ନୂଆପଡା ଅଫିସ,୧୯ା୯: ବର୍ତ୍ତମାନ ଜିଲାରେ ଚାଷ କାର୍ଯ୍ୟ ଧୂମଧାମରେ ଚାଲିଥିବାବେଳେ ୟୁରିଆ ସାର ଯୋଗାଣରେ ବିଳମ୍ବ ହୋଇଥିବାରୁ ଏହାରି ସୁଯୋଗ ନେଇ ଅସାଧୁ ବେପାରୀମାନେ କଳାବଜାରୀ କରି ମାଲାମାଲ ହେଉଥିବା ଅଭିଯୋଗ ହୋଇଛି। ଏହାକୁ ଭିତ୍ତି କରି ଜିଲାପାଳଙ୍କ ନିର୍ଦ୍ଦେଶକ୍ରମେ ବୁଧବାର ଜିଲା କୃଷି ବିଭାଗ ଚଢାଉ ଆରମ୍ଭ କରିଥିବାବେଳେ ଲୋକଙ୍କ ପାଖରେ ସରକାରୀ ସାର କେତେଦୂର ପହଞ୍ଚତ୍ପାରୁଛି ତାକୁ ନିଶ୍ଚିତ କରିଥିଲେ।
ସୂଚନାଯୋଗ୍ୟ ଯେ, ଜିଲାରେ ୯ ହଜାର ମେଟ୍ରିକ ଟନ ୟୁରିଆ ସାର ଆବଶ୍ୟକ ଥିବାବେଳେ ବର୍ତ୍ତମାନ ସୁଦ୍ଧା ୪ ହଜାର ମେଟ୍ରିକ ଟନ ଯୋଗାଣ ହୋଇଥିଲା । ବର୍ତ୍ତମାନ ପରିସ୍ଥିତିରେ ଧାନ ଗଛ ବଢିଚାଲିଥିବାବେଳେ ଆଗକୁ ଧାନ ଫଳିବାକୁ ଯାଉଛି । ଏଭଳି ପରିସ୍ଥିତିରେ ୟୁରିଆ ସାରର ଚାହିଦା ବଢିଯାଇଛି । ଠିକ ସମୟରେ ସାର ଯୋଗାଣ ହେଉ ନ ଥିବାରୁ କଳାବଜାରରେ ସାର ଚଢା ଦରରେ ବିକ୍ରି ଚାଲିଥିବା କୁହାଯାଉଛି । ଏହାକୁ ନେଇ ବିଭିନ୍ନ ମହଲରେ ଅଭିଯୋଗ ଆସିଛି । ଏହା ଉପରେ ଜିଲାପାଳ ଉପରିସ୍ଥ ବିଭାଗକୁ ଜଣାଇବା ପରେ ବୁଧବାର ୧୧୩୨ ମେଟ୍ରିକ ଟନ ଯୋଗାଣ ହୋଇଥିଲା । ଗୋଟିଏ ପଟେ ଏହି ସାରକୁ ବିଭିନ୍ନ ସେବା ସମବାୟ ସମିତିକୁ ପ୍ରେରଣ କରାଯାଇଛି । ଅନ୍ୟପଟେ ଜିଲା କୃଷି ବିଭାଗ ତରଫରୁ ଏକ ସ୍କ୍ବାଡ ଗଠନ କରାଯାଇଥିଲା । ଏଥିରେ ଜିଲା କୃଷି ଅଧିକାରୀ ଅଜୟ କୁମାର ସେନାପତି, ଉପ ପ୍ରକଳ୍ପ ଅଧିକାରୀ ସୁଧାଂଶୁ ଶେଖର ସାହୁ, ସହକାରୀ କୃଷି ଅଧିକାରୀ ହିମାଂଶୁ କୁମାର ମହାପାତ୍ର ପ୍ରମୁଖ ରହିଥିଲେ । ଅଧିକାରୀମାନେ ନୂଆପଡା ବ୍ଲକର ଜାମପାଣୀ, କୁଲିହାବନ୍ଧା, ବିଶୋରା, ବେଲଟୁକୁରୀ, ସାରାବଙ୍ଗ, ଖଡିଆରରୋଡର ବିଭିନ୍ନ ଦୋକାନ, ସେବା ସମବାୟ ସମିତିକୁ ବୁଲି ଦେଖିଥିଲେ। ପରିଦର୍ଶନବେଳେ ଚାଷୀମାନଙ୍କ ସହ ଆଲୋଚନା କରି ସେମାନେ କିପରି ସୁଲଭ ମୂଲ୍ୟରେ ଠିକ ସମୟରେ ପାଇପାରିବେ ସେ ଉପରେ ଗୁରୁତ୍ୱ ଦେଇଥିଲେ । ଏହିଭଳି ଚଢାଉ ଆଗକୁ ଜାରି ରହିବ ବୋଲି ବିଭାଗ ସୂତ୍ରରୁ ପ୍ରକାଶ ।