ଶ୍ରୀନଗର,୧୨।୧୨: ପ୍ରବଳ ତୁଷାରପାତ ଯୋଗୁ ଜମ୍ମୁ-କଶ୍ମୀରରେ ସ୍ଥିତି ଅସମ୍ଭାଳ ହେବାରେ ଲାଗିଛି। ଗତ ରାତିରୁ ଏଠାରେ ତୁଷାରପାତ ଜାରି ରହିଛି। ଏହାଯୋଗୁ ଡୋଡା ଜିଲାର କାଷ୍ଟିଗଡ଼ ଅଞ୍ଚଳର ଗୁରମୁଲ ଗାଁରେ ଭୂସ୍ଖଳନ ହୋଇଛି। ୮ ପରିବାରଙ୍କୁ ଉଦ୍ଧାରକାରୀ ଦଳ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଥିବା ଜିଲା ପ୍ରଶାସନ ପକ୍ଷରୁ କୁହାଯାଇଛି। ତୁଷାରପାତ ଯୋଗୁ ୨୭୦ କିମି ଦୀର୍ଘ ଜାତୀୟ ରାଜପଥକୁ ବନ୍ଦ କରି ଦିଆଯାଇଛି। ଜାତୀୟ ରାଜପଥର ଜବାହର ଟନେଲ ରାସ୍ତାରେ ୯ ଇଞ୍ଚର ବରଫ ଜମି ରହିଛି। ଏହା ସହିତ ମରୋଗ, ମଗେରକୋଟ ଏବଂ ପାନ୍ଥିୟାଲ ଆଦି ଅଞ୍ଚଳରେ ଭୂସ୍ଖଳନ ହୋଇଛି। ପାନ୍ଥିୟାଲ ଅଞ୍ଚଳରେ ପାହାଡ଼ରୁ ଲଗାତାର ପଥର ଖସିବା ଜାରି ରହିଥିବା କୁହାଯାଉଛି। ଜାତୀୟ ରାଜପଥରେ ଟ୍ରକ୍, କାର୍, ବସ୍ ଆଦି ଅଟକି ରହିଛି। ରାସ୍ତାରେ ଜମି ରହିଥିବା ବରଫ ହଟାଯାଇ ପରିବହନ ତଥା ଯୋଗାଯୋଗ ବ୍ୟବସ୍ଥା ସ୍ବାଭାବିକ କରିବା ଲାଗି ଉଦ୍ୟମ ଅବ୍ୟାହତ ରହିଛି।
