ଚନ୍ଦ୍ରପୁର,୨୩ ।୧୦: କରୋନା ମହାମାରୀ ସମୟରେ ଗାଁ ଲୋକେ ସ୍ୱାସ୍ଥ୍ୟ ସେବା ପାଇବାରେ ନାନା ଅସୁବିଧା ଭୋଗ କରୁଥିବା ଦେଖାଯାଇଛି । ଆଉ ଏହି ମହାମାରୀ ସମୟରେ ବିଶେଷ ଭାବେ ଛୋଟ ପିଲା, ବୟସ୍କ ବ୍ୟକ୍ତି ଓ ଗର୍ଭବତୀଙ୍କୁ ଘରୁ ବାହାରକୁ ବାହାରିବାକୁ ମନା କରାଯାଇଥିବା ବେଳେ ତା’ର ଏକ ବ୍ୟତିକ୍ରମ ଦେଖିବାକୁ ମିଳିଛି ମହାରାଷ୍ଟ୍ରର ଚନ୍ଦ୍ରପୁରରେ । ୮୭ ବର୍ଷ ବୟସରେ ପଦାର୍ପଣ କରିଥିବା ହୋମିଓପ୍ୟାଥି ଡାକ୍ତର ରାମଚନ୍ଦ୍ର ଦାନେକର ପ୍ରତିଦିନ ୧୦-୧୫ କିଲୋମିଟର ସାଇାକେଲ ଚଲାଇ ଯାଇ ଗାଁ ଲୋକଙ୍କୁ ସେବା ଯୋଗାଇ ଦେଉଛନ୍ତି । ପାଖାପାଖି ୬୦ ବର୍ଷ ହେବ ଗାଁର ଗରିବ ଲୋକଙ୍କୁ ସେ ଏମିତି ସେବା ଯୋଗାଇ ଆସୁଥିବା ବେଳେ ଆଜିବି ସେ କରୋନା ମହାମାରୀକୁ ଖାତିର ନ କରି ପ୍ରତିଦିନ ଗାଁକୁ ଯାଇ ଘର ଘର ବୁଲି ଲୋକଙ୍କୁ ଚିକିତ୍ସା ଯୋଗାଇ ଦେଉଛନ୍ତି ।
ଏ ସମ୍ପର୍କରେ ତାଙ୍କୁ ପଚରା ଯିବାରୁ ସେ କହିଛନ୍ତି ବର୍ତ୍ତମାନ କରୋନାକୁ ଡରି ଯୁବ ଡାକ୍ତମାନେ ରୋଗୀଙ୍କ ସେବା କରିବାକୁ ଡରୁଛନ୍ତି । ହେଲେ ମୋତେ ଏସବୁ ଡର ଲାଗୁନାହିଁ ବରଂ ଲୋକଙ୍କ ସେବା କରିବାରେ ଆନନ୍ଦ ମିଳୁଛି । ଗୋଟିଏ ଦିନରେ ଯେତେ ସମ୍ଭବ ଅଧିକ ଗାଁ ବୁଲି ସେ ଲୋକଙ୍କୁ ସେବା ଯୋଗାଇ ଦେବାକୁ ଚେଷ୍ଟା କରୁଛନ୍ତି । ହେଲେ ବୟସ ବଢିଯାଇଥିବାରୁ ଏବେ ସେ ରାତି ସୁଦ୍ଧା ଘରକୁ ଫେରି ଆସିଥିବା କହିଛନ୍ତି । ମୋର ଅଙ୍ଗପ୍ରତ୍ୟଙ୍ଗ କାମ କରୁଥିବା ଯାଏ ମୁଁ ଲୋକଙ୍କ ସେବା କରିବି ବୋଲି କହିଛନ୍ତି ଡାକ୍ତର ଦାନକର । ତାଙ୍କର ଏହି ଉତ୍ସର୍ଗିକୃତ ସେବାକୁ ନେଇ ଗ୍ରାମବାସୀ କୁହନ୍ତି ଡାକ୍ତର ଦାନକର ହେଉଛନ୍ତି ଆମପାଇଁ ଈଶ୍ୱର । ଯେତେବେଳେ ଯେଉଁ ମୁହୂର୍ତ୍ତରେ ମାତ୍ର ଗୋଟିଏ ଫୋନ କଲରେ ସେ ଆମ ପାଖରେ ପହଞ୍ଚିଯାଆନ୍ତି ବୋଲି କହିଛନ୍ତି ଗ୍ରାମବାସୀ ।
