ରିୟାଦ, ୧୨।୩ : ସୌଦି ଆରବରେ ଗୋଟିଏ ଦିନରେ ୮୧ ଜଣଙ୍କୁ ଫାଶୀ ଦିଆଯାଇଛି। ସ୍ଥାନୀୟ ମିଡ଼ିଆ ଅନୁସାରେ ଏସମସ୍ତଙ୍କ ବିରୋଧରେ ଆତଙ୍କବାଦୀ କାର୍ଯ୍ୟକଳାପରେ ଲିପ୍ତ ହେବାର ଅଭିଯୋଗ ଥିଲା। ଦୋଷ ସାବ୍ୟସ୍ତ ହେବା ପରେ ସେମାନଙ୍କୁ ଫାଶୀ ଦଣ୍ଡରେ ଦଣ୍ଡିତ କରାଯାଇଛି ବୋଲି ଶନିବାର ମିଡ଼ିଆ ପକ୍ଷରୁ ସୂଚନା ପ୍ରଦାନ କରାଯାଇଛି।
ଫାଶୀ ଦିଆଯାଇଥିବା ଅପରାଧିମାନେ ଇସଲାମିଲ୍ ଷ୍ଟେଟ୍, ଅଲ୍-କାଇଦା, ହୁଥି ଏବଂ ଅନ୍ୟ ଆତଙ୍କବାଦୀ ସଂଗଠନ ସହିତ ଜଡ଼ିତଥିଲେ। ଦେଶର ଗୁରୁତ୍ୱପୂର୍ଣ୍ଣ ଅଞ୍ଚଳରେ ଆକ୍ରମଣ କରିବାର ଷଡ଼ଯନ୍ତ୍ର ସେମାନେ ରଚିଥିବା ସୌଦି ପ୍ରେସ୍ ଏଜେନ୍ସି ପକ୍ଷରୁ କୁହାଯାଇଛି। ସେମାନେ ଦେଶରେ ଚୋରା ଅସ୍ତ୍ରଶସ୍ତ୍ର କାରବାର କରୁଥିବାର ପ୍ରମାଣ ମିଳିଥିଲା ବୋଲି ଏଜେକ୍ସି କହିଛି।
୨୦୨୧ରେ ସୌଦିରେ ଦିଆଯାଇଥିବା ମୋଟ ଫାଶୀଦଣ୍ଡ ସଂଖ୍ୟାଠାରୁ ଏହି ଗୋଟିଏ ଦିନର ଫାଶୀ ସଂଖ୍ୟା ଯଥେଷ୍ଟ ଅଧିକ ରହିଥିବା ମିଡ଼ିଆ ପକ୍ଷରୁ ଦର୍ଶାଯାଇଛି।