ନୂଆଦିଲ୍ଲୀ,୧୪।୧୨ : କେନ୍ଦ୍ର ସ୍ବରାଷ୍ଟ୍ର ରାଷ୍ଟ୍ର ମନ୍ତ୍ରୀ ନିତ୍ୟାନନ୍ଦ ରାୟ ରାଜ୍ୟ ସଭାରେ ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। ସେ କହିଛନ୍ତି ଯେ ୨୦୨୦ ରୁ ୨୦୨୨ ଗତ ତିନିବର୍ଷ ମଧ୍ୟରେ ଜମ୍ମୁ-କଶ୍ମୀରରେ ୯ ଜଣ କଶ୍ମୀରୀ ପଣ୍ଡିତଙ୍କୁ ହତ୍ୟା କରାଯାଇଛି। ସେମାନଙ୍କ ମଧ୍ୟରେ କଶ୍ମୀରୀ ରାଜପୁତ ସମ୍ପ୍ରଦାୟର ଜଣେ ବ୍ୟକ୍ତି ଅଛନ୍ତି। ଏହା ବ୍ୟତୀତ ଅନ୍ୟ ଏକ ସୂଚନା ଦେଇ ମନ୍ତ୍ରୀ କହିଛନ୍ତି ଯେ ୨ ଡିସେମ୍ବର ୨୦୨୨ ପର୍ଯ୍ୟନ୍ତ ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) କୋଏମ୍ବାଟୁର ବିସ୍ଫୋରଣ ମାମଲା ସହିତ ୪୯୭ ଟି ମାମଲା ରୁଜୁ କରିଛି।
ଅନ୍ୟ ଏକ ଗୁରୁତ୍ୱପୂର୍ଣ୍ଣ ବିବରଣୀ ଦେଇ ସେ କହିଛନ୍ତି ଯେ ଏନସିବି ଗତ ବର୍ଷ କେରଳର ବନ୍ଦରରୁ ୧,୨୭୪ କୋଟି ଟଙ୍କା ମୂଲ୍ୟର ୬୩୭ କିଲୋଗ୍ରାମ ହେରୋଇନ ଜବତ କରିଥିଲା। ଏହି ଘଟଣାରେ ୧୧ ଜଣ ବିଦେଶୀଙ୍କୁ ଗିରଫ କରାଯାଇଥିଲା।
ସିବିଆଇ ତଦନ୍ତ ସମ୍ପର୍କରେ କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂ ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି। କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂ ବୁଧବାର କହିଛନ୍ତି ଯେ ତେଲେଙ୍ଗାନା ଏବଂ ମେଘାଳୟ ସମେତ ନଅଟି ରାଜ୍ୟ କେତେକ ଅପରାଧର ତଦନ୍ତ ପାଇଁ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋକୁ ଦିଆଯାଇଥିବା ସାଧାରଣ ସମ୍ମତି ପ୍ରତ୍ୟାହାର କରି ନେଇଛନ୍ତି। ଦିଲ୍ଲୀର ସ୍ପେଶାଲ ପୋଲିସ ଏଷ୍ଟାବ୍ଲିସମେଣ୍ଟ (ଡିଏସପିଏ) ଅଧିନିୟମ, ୧୯୪୬ର ଧାରା ୬ ଅନୁଯାୟୀ ସିବିଆଇ ଏହାର ଅଧିକାର ଅଧୀନରେ ଅନୁସନ୍ଧାନ କରିବା ପାଇଁ ସମ୍ପୃକ୍ତ ରାଜ୍ୟ ସରକାରଙ୍କ ସହମତି ଆବଶ୍ୟକ ବୋଲି ସେ ଲୋକ ସଭାରେ ଏକ ଲିଖିତ ପ୍ରଶ୍ନର ଉତ୍ତରରେ କହିଛନ୍ତି।