ପାଟନା, ୭।୫ : ବିହାରର ଉତ୍ତର-ପୂର୍ବ ଭାଗକୁ ମିଥିଲାଞ୍ଚଳରେ କୋସି ନଦୀ ସବୁଠାରୁ ବିନାଶକାରୀ ନଦୀ ଭାବରେ ଜଣାଶୁଣା । କୋସିକୁ ବିହାରର ଦୁଃଖ ବୋଲି ମଧ୍ୟ କୁହାଯାଏ। ଏବେ କୋସି ନଦୀ ଉପରେ ପୁଣି ୮୮ ବର୍ଷ ପରେ ଟ୍ରେନ୍ ଚଳାଚଳ କରିଛି। ୧୯୩୪ ପର୍ଯ୍ୟନ୍ତ କୋସି ନଦୀ ଉପରେ ଥିବା ପୋଲି ଉପରେ ଟ୍ରେନ୍ ଚଳାଚଳ କରୁଥିଲା। ୧୯୩୪ରେ ହୋଇଥିବା ଭୂକମ୍ପରେ ପୋଲଟି ନଷ୍ଟ ହୋଇଯାଇଥିଲା।
ଏହି ପୋଲ ମଧୁବାଣୀ-ସୁପାଲ-ଦରଭଙ୍ଗା ପରି ସହରଗୁଡ଼ିକ ମଧ୍ୟରେ ଯୋଗାଯୋଗ କରୁଥିଲା। ଏବେ ୮୮ ବର୍ଷ ପରେ ୨୦୨୨ ମେ’ ୭ରେ କୋସି ନଦୀ ଉପରେ ନିର୍ମିତ ହୋଇଥିବା ପୋଲରେ ଟ୍ରେନ୍ ସେବା ଆରମ୍ଭ ହୋଇଛି। ଭିଡିଓ କନଫରେନ୍ସିଂ ମାଧ୍ୟମରେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏହାର ଶୁଭାରମ୍ଭ କରିଛନ୍ତି। ଏହା ଦ୍ୱାରା ମଧୁବାନୀ-ସୁପାଲ ମଧ୍ୟରେ ଦୂରତା ୧୦୦ କିଲୋମିଟର ହ୍ରାସ ପାଇବ।
ଏହା ମାଧ୍ୟମରେ ମଧୁବାଣୀ ଜିଲାର ଜାନଜପୁର ରେଳ ଷ୍ଟେଶନରୁ ନିରମାଲି ରେଳ ଷ୍ଟେଶନ ଏବଂ ନିରମାଲିରୁ ଆସାନପୁର କୁପାହା ପର୍ଯ୍ୟନ୍ତ ଟ୍ରେନ ଚଳାଚଳ କରିବ। ସେପ୍ଟେମ୍ବର ୨୦୨୦ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୋସି ରେଳ ବ୍ରିଜର ଲୋକାର୍ପଣ କରିଥିଲେ। ଏହାପୂର୍ବରୁ ବହୁ ସରକାର ଦେଶକୁ ଆସିଥିଲେ ମଧ୍ୟ କେବଳ ମୋଦି ସରକାର ଏହି ପ୍ରକଳ୍ପ ଶେଷ କରିବାରେ ସଫଳ ହୋଇଥିଲେ।
ଏବେ ଏହା ମଧ୍ୟ ଦେଇ ଦରଭଙ୍ଗା ଜିଲାର ଲାହେରିଆସାରାଇ ଷ୍ଟେଶନରୁ ଜାନଜପୁର ଦେଇ ସାହାରା ପର୍ଯ୍ୟନ୍ତ ରେଳ ସେବା ସମ୍ପୂର୍ଣ୍ଣ ରୂପେ ପୁନରୁଦ୍ଧାର ହେବ। ଦୈନିକ ୩ ଯୋଡ଼ା ଯାତ୍ରୀବାହୀ ଟ୍ରେନ ଚଳାଚଳ କରିବ। ଏହି ଟ୍ରେନ ଗୁଡିକ ଲାହରିୟାସରାଇରୁ ସାହାରାକୁ ଦରଭଙ୍ଗା, ସାକ୍ରି, ଜାନଜପୁର,ତୈମୁରିଆ, ନିରମାଲି, ସରିଗର ଏବଂ ସୁପାଲ ଦେଇ ଚଳାଚଳ କରିବ।