କାମାକ୍ଷାନଗର, ୧୪।୧୨(ଡି.ଏନ୍.ଏ.): ଜଣେ ମା’ ହୋଇ ବୁଝିଲେନି ଅନ୍ୟ ଜଣେ ମା’ର ମମତା। ଓଲଟି ପଡ଼ୋଶୀ ଭାବେ ଚଳୁଥିବା ମହିଳାଙ୍କ ଅସହାୟତାର ଫାଇଦା ନେଲେ। ତାଙ୍କର ୯ମାସର ଶିଶୁପୁତ୍ରକୁ ଘରୁ କୌଶଳକ୍ରମେ ଚୋରି କରିନେଇ ସଂଖ୍ୟାଲଘୁ ସମ୍ପ୍ରଦାୟର ଜଣେ ବ୍ୟକ୍ତିଙ୍କୁ ବିକ୍ରି କରିଦେଲେ। ଏଭଳି ଏକ ସମ୍ବେଦନଶୀଳ ଘଟଣାରେ ଶିଶୁର ମା’ ଥାନାର ଦ୍ୱାରସ୍ଥ ହେବା ପରେ ପୋଲିସ ଅଭିଯୁକ୍ତା ନଳିନୀ ଲୋହାର ଏବଂ ମିର୍ଜା ମଇଉଦ୍ଦିନ୍ ବେଗ୍ଙ୍କୁ ଗିରଫ କରିଛି। ତେବେ ଉଭୟେ ଥାନାରୁ ଜାମିନରେ ମୁକୁଳିଛନ୍ତି। ଢେଙ୍କାନାଳ ଜିଲା କାମାକ୍ଷାନଗର ଥାନା ଅଞ୍ଚଳରେ ସୋମବାର ଘଟିଥିବା ଏହି ଘଟଣାକୁ ନେଇ ଏବେ ସବୁଠି ଚର୍ଚ୍ଚା।
ପୋଲିସ ସୂଚନା ଅନୁଯାୟୀ, କାମାକ୍ଷାନଗର ଥାନା ଜିରିଡ଼ାମାଳି ବସ୍ତିର ଏକ ପରିତ୍ୟକ୍ତ ଘରେ ବିନୋଦ ପଧାନ, ସ୍ତ୍ରୀ ସାବିତ୍ରୀ ଏବଂ ନିଜର ୯ମାସର ଶିଶୁପୁତ୍ର ସହିତ ରହୁଛନ୍ତି। ଉକ୍ତ ଅଞ୍ଚଳରେ ଅନ୍ୟ କେତେଜଣ ଜରିଗୋଟାଳି, ଦିନମଜୁରିଆ ରହୁଥିବାବେଳେ ବିନୋଦଙ୍କ ଘର ପାଖକୁ ଲାଗି ଏକ ଝୁମ୍ପୁଡ଼ିରେ ନଳିନୀ ଲୋହାର ଓରଫ୍ ବୁଚୁ ନାମକ ଜଣେ ମହିଳା ସପରିବାର ରହୁଛନ୍ତି। ନଳିନୀଙ୍କ ସ୍ବାମୀ ଟିକିଲି ଏକ ଚୋରି ମାମଲାରେ ଗିରଫ ହୋଇ ଜେଲରେ ଥିବାବେଳେ ଉଭୟଙ୍କ ୩ବର୍ଷ, ୨ବର୍ଷ ଏବଂ ୩ ମାସର ସନ୍ତାନ ଅଛନ୍ତି। ମୁଣ୍ଡିଦେଉଳି ଅଞ୍ଚଳର ନିଃସନ୍ତାନ ମିର୍ଜା ଅନେକ ସମୟରେ ଉକ୍ତ ବସ୍ତିକୁ ଯିବାଆସିବା କରୁଥିଲେ। ବିବାହର ୩ବର୍ଷ ପରେ ତାଙ୍କର କୌଣସି ସନ୍ତାନ ହେଉ ନ ଥିଲା। ତେଣୁ ସେ ସାବିତ୍ରୀଙ୍କ ଶିଶୁପୁତ୍ର ଉପରେ ଆଖି ପକାଇବା ସହ ନଳିନୀଙ୍କ ସହ ମିଶି ଯୋଜନା କରିଥିଲେ। ନଳିନୀ ରବିବାର ମଧ୍ୟାହ୍ନରେ ସାବିତ୍ରୀଙ୍କ ପୁଅକୁ ଘରୁ ଚୋରି କରି ମିର୍ଜାଙ୍କୁ ବିକ୍ରି କରିଦେଇଥିଲେ। ଏଣେ ପୁଅକୁ ନ ପାଇ ସାବିତ୍ରୀ ବସ୍ତିବାସିନ୍ଦାଙ୍କ ସହ କାମାକ୍ଷାନଗର ଥାନାର ଦ୍ୱାରସ୍ଥ ହୋଇଥିଲେ। ପୋଲିସ ପଚରାଉଚୁରା ସମୟରେ ନଳିନୀ ସବୁ ସତ ମାନିଯାଇଥିଲେ। ଏପଟେ ଘଟଣା ପ୍ରଘଟ ହେବା ପରେ ମିର୍ଜା ଭୟଭୀତ ହୋଇପଡ଼ିଥିଲେ। ଶିଶୁପୁତ୍ରକୁ ଫେରାଇବାକୁ ନଳିନୀଙ୍କ ପାଖକୁ ଯିବା ବେଳେ ସେଠାେ0ର ଉପସ୍ଥିତ ପୋଲିସ ତାଙ୍କୁ ଗିରଫ କରିଥିଲା। ଏ ସମ୍ପର୍କରେ କାମାକ୍ଷାନଗର ଥାନାରେ ନଂ. ୪୩୬/୨୧, ଦଫା ୩୬୩ରେ ମାମଲା ରୁଜୁ ହୋଇଛି।
