ଲଣ୍ଡନ,୧।୩: ଦ୍ୱିତୀୟ ବିଶ୍ୱଯୁଦ୍ଧ ସମୟର ଏକ ବୋମାକୁ ୮୧ ବର୍ଷ ପରେ ଫୁଟାଯାଇଛି। ବ୍ରିଟେନ୍ର ଏକ୍ସେଟର ସହରରେ ବୋମା ନିଷ୍କ୍ରିୟକାରୀ ଟିମ୍ ରବିବାର ପହଞ୍ଚି ରିମୋର୍ଟ କଣ୍ଟ୍ରୋଲର ସହାୟତାରେ ଏଭଳି କରିଛନ୍ତି। ସୁରକ୍ଷା ଦୃଷ୍ଟିରୁ ସହରକୁ ସମ୍ପୂର୍ଣ୍ଣ ଖାଲି କରି ଦିଆଯାଇଥିଲା। ୯୦୭ କିଲୋଗ୍ରାମ୍ ବିଶିଷ୍ଟ ଏହି ବୋମା ପ୍ରଚଣ୍ଡ ଶବ୍ଦ କରି ଫୁଟିଥିଲା। ଏହାର ଶବ୍ଦ ୧୦ କିଲୋମିଟର ପର୍ଯ୍ୟନ୍ତ ଶୁଣାଯାଇଥିଲା। ଶବ୍ଦର ତୀବ୍ରତାରେ କେତେକ ଘରର ଝରକା କାଚ ମଧ୍ୟ ଭାଙ୍ଗିଯାଇଥିବା ସ୍ଥାନୀୟ ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଏହି ବୋମାକୁ ଏକ୍ସେଟର ବିଶ୍ୱବିଦ୍ୟାଳୟର ପରିତ୍ୟକ୍ତ କ୍ୟାମ୍ପସ୍ରୁ ଶୁକ୍ରବାର ମିଳିଥିଲା। ଏହାପରେ ବିଶ୍ୱବିଦ୍ୟାଳୟର ୧୪୦୦ ଶିକ୍ଷାର୍ଥୀ ଏବଂ ୨୬୦୦ ବାସଗୃହକୁ ଖାଲି କରାଯାଇଥିଲା। ରବିବାର ସଂନ୍ଧ୍ୟା ୬ଟା ୧୦ରେ ବୋମାକୁ ଫୁଟାଯାଇଥିବା ସ୍ଥାନୀୟ ପ୍ରଶାସନ କହିଛି। ବୋମା ଫୁଟିବାର ଏକ ମିନିଟ୍ ୧୬ ସେକେଣ୍ଡର ଏକ ଭିଡ଼ିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି।
