ନୂଆଦିଲ୍ଲୀ,୧୭ା୫: ୨୦୨୧-୨୨ ଆର୍ଥିକବର୍ଷରେ ଆଞ୍ଚଳିକ ଦଳଗୁଡ଼ିକ ଅଜଣା ସୂତ୍ରରୁ ୮୮୭.୫୫ କୋଟି ଟଙ୍କା ଆୟ କରିଛନ୍ତି, ଯାହାକି ସେମାନଙ୍କ ମୋଟ ଆୟର ୭୬% ବୋଲି ଆସୋସିଏଶନ୍ ଅଫ୍ ଡେମୋକ୍ରାଟିକ୍ ରିଫର୍ମ (ଏଡିଆର୍) ପକ୍ଷରୁ ସୂଚନା ଦିଆଯାଇଛି।
ନିର୍ବାଚନୀ ସଂସ୍କାର କ୍ଷେତ୍ରରେ କାର୍ଯ୍ୟରତ ଏଡିଆର୍ ଏହାର ରିପୋର୍ଟରେ ଦର୍ଶାଇଛି ଯେ, ୨୦୨୦-୨୧ରେ ଆଞ୍ଚଳିକ ଦଳଗୁଡ଼ିକର ଆୟ ୫୩୦.୭୦ କୋଟି ଟଙ୍କା ଥିଲା। ସେଥିରୁ ୨୬୩.୯୩ କୋଟି ଅର୍ଥାତ୍ ୪୯.୭୩% ଅଜ୍ଞାତ ଉତ୍ସରୁ ଆସିଥିଲା। ୨୦୨୧-୨୨ରେ ଏହା ୮୮୭.୫୫ କୋଟି ଟଙ୍କାକୁ ବୃଦ୍ଧି ପାଇଛି। ରିପୋର୍ଟ ଅନୁସାରେ ୨୦,୦୦୦ କୋଟି ଟଙ୍କାରୁ ଊର୍ଦ୍ଧ୍ୱ ଚାନ୍ଦାକୁ ‘ଜ୍ଞାତ ଉତ୍ସ’ରୁ ଆସିଥିବା ଧରାଯାଏ। ଏତେ ପରିମାଣର ଚାନ୍ଦା ଦେଇଥିବା ବ୍ୟକ୍ତିଙ୍କ ସମ୍ପର୍କରେ ବିବରଣୀକୁ ଦଳଗୁଡ଼ିକ ଭାରତର ନିର୍ବାଚନ କମିଶନ (ଇସିଆଇ)ଙ୍କ ନିକଟରେ ଦାଖଲ କଣ୍ଟ୍ରିବ୍ୟୁଶନ୍ ରିପୋଟର୍ସରେ ଉଲ୍ଲେଖ କରିଥାଆନ୍ତି। ଅନ୍ୟପକ୍ଷେ ଦଳଗୁଡ଼ିକ ନିଜର ବାର୍ଷିକ ଅଡିଟ୍ ରିପୋର୍ଟରେ ଆୟର ଯେଉଁ ସୂତ୍ର ସମ୍ପର୍କରେ ସୂଚନା ଦେଇ ନ ଥାଆନ୍ତି, ତାକୁ ‘ଅଜଣା ଉତ୍ସ’ ବୋଲି ବିବେଚନା କରାଯାଏ। ଇଲେକ୍ଟୋରାଲ ବଣ୍ଡ୍ ଜରିଆରେ ୨୦,୦୦୦ ଟଙ୍କାରୁ କମ୍ ଚାନ୍ଦା ଦେଇଥିବା ବ୍ୟକ୍ତି ବା ସଙ୍ଗଠନର ନାମ ପ୍ରଘଟ କରିବାକୁ ବାଧ୍ୟ ନୁହନ୍ତି। ଏଡିଆର୍ କହିଛି, ଏଭଳି ଅଜଣା ଉତ୍ସ ମଧ୍ୟରେ ଇଲେକ୍ଟୋରାଲ ବଣ୍ଡ୍, କୁପନ୍ ବିକ୍ରି, ରିଲିଫ୍ ପାଣ୍ଠି, ବିବିଧ ଆୟ ଓ ସଭାରୁ ସଂଗୃହୀତ ଅର୍ଥ ଅନ୍ତର୍ଭୁକ୍ତ। ଏପରି ସ୍ବେଚ୍ଛାକୃତ ଦାନ ସମ୍ପର୍କିତ ତଥ୍ୟ ସାର୍ବଜନୀନ କରାଯାଇ ନ ଥାଏ। ଏଡିଆର୍ ଆହୁରି କହିଛି ଯେ ରାଜନୈତିକ ଦଳଗୁଡ଼ିକ ଅଜଣା ଉତ୍ସରୁ ୮୮୭.୫୫ କୋଟି ଟଙ୍କା ପାଇଛନ୍ତି, ଯାହାକି ସେମାନଙ୍କ ମୋଟ ଆୟର ୭୬.୧୫%। ୮୮୭.୫୫ କୋଟିରୁ ୯୩.୨୬% ଅର୍ଥାତ୍ ୮୨୭.୭୬ କୋଟି ଟଙ୍କା ଇଲେକ୍ଟୋରାଲ ବଣ୍ଡ୍ରୁ ଆସିଛି। ୨୭ଟିି ଆଞ୍ଚଳିକ ଦଳ କୁପନ୍ ବିକ୍ରିରୁ ୪.୩୨% (୩୮.୩୫ କୋଟି), ସ୍ବେଚ୍ଛାକୃତ ଦାନ(୨୦,୦୦୦ରୁ କମ୍) ୨.୪୦% (୨୧.୨୯ କୋଟି ଟଙ୍କା) ପାଇଛନ୍ତି। ପ୍ରାରମ୍ଭରେ ୫୪ଟି ଆଞ୍ଚଳିକ (ସ୍ବୀକୃତିପ୍ରାପ୍ତ) ଦଳକୁ ବିଶ୍ଳେଷଣରେ ସାମିଲ କରାଯାଇଥିଲା। ତେବେ ସେଗୁଡ଼ିକ ମଧ୍ୟରୁ ୨୮ଟି ଦଳ ନିଜ ବାର୍ଷିକ ସମୀକ୍ଷା ରିପୋର୍ଟ ଦାଖଲ କରିଛନ୍ତି। ଅବଶିଷ୍ଟ ଦଳଗୁଡ଼ିକ ୨ଟି ରିପୋର୍ଟ ମଧ୍ୟରୁ ଗୋଟିଏ ଲେଖାଏ ଦାଖଲ କରିଛନ୍ତି। ୨୦୨୧-୨୨ରେ ୨୭ ଆଞ୍ଚଳିକ ଦଳର ମୋଟ ଆୟ ୧,୧୬୫.୫୮ କୋଟି ଟଙ୍କା ଥିଲା। ସେଥିରୁ ୧୨.୪୮% ଅର୍ଥାତ୍ ୧୪୫.୪୨ କୋଟି ଟଙ୍କା ଅଜ୍ଞାତ ସୂତ୍ରରୁ ମିଳିଥିଲା। ସଦସ୍ୟତା ସଂଗ୍ରହ, ବ୍ୟାଙ୍କ ସୁଧ ଓ ମୁଦ୍ରିତ ସାମଗ୍ରୀ ବିକ୍ରି ଭଳି ଅନ୍ୟାନ୍ୟ ଉତ୍ସରୁ ଦଳଗୁଡ଼ିକ ୧୩୨.୬୧ କୋଟି ଟଙ୍କା (୧୧.୩୮%) ପାଇଛନ୍ତି।