ଭୁବନେଶ୍ୱର, ୨୭ା୮(ଅସମାପିକା ସାହୁ)୨୦୨୩-୨୪ ଶିକ୍ଷାବର୍ଷରୁ ରାଜ୍ୟର ୮୩ଟି ଉଚ୍ଚ ମାଧ୍ୟମିକ ସ୍କୁଲରେ ନୂଆ ପାଠ୍ୟକ୍ରମ ଖୋଲିବାକୁ ଅନୁମୋଦନ ମିଳିଛି। ଏ ନେଇ ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଉକ୍ତ ବେସରକାରୀ ଯୁକ୍ତ୨ କଲେଜ ଅଧ୍ୟକ୍ଷଙ୍କୁ ଚିଠି ଲେଖି ଜଣାଯାଇଛି। ଏହି ବିଷୟଗୁଡ଼ିକ ସେଲ୍ଫ-ଫାଇନାନ୍ସିଂ ମୋଡ୍ରେ ଖୋଲିବା ପାଇଁ କୁହାଯାଇଛି। ତେବେ ପାଠ୍ୟକ୍ରମ ପାଇଁ ଅନୁମୋଦିତ ସିଟ୍ର ୮୦% ଉପରେ ନାମଲେଖା ହେବା ଆବଶ୍ୟକ। ଏଥିସହ ଏହି ନୂତନ ପାଠ୍ୟକ୍ରମ ଖୋଲିବା ପାଇଁ ଆବଶ୍ୟକ ତଥ୍ୟ ଦାଖଲ କରିବାକୁ ନିର୍ଦ୍ଦେଶାଳୟ ପକ୍ଷରୁ କୁହାଯାଇଛି। ପ୍ରାକ୍ଟିକାଲ ଲାବ୍ର ଫଟୋ, କିଣାଯାଇଥିବା ସାମଗ୍ରୀର ଭାଉଚର ଆଦି କଲେଜ କର୍ତ୍ତୃପକ୍ଷ ନିର୍ଦ୍ଦେଶାଳୟକୁ ପଠାଇବେ। ଏଥିସହ ସରକାରଙ୍କ ପାଖରୁ କୌଣସି ଆର୍ଥିକ ସହାୟତା ପାଇଁ ଦାବି କରିପାରିବେନି ବୋଲି ଏକ ଅଣ୍ଡରଟେକିଂ ଦେବା ପାଇଁ କୁହାଯାଇଛି। ସେହିପରି ପ୍ରତି ପାଠ୍ୟକ୍ରମ ପାଇଁ ୧ ହଜାର ଟଙ୍କାର ଚାଲାଣ ଦେବାକୁ ମଧ୍ୟ ଚିଠିରେ ଉଲ୍ଲେଖ ରହିଛି।