲି ଦାବିକରି ଚାଷୀମାନେ ମୁଖ୍ୟମନ୍ତ୍ରୀ, ଜିଲାପାଳ, ବିଭାଗୀୟ ଯନ୍ତ୍ରୀଙ୍କୁ ଜଣାଇ ନିରାଶ ହୋଇଛନ୍ତି। ନଦୀରେ ବାଲିବନ୍ଧ ପାଇଁ ଚାଷୀମାନେ ଦାବି କରିଥିଲେ ମଧ୍ୟ ପ୍ରକଳ୍ପର କର୍ମଚାରୀମାନେ ଠିକ ସ୍ଥାନରେ ବନ୍ଧ ତିଆରି ନ କରିବାରୁ ଗୁରୁବାର ଚାଷୀମାନେ ନିଜ ପ୍ରଚେଷ୍ଟାରେ ବନ୍ଧ ବାନ୍ଧିଛନ୍ତି। ବାରମ୍ବାର ପ୍ରଶାସନ ଓ ବିଭାଗୀୟ ଅଧିକାରୀଙ୍କୁ ଜଣାଇ ହତାଶ ହୋଇଥିବା ଚାଷୀମାନେ ସରକାର୍ ଅଣଦେଖା କରୁଥିବା ଅଭିଯୋଗ କରିଛନ୍ତି।