କୁଆଁରମୁଣ୍ଡା,୬।୮(ଡି.ଏନ୍.ଏ.): ସୁନ୍ଦରଗଡ଼ ଜିଲା ବୀରମିତ୍ରପୁର ଥାନା କୁଆଁରମୁଣ୍ଡା ଫାଣ୍ଡି ଅଞ୍ଚଳରେ ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି। ଜଣେ ୮୫ ବର୍ଷୀୟା ବୃଦ୍ଧାଙ୍କୁ ବଳାତ୍କାର କରାଯାଇଥିବା ଅଭିଯୋଗ ହୋଇଛି। ଅଭିଯୁକ୍ତ ଗୋବିରା ଗ୍ରାମ ପୁରୁଣା ଗିର୍ଜାଟୋଲାର ସୁଶୀଲ କୁଜୁର(୪୫)ଙ୍କୁ ଫାଣ୍ଡି ପୋଲିସ ଗିରଫ କରି କୋର୍ଟ ଚାଲାଣ କରିଛି। ଏ ନେଇ ବୀରମିତ୍ରପୁର ଥାନାରେ ଏକ ମାମଲା (ନଂ. ୧୫୭/୨୨) ରୁଜୁ ହୋଇଛି।
କୁଆଁରମୁଣ୍ଡା ଫାଣ୍ଡି ଅଧିକାରୀ ଶ୍ୟାମଲାଲ ଓରାମଙ୍କ ସୂଚନା ମୁତାବକ, ଗତ ଜୁଲାଇ ୨୭ ତାରିଖ ରାତିରେ ବୃଦ୍ଧା ଘରେ ଏକୁଟିଆ ଥିଲେ। ସୁଶୀଲ ଘର ଭିତରକୁ ପଶି ତାଙ୍କୁ ବଳାତ୍କାର କରିଥିଲେ। ଏହାପରେ ଘଟଣା ସମ୍ପର୍କରେ କାହାକୁ ନ କହିବାକୁ ବୃଦ୍ଧାଙ୍କୁ ଧମକଚମକ ଦେଇଥିଲେ। ହେଲେ ଘଟଣା ସମ୍ପର୍କରେ ବୃଦ୍ଧା ଜଣଙ୍କ ଝାଡ଼ଖଣ୍ଡ ଅଞ୍ଚଳରେ ରହୁଥିବା ତାଙ୍କ ଭଉଣୀଙ୍କୁ ଜଣାଇବା ପରେ ସେମାନେ ଗାଁକୁ ଆସିଥିଲେ। ହେଲେ ଘଟଣାଟି ଗ୍ରାମ ବୈଠକରେ ଫଇସଲା କରିବା ପାଇଁ ଉଦ୍ୟମ ଚାଲିଥିଲା। ମାତ୍ର ପୀଡ଼ିତାଙ୍କ ଭଉଣୀମାନେ ଏ ନେଇ କୁଆଁରମୁଣ୍ଡା ଫାଣ୍ଡିରେ ଲିଖିତ ଅଭିଯୋଗ କରିବା ପରେ ଅଭିଯୁକ୍ତ ସୁଶୀଲଙ୍କୁ ଗିରଫ କରାଯାଇଥିଲା। ଉଭୟଙ୍କ କୁଆଁରମୁଣ୍ଡା ସରକାରୀ ସ୍ବାସ୍ଥ୍ୟକେନ୍ଦ୍ରରେ ଡାକ୍ତରୀମାଇନା କରାଯାଇଥିଲା।
