ମାର୍ଶାଘାଇ,୨୮ା୧(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମାର୍ଶାଘାଇ ଥାନା ଅନ୍ତର୍ଗତ ଲୁଣା ବିଦ୍ୟୁତ୍ ବିଭାଗ କାର୍ଯ୍ୟାଳୟ ପରିସରରୁ ଗତ ୨୦ ତାରିଖ ବିଳମ୍ବିତ ରାତିରେ ହୋଇଥିବା ଡକାୟତି ଘଟଣାରେ ୬ ଜଣଙ୍କୁ ପୋଲିସ ଗିରଫ କରିଛି। ସେମାନଙ୍କଠାରୁ ବିପୁଳ ପରିମାଣର ବିଦ୍ୟୁତ୍ ତାର ଜବତ ସହ ୯ଟି ଅଷ୍ଟଧାତୁ ମୂର୍ତ୍ତି ଜବତ କରାଯାଇଛି ବୋଲି କେନ୍ଦ୍ରାପଡ଼ା ଏସ୍ଡିପିଓ ଜୟନ୍ତ କୁମାର ମହାପାତ୍ର ଥାନା ପରିସରରେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଗିରଫ ଅଭିଯୁକ୍ତମାନେ ହେଲେ ଯାଜପୁର ଜିଲା ବ୍ରହ୍ମବରଦା ଥାନା ଅନ୍ତର୍ଗତ କୁନ୍ଦପାଟଣା ଗଁାର ନାରାୟଣ ସାହୁ, କଟକ ଜିଲା କିଶନନଗର ଥାନା ଅନ୍ତର୍ଗତ ମହମ୍ମଦପୁର ଗଁାର ଜ୍ୟୋତି ପ୍ରକାଶ ବେହେରା ଓରଫ ସିମ୍ପା, କଟକ ଜିଲା ଟାଙ୍ଗୀ ଥାନା ଅନ୍ତର୍ଗତ ଭଟିମୁଣ୍ଡା ଗଁାର ହେମନ୍ତ ନାୟକ, ଅନିଲ ସାହୁ, କଟକ ଜିଲା ନେମାଳ ଥାନା ଅନ୍ତର୍ଗତ ବାଇନପଡା ଗଁାର ଦେବେନ୍ଦ୍ର ନାୟକ ଓରଫ ସୋନୁ, କଟକ ଜିଲା ନେମାଳ ଥାନା ଅନ୍ତର୍ଗତ ଛପଚିକଣା ଗଁାର ସଂଗ୍ରାମ ରାଉଳ ଓରଫ କୁନା। ଏସ୍ଡିପିଓ ମହାପାତ୍ର କହିଥିଲେ ଯେ, ଅଭିଯୁକ୍ତ ସିମ୍ପା ୧୦ରୁ ୧୫ଜଣ ଅପରାଧୀଙ୍କୁ ସାଙ୍ଗରେ ଧରି ଗୋଟିଏ ପିକ୍ଅପ୍ ଭ୍ୟାନ, ଗୋଟିଏ ଟାଟା ଏସିଇ ଓ ଗୋଟିଏ ହୋଣ୍ଡା ଆମେଜ କାର ଆଣି ଲୁଣା ବିଦ୍ୟୁତ୍ କାର୍ଯ୍ୟାଳୟ ପରିସରରେ ପଶି ୨ଜଣ କଣ୍ଟ୍ରୋଲ ରୁମ୍ ଅପରେଟରଙ୍କୁ ଭୟଭୀତ କରି ଆଲୁମିନିୟମ, ତମ୍ବା ତାର ଓ ଅନ୍ୟ ଯନ୍ତ୍ରାଂଶ ଲୁଟି ନେଇଥିଲେ। ବିଦ୍ୟୁତ ବିଭାଗ ପକ୍ଷରୁ ଥାନାରେ ଅଭିଯୋଗ ପରେ କେନ୍ଦ୍ରାପଡ଼ା ଏସ୍ପିଙ୍କ ନିର୍ଦ୍ଦେଶରେ ଏସ୍ଡିପିଓ ମହାପାତ୍ର, ମାର୍ଶାଘାଇ ଥାନା ଅଧିକାରୀ, ପାଟକୁରା ଥାନା ଅଧିକାରୀ, କୁଦାନଗରୀ ଥାନା, କେନ୍ଦ୍ରାପଡ଼ା ସ୍ପେଶାଲ ସ୍କ୍ବାଡ୍ ଓ ଘଟଣାର ତଦନ୍ତକାରୀ ଅଧିକାରୀ ବିଜୟ ଖଟୁଆଙ୍କୁ ନେଇ ଏକ ଟିମ୍ ଘଟଣାର ତଦନ୍ତ କରିଥିଲେ ବିଶ୍ୱସ୍ତ ସୂତ୍ରରୁ ଖବରପାଇ ହୋଣ୍ଡା ଆମେଜ କାରକୁ ଜବତ କରିବା ପରେ ସମସ୍ତ ଘଟଣାର ପର୍ଦ୍ଦାଫାଶ୍ ହେବା ସହ ଅଭିଯୁକ୍ତମାନଙ୍କୁ ଗିରଫ କରାଯାଇଥିଲା। ଲୁଟ କରିଥିବା ବିଦ୍ୟୁତ୍ ତାରକୁ ସେମାନେ ଭଟିମୁଣ୍ଡାର ହେମନ୍ତ ଓ ଅନିଲଙ୍କୁ ୭୦ ହଜାର ଟଙ୍କାରେ ବିକ୍ରି କରି ନିଜ ଭିତରେ ବାଣ୍ଟି ନେଇଥିଲେ। ଅଭିଯୁକ୍ତମାନେ ଡିସେମ୍ବର ଶେଷ ସପ୍ତାହ ଓ ଜାନୁୟାରୀର ପ୍ରଥମ ସପ୍ତାହ ମଧ୍ୟରେ ଡେରାବିଶ ଥାନା ଅନ୍ତର୍ଗତ ଛତା ବିଦ୍ୟୁତ୍ କାର୍ଯ୍ୟାଳୟ, ନିକିରାଇ ଥାନା ଅନ୍ତର୍ଗତ ଇନ୍ଦୁପୁର ଓ ଧୂମାତ, କେନ୍ଦ୍ରାପଡ଼ା ଟାଉନ ଥାନା ଅନ୍ତର୍ଗତ ଚକଡା, ମାହାଙ୍ଗା ଥାନା ଭଦ୍ରେଶ୍ୱର ଅଞ୍ଚଳରୁ ମଧ୍ୟ ବିଦ୍ୟୁତ୍ ତାର ଚୋରି କରିଥିଲେ ବୋଲି ଏସଡିପିଓ ମହାପାତ୍ର କହିଥିଲେ। ଅଭିଯୁକ୍ତମାନଙ୍କଠାରୁ ୩ଟି ବାଇକ୍, ଗୋଟିଏ କଟର ମେଶିନ, ଗୋଟିଏ ଓଜନ ମେଶିନ ଜବତ କରାଯାଇଛି। ଜବତ କରାଯାଇଥିବା ଆଲୁମିନିୟମ କଣ୍ଡକ୍ଟରର ଓଜନ ୫ ଟନ୍ ୧୧୦ କେଜି ହେବ ବୋଲି ସୂଚନା ପ୍ରଦାନ କରାଯାଇଛି। ଏମାନେ ଆନ୍ତଃ ଜିଲା ଡକାୟତି ଗ୍ୟାଙ୍ଗର ସଦସ୍ୟ ଅଟନ୍ତି। ଏ ନେଇ ଥାନାରେ ନଂ. ୩୫/୨୩ରେ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।