ବାହାନଗା, ୪।୧(ଡି.ଏନ.ଏ.): ବାଲେଶ୍ୱର ଜିଲା ବାହାନଗା ବ୍ଲକ ଆରୁହାବାଡ ପଞ୍ଚାୟତ ରୂପଖଣ୍ଡ ଗ୍ରାମରେ ଥିବା ଗୋଚର ଜମି ଉପରେ ଏକ ରାସ୍ତାକୁ ଏକ ପରିବାର ପକ୍ଷରୁ ଅବରୋଧ କରି ରାସ୍ତା ମଝିରେ ବାଡ ଘେରି ଦେଇଛନ୍ତି। ଫଳରେ ୯ଟି ପରିବାର ଘରୁ ବାହାରି ପାରୁନାହାନ୍ତି।
ଗ୍ରାମର ଉତ୍ତର ସାହିର ଅସ୍ତିଆପୋଖରୀଠାରୁ ଲୋଚନ ମହାଳିକଙ୍କ ଘର ପର୍ଯ୍ୟନ୍ତ ଲାଗିଥିବା ଗୋଚର ଜମିରେ ଥିବା ରାସ୍ତାର ଦୁଇପାର୍ଶ୍ୱରେ ଥିବା ପୂର୍ଣ୍ଣଚନ୍ଦ୍ର ବେହେରାଙ୍କ ଘରୋଇ ଜମି ୧୧୯୮ ନଂ. ପ୍ଲଟ ଓ ଅନ୍ୟ ପଟେ ଥିବା ୧୧୯୬ନଂ. ପ୍ଲଟ ମଝିରେ ଯାଇଥିବା ୧୦ ଡିସିମିଲି ଗୋଚର ଜମିରେ ଥିବା ରାସ୍ତାକୁ ପୂର୍ଣ୍ଣଚନ୍ଦ୍ର ବେହେରାଙ୍କ ପୁଅ ଜବରଦସ୍ତ ରାସ୍ତାରେ ବାଡ ବସାଇ ଅବରୋଧ କରି ନିଜ ବାଡି ସହିତ ମିଶାଇ ଦେଇଛନ୍ତି। ଫଳରେ ଉତ୍ତରସାହି କଡରେ ଥିବା ୯ ପରିବାର ଲୋକମାନେ ଘରୁ ବାହାରି ପାରୁନାହାନ୍ତି। ଏନେଇ ୨୦୧୯ରେ ଯାତାୟାତ ପାଇଁ ସେହି ସ୍ଥାନରେ ଗଣ୍ଡଗୋଳ ହେବା ସହିତ ରାସ୍ତାକୁ ସେତେବେଳେ ସେହି ପରିବାର ଅବରୋଧ କରିଦେଇଥିଲେ। ମାତ୍ର ସାହି ବାସିନ୍ଦା ମୁଖ୍ୟମନ୍ତ୍ରୀଙ୍କଠାରେ ଅଭିଯୋଗ କରିବା ପରେ ସୋର ପୋଲିସ୍ , ମାଜିଷ୍ଟ୍ରେଟଙ୍କ ଉପସ୍ଥିତିରେ ଜମି ମପାଯାଇ ଅବରୋଧ ହଟାଯାଇଥିଲା। ୧୦ଡିସିମିଲି ଜମି ଉପରେ ପ୍ରଶାସନ ଲାଲ୍ ପତାକା ପୋତି ଚିହ୍ନଟ କରି ଗୋଚର ଜମିର ପ୍ଲଟ ନମ୍ବର ୬୯୮ କୁ ଅବରୋଧମୁକ୍ତ କରିଥିଲେ। ପୂର୍ଣ୍ଣଚନ୍ଦ୍ରଙ୍କ ପରିବାର ଲୋକେ ନିଜର ଜମି ବାବଦରେ ସିଭିଲ୍ କେସ୍ ଜିଲା ମାଜିଷ୍ଟ୍ରେଟ୍ଙ୍କଠାରେ ଏକ ପିଏଲ୍ଆଇ କରିଥିଲେ। ପରେ ବୃନ୍ଦାବନ ବେହେରା ଗୋଚର ଜମିରେ ଥିବା ରାସ୍ତାକୁ ଅବରୋଧ ହଟାଇବା ନିମନ୍ତେ ଡବ୍ଲ୍ୟୁପି(ସି) ନମ୍ବର ୫୫୨/୨୦ ରେ ଏକ ମାମଲା ରୁଜୁ କରିଥିଲେ। କୋର୍ଟଙ୍କ ନିର୍ଦ୍ଦେଶ ପରେ ଗତ ତା ୩୧ା୧୨ ା୨୦୨୨ ରିଖରେ ସରକାରୀ ଅମିନ ସମେତ ପ୍ରଶାସନ ଯାଇ ଗୋଚର ଜମିର ଥିବା ରାସ୍ତାକୁ ବିବାଦୀୟ ସ୍ଥାନରେ ମପାମପି କରି ୧୦କଡି ରାସ୍ତା ବାହାରିବାରୁ ପ୍ରଶାସନ ଗଲା ପରେ ସେଠାରେ କୌଣସି ଜମି ବାହାରି ନ ଥିବା ଦାବି କରି ପୁନର୍ବାର ପୂର୍ଣ୍ଣଚନ୍ଦ୍ରଙ୍କ ପରିବାର ଲୋକେ ଜବରଦସ୍ତ ରାସ୍ତା ମଝିରେ ବାଡଘେରି ଅବରୋଧ କରି ରଖିଛନ୍ତି। ଏ ବାବଦରେ ତହସିଲଦାର ରାଜେନ୍ଦ୍ର ନାରାୟଣ କର କହିଛନ୍ତି, ଅମିନ ଆରଆଇଙ୍କୁ ପଠାଇ ମପାମପି କରିବା ପରେ ବିବାଦୀୟ ସ୍ଥାନରେ ଗୋଚର ଜମି ରାସ୍ତା ୧୦କଡି ବାହାରିଛି ା ତେବେ ଅବରୋଧ ବିଷୟରେ ଉପଜିଲାପାଳଙ୍କଠାରୁ ଯାହା ନିର୍ଦ୍ଦେଶ ଆସିବା ପରେ ପରବର୍ତ୍ତୀ ପଦକ୍ଷେପ ନିଆଯିବ।