ଭୁବନେଶ୍ୱର, ୭।୮(ଅନୁରାଧା ମହାରଣା): ଗତ ୫ ଆର୍ଥିକ ବର୍ଷରେ ବ୍ୟାଙ୍କଗୁଡ଼ିକ ୯.୯୦ ଟ୍ରିଲିଅନ ଟଙ୍କା ମୂଲ୍ୟର ଋଣ ଛାଡ଼ କରିଛନ୍ତି। ମନ୍ତ୍ରୀ ପଙ୍କଜ ଚୌଧୁରୀ ରାଜ୍ୟ ସଭାରେ ଏକ ଲିଖିତ ଉତ୍ତରରେ କହିଛନ୍ତି, ୨୦୨୩-୨୪ ମଧ୍ୟରେ ବ୍ୟାଙ୍କଗୁଡିକ ଦ୍ୱାରା ଋଣ ଛାଡ଼ ୧.୭୦ ଟ୍ରିଲିଅନ ଟଙ୍କା ରହିଛି ଯାହା ପୂର୍ବ ଆର୍ଥିକ ବର୍ଷରେ ୨.୦୮ ଟ୍ରିଲିଅନ ଥିଲା। ୨୦୧୯-୨୦ ମଧ୍ୟରେ ସର୍ବାଧିକ ୨.୩୪ ଟ୍ରିଲିଅନ ଟଙ୍କା ୬ର ଛାଡ଼ ଥିଲା। ଏହା ପରବର୍ତ୍ତୀ ବର୍ଷ ୨.୦୨ ଟ୍ରିଲିଅନ ଏବଂ ୨୦୨୧-୨୨ରେ ୧.୭୪ ଟ୍ରିଲିଅନ ଟଙ୍କାକୁ ହ୍ରାସ ପାଇଥିଲା। ବ୍ୟାଙ୍କଗୁଡିକର ବୋର୍ଡ ଦ୍ୱାରା ଅନୁମୋଦିତ ଆର୍ବିଆଇ ନିର୍ଦ୍ଦେଶାବଳୀ ଏବଂ ନୀତି ଅନୁଯାୟୀ, ୪ ବର୍ଷ ପୂରଣ ହେବା ପରେ ଏନ୍ପିଏଗୁଡିକ ଋଣ ଛାଡ଼ ଜରିଆରେ ସମ୍ପୃକ୍ତ ବ୍ୟାଙ୍କର ବାଲାନ୍ସ ଶିଟ୍ରୁ ହଟାଇ ଦିଆଯାଇଛି। କଂଗ୍ରେସ ସଭ୍ୟ ରଣଦୀପ୍ ସୂର୍ଯ୍ୟେୱାଲା ପଚାରିଥିବା ପ୍ରଶ୍ନର ଉତ୍ତରରେ ମନ୍ତ୍ରୀ ଏହି ଉତ୍ତର ରଖିଛନ୍ତି। ସେ କହିଛନ୍ତି, ଋଣପରିଶୋଧକାରୀମାନେ ଋଣ ପରିଶୋଧ ପାଇଁ ଦାୟୀ ଅଟନ୍ତି ଏବଂ ବ୍ୟାଙ୍କଗୁଡିକ ସେମାନଙ୍କ ନିକଟରେ ଉପଲବ୍ଧ ବିଭିନ୍ନ ପୁନରୁଦ୍ଧାର ପ୍ରଣାଳୀ ମାଧ୍ୟମରେ ରାଇଟ୍ ଅଫ୍ ଆକାଉଣ୍ଟରେ ଆରମ୍ଭ ହୋଇଥିବା ପୁନରୁଦ୍ଧାର କାର୍ଯ୍ୟ ଜାରି ରଖିଛନ୍ତି। ଗତ ୫ ବର୍ଷ ମଧ୍ୟରେ ୯.୯ ଟ୍ରିଲିଅନ ଟଙ୍କା ରାଇଟ୍ ଅଫ ତୁଳନାରେ, ପୁନରୁଦ୍ଧାର ୧.୮୪ ଟ୍ରିଲିଅନ ଟଙ୍କା ବା ମୋଟ ରାଇଟ୍ ଅଫ୍ ୧୮ ପ୍ରତିଶତ ଥିଲା। ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ତଥ୍ୟ ଅନୁଯାୟୀ, ୨୦୨୦ ମାର୍ଚ୍ଚ ୩୧ ସୁଦ୍ଧା ଧାର୍ଯ୍ୟ ବାଣିଜି୍ୟକ ବ୍ୟାଙ୍କ (ଏସ୍ସିବି)ର ମୋଟ ଏନ୍ପିଏ (ଜିଏନ୍ପିଏ) ୮,୯୬,୦୮୨ କୋଟି ଟଙ୍କା (ଜିଏନ୍ପିଏ ଅନୁପାତ ୮.୨୧ ପ୍ରତିଶତ) ରହିଥିଲା। ୨୦୨୧ ମାର୍ଚ୍ଚ ୩୧ ସୁଦ୍ଧା ୭,୩୫,୦୫୧ କୋଟି ଟଙ୍କା (ଜିଏନ୍ପିଏ ଅନୁପାତ ୭.୩୩ ପ୍ରତିଶତ), ୨୦୨୨ ସୁଦ୍ଧା ୭,୪୨,୩୯୭ କୋଟି ଟଙ୍କା (ଜିଏନ୍ପିଏ ଅନୁପାତ ୫.୮୨ ପ୍ରତିଶତ), ୨୦୨୩ ସୁଦ୍ଧା ଏହା ୫,୭୧,୫୪୪ କୋଟି ଟଙ୍କା (ଜିଏନ୍ପିଏ ଅନୁପାତ ୩.୮୭ ପ୍ରତିଶତ) ଏବଂ ୨୦୨୪ ସୁଦ୍ଧା ୪,୮୦,୬୮୭ କୋଟି (ଜିଏନ୍ପିଏ ଅନୁପାତ ୨.୭୫ ପ୍ରତିଶତ)କୁ ହ୍ରାସ ପାଇଛି। ସେ କହିଛନ୍ତି, ଏହା ସୂଚାଉଛି ଯେ ଗତ ୫ ବର୍ଷ ମଧ୍ୟରେ ଏସ୍ସିବିରେ ଗ୍ରସ୍ ଏନ୍ପିଏ ହ୍ରାସ ପାଉଛି। ଅନ୍ୟ ଏକ ପ୍ରଶ୍ନର ଉତ୍ତରରେ ଚୌଧୁରୀ କହିଛନ୍ତି, ଅନ୍ୟ ବୈଶ୍ୱିକ ଆର୍ଥିକ ପ୍ରତିଷ୍ଠାନଗୁଡିକ ସହିତ ଜଡିତ ସଙ୍କଟ ଯୋଗୁ ଭାରତୀୟ ବ୍ୟାଙ୍କିଙ୍ଗ୍ କ୍ଷେତ୍ର ବିଶେଷ ପ୍ରଭାବିତ ହୋଇନାହିଁ। ଭାରତୀୟ ବ୍ୟାଙ୍କଗୁଡିକର ଲିକ୍ୟୁଡିଟି କଭରେଜ ଅନୁପାତ (ଏଲ୍ସିଆର୍) ଜାନୁଆରୀ-ଜୁନ୍ ୨୦୨୪ ମଧ୍ୟରେ ଶତ ପ୍ରତିଶତ ନିୟାମକ ସୀମା ଅଧୀନରେ ୧୩୦ ପ୍ରତିଶତରୁ ଅଧିକ ରହିଥିଲା। ଏଥିସହ ସେ କହିଛନ୍ତି , ପ୍ରତିକୂଳ ମୂଲ୍ୟ ଗତିବିଧି କାରଣରୁ ଉତ୍ପନ୍ନ ବଜାର ବିପଦ ପାଇଁ ଭାରତୀୟ ବ୍ୟାଙ୍କଗୁଡିକର ନିବେଶ ପୋର୍ଟଫୋଲିଓ ମୁଖ୍ୟତଃ ସ୍ଥିର ରହିଥିବା ସେ କହିଛନ୍ତି। ସେ କହିଛନ୍ତି, ୨୦୧୭-୧୮ ମଧ୍ୟରେ ଏସ୍ସିବି ୩୨,୪୩୭ କୋଟି ଟଙ୍କା କ୍ଷତି ସହିଥିବାବେଳେ ୨୦୧୭-୨୪ ମଧ୍ୟରେ ସେମାନଙ୍କର ନେଟ୍ ଲାଭ ୩,୪୧,୬୭୨ କୋଟି ଟଙ୍କାକୁ ବୃଦ୍ଧି ପାଇଛି। ଏସ୍ସିବି ଗୁଡ଼ିକର ପୁଞ୍ଜି ଅନୁପାତ ୨୦୧୮ ସୁଦ୍ଧା ୧୩.୮୫ ପ୍ରତିଶତରୁ ୨୦୨୪ ସୁଦ୍ଧା ୧୬.୮୪ ପ୍ରତିଶତକୁ ବୃଦ୍ଧି ପାଇଛି।