କଟକ ଅଫିସ, ୨୬।୪: ଓଡ଼ିଶା ପକ୍ଷରୁ ବିଭିନ୍ନ ରାଜ୍ୟକୁ ଅକ୍ସିଜେନ୍ ଯୋଗାଣ ଜାରି ରହିଛି। ଗତ ୩ଦିନ ମଧ୍ୟରେ ୪୯ଟି ଟ୍ୟାଙ୍କର୍ ଯୋଗେ ୮୬୯ ଟନ୍ରୁ ଅଧିକ ମେଡିକାଲ ଅକ୍ସିଜେନ୍ ଓଡ଼ିଶା ପୋଲିସର ସୁରକ୍ଷା ବଳୟରେ ବିଭିନ୍ନ ରାଜ୍ୟକୁ ପଠାଯାଇଛି। ଉତ୍ତରପ୍ରଦେଶ, ଦିଲ୍ଲୀ, ହରିୟାଣା, ମହାରାଷ୍ଟ୍ର, ଆନ୍ଧ୍ରପ୍ରଦେଶ, ତେଲଙ୍ଗାନାକୁ ଅକ୍ସିଜେନ୍ ପଠାଯାଇଛି। ସେହିପରି ଯାଜପୁର, ରାଉରକେଲା, ଢେଙ୍କାନାଳ ଏବଂ ଅନୁଗୋଳରୁ ୨୦ଟି ଅକ୍ସିଜେନ୍ ଟ୍ୟାଙ୍କର୍ ରବିବାର ପଠାଯାଇଥିବା ରାଜ୍ୟ ପୋଲିସ ମୁଖ୍ୟାଳୟ ପକ୍ଷରୁ ସୂଚନା ଦିଆଯାଇଛି।
ରାଜ୍ୟ ବାହାରକୁ ଅକ୍ସିଜେନ୍ ନେଇ ଯାଉଥିବା ଟ୍ୟାଙ୍କର୍ଗୁଡ଼ିକର ଯାତାୟାତରେ ଯେପରି କିଛି ସମସ୍ୟା ନ ହୁଏ ସେଥିଲାଗି ରାଜ୍ୟ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଏଥିପାଇଁ ଏକ ସ୍ବତନ୍ତ୍ର ଗ୍ରୀନ କରିଡର୍ ପ୍ରସ୍ତୁତ ହୋଇଛି। ଉକ୍ତ କରିଡର୍ ଦ୍ୱାରା ଟ୍ୟାଙ୍କରଗୁଡ଼ିକ ବିନା ବିଳମ୍ବରେ ଜରୁରୀ ଆବଶ୍ୟକ ଥିବା ରାଜ୍ୟଗୁଡ଼ିକରେ ପହଞ୍ଚତ୍ପାରିବ। ଫଳରେ ରୋଗୀଙ୍କ ସେବାରେ ଉକ୍ତ ଅକ୍ସିଜେନ୍ ଲାଗିପାରିବ। ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ରାଜ୍ୟ ପୋଲିସ ପକ୍ଷରୁ ଏକ ସ୍ବତନ୍ତ୍ର ସେଲ୍ ଗଠନ କରାଯାଇଛି। ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ଆଇନ ଶୃଙ୍ଖଳା) ଯଶୱନ୍ତ ଜେଠୱାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଅକ୍ସିଜେନ୍ ଯୋଗାଣ କାର୍ଯ୍ୟକୁ ତ୍ୱରାନ୍ବିତ କରାଯାଉଛି। ସମସ୍ତ ଏସ୍ପି, ଡିସିପି, ଡିଆଇଜି, ଆଇଜି ଏବଂ ପୋଲିସ କମିଶନରଙ୍କୁ ନିଜ ଅଞ୍ଚଳରେ ଏହି କାର୍ଯ୍ୟ ତ୍ୱରାନ୍ବିତ କରିବାକୁ ନିର୍ଦ୍ଦେଶ ଦିଆଯାଇଛି।
