ନୂଆଦିଲ୍ଲୀ,୨୨।୧(ପି.ଟି.) : ଦେଶରେ ଏକସଙ୍ଗେ ଲୋକ ସଭା ଏବଂ ରାଜ୍ୟ ବିଧାନସଭାଗୁଡ଼ିକର ନିର୍ବାଚନ କରାଇବା ସପକ୍ଷରେ ୮୧ ପ୍ରତିଶତ ମତ ଦେଇଛନ୍ତି। ଏକ ରାଷ୍ଟ୍ର ଏକ ନିର୍ବାଚନ ଯୋଜନାର ବିଭିନ୍ନ ଦିଗକୁ ଅନୁଧ୍ୟାନ କରିବା ପାଇଁ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଗଠିତ ଉଚ୍ଚ କ୍ଷମତାସମ୍ପନ୍ନ କମିଟି କରାଯାଇଥିଲା। ବର୍ତ୍ତମାନ ସୁଦ୍ଧା ଉକ୍ତ କମିଟିକୁ ପାଖାପାଖି ୨୧,୦୦୦ ପ୍ରସ୍ତାବ ମିଳିଛି। ଏକସଙ୍ଗେ ନିର୍ବାଚନ ସପକ୍ଷରେ ୮୧ ପ୍ରତିଶତ ମତାମତ ଦେଇଥିବା ଏକ ସରକାରୀ ବିବୃତିରେ କୁହାଯାଇଛି। ୪୬ଟି ରାଜନୈତିକ ଦଳଠାରୁ ପ୍ରସ୍ତାବ ମଗାଯାଇଥିବାବେଳେ ବର୍ତ୍ତମାନ ସୁଦ୍ଧା ୧୭ଟି ଦଳ ସେମାନଙ୍କର ମତାମତ ଜଣାଇଛନ୍ତି।
କଂଗ୍ରେସ ଏବଂ ଟିଏମ୍ସି ସମେତ କେତେକ ବିରୋଧୀ ଦଳ ‘ଓ୍ବାନ୍ ନେଶନ, ଓ୍ବାନ୍ ଇଲେକ୍ସନ’ ପ୍ରସ୍ତାବକୁ ବିରୋଧ କରିଛନ୍ତି। କୋବିନ୍ଦଙ୍କ ନେତୃତ୍ୱରେ ଗଠିତ କମିଟି ଗତ ୫ ତାରିଖରେ ନୋଟିସ ଜାରିକରି ଏକସଙ୍ଗେ ନିର୍ବାଚନ ପାଇଁ ବର୍ତ୍ତମାନର ଆଇନଗତ ଓ ପ୍ରଶାସନିକ ବ୍ୟବସ୍ଥାରେ ଉପଯୁକ୍ତ ପରିବର୍ତ୍ତନ ନିମନ୍ତେ ନାଗରିକଙ୍କଠାରୁ ପ୍ରସ୍ତାବ ଆହ୍ବାନ କରିଥିଲା। ପ୍ରକାଶ ଯେ, ଏକକାଳୀନ ନିର୍ବାଚନ କରାଗଲେ ଏଥିପାଇଁ ଆବଶ୍ୟକ ନୂଆ ଇଭିଏମ୍ କିଣିବା ସକାଶେ ପ୍ରତି ୧୫ ବର୍ଷରେ ୧୦ହଜାର କୋଟି ଟଙ୍କା ଖର୍ଚ୍ଚ ହେବ ବୋଲି ଦିନକ ପୂର୍ବରୁ ନିର୍ବାଚନ କମିଶନ ସରକାରଙ୍କୁ ଜଣାଇଥିଲେ।