କଟକ ଅଫିସ, ୨୩।୯:ରେଭେନ୍ଶା ବିଶ୍ୱବିଦ୍ୟାଳୟରେ ଗତ ୨୦ ତାରିଖରୁ ପିଜି ଏବଂ ୟୁଜିର ଶେଷ ସେମିଷ୍ଟର ପରୀକ୍ଷା ଆରମ୍ଭ ହୋଇଛି। ଛାତ୍ରୀଛାତ୍ରମାନେ ଘରେ ରହି ଅନ୍ଲାଇନରେ ପରୀକ୍ଷା ଦେଉଛନ୍ତି। ହେଲେ ପିଜିର ପ୍ରଥମ ସେମିଷ୍ଟର ବ୍ୟାକ ପେପର ପରୀକ୍ଷା ରେଜଲ୍ଟ ଏପର୍ଯ୍ୟନ୍ତ ପ୍ରକାଶ ପାଇନାହିଁ। ଯାହାକୁ ନେଇ ଏବେ ଛାତ୍ର ଅସନ୍ତୋଷ ବଢିବାରେ ଲାଗିଛି। ଏ ନେଇ କେତେଜଣ ଛାତ୍ରୀଛାତ୍ର ଉଚ୍ଚଶିକ୍ଷା ମନ୍ତ୍ରୀଙ୍କୁ ଟୁଇଟ୍ କରିଥିବା ଜଣାପଡ଼ିିଛି।
ଯେଉଁ ପିଜି ଛାତ୍ରୀଛାତ୍ରମାନେ ପ୍ରଥମ ସେମିଷ୍ଟର ପରୀକ୍ଷାରେ ଫେଲ ହୋଇଥିଲେ ସେମାନଙ୍କ ପାଇଁ ଗତ ଡିସେମ୍ବରରେ ବ୍ୟାକ୍ ପେପର ପରୀକ୍ଷା ହୋଇଥିଲା। ତେବେ ପରୀକ୍ଷା ସରିବାର ୯ମାସ ବିତିଯାଇଥିଲେ ମଧ୍ୟ ଅଦ୍ୟାବଧି ଫଳ ବାହାରି ନାହିଁ। ଗତ ସେପ୍ଟେମ୍ବର ୨୦ ତାରିଖରୁ ପିଜି ଶେଷବର୍ଷର ଛାତ୍ରୀଛାତ୍ରଙ୍କ ୪ର୍ଥ ସେମିଷ୍ଟର ପରୀକ୍ଷା ଆରମ୍ଭ ହୋଇଛି। ଏହା ଶେଷ ହେବା ପରେ ସେମାନଙ୍କର ଯେଉଁ ସେମିଷ୍ଟରରେ ବ୍ୟାକ ଲାଗିଛି ତା’ ପାଇଁ ପୁନଃ ଏକ ପରୀକ୍ଷା କରାଯିବ। ଏଥିପାଇଁ ଛାତ୍ରୀଛାତ୍ରଙ୍କୁ ବିଶ୍ୱବିଦ୍ୟାଳୟ ପକ୍ଷରୁ ଫର୍ମପୂରଣ କରିବାକୁ କୁହାଯାଇଛି। ବିଶ୍ୱବିଦ୍ୟାଳୟର କେତେକ ବିଭାଗର ପ୍ରଥମ ସେମିଷ୍ଟର ପରୀକ୍ଷାଫଳ ବାହାରି ନାହିଁ। ତେଣୁ ଛାତ୍ରୀଛାତ୍ର ଦ୍ୱନ୍ଦ୍ୱରେ ରହୁଛନ୍ତି। ସମସ୍ତ ବିଭାଗରେ ହୋଇଥିବା ସୋସିଆଲ ମିଡିଆ ଗ୍ରୁପରେ ବ୍ୟାକ ପରୀକ୍ଷା ପାଇଁ ଫର୍ମ ପୂରଣ କରିବାକୁ ସମ୍ପୃକ୍ତ ଅଧିକାରୀମାନେ କହୁଥିବା ବେଳେ ଏହାକୁ ଛାତ୍ରୀଛାତ୍ର ବିରୋଧ କରିଛନ୍ତି। ଛାତ୍ରୀଛାତ୍ରମାନେ କହିଛନ୍ତି, ବ୍ୟାକ ପେପର ପରୀକ୍ଷା ପାଇଁ ଡିସେମ୍ବରରେ ଫର୍ମ ପୂରଣ କରିଥିଲୁ ଏବଂ ଫି’ ଦେଇଥିଲୁ। ଏଯାଏ ଫଳ ବାହାରି ନାହିଁ। ପୁନଃ କିପରି ଫର୍ମ ପୂରଣ କରିବୁ ଓ ଫି ଦେବୁ ବୋଲି ସେମାନେ ପ୍ରଶ୍ନ କରିଛନ୍ତି। ଏହାକୁ ନେଇ କେତେଜଣ ଛାତ୍ରୀଛାତ୍ର ଉଚ୍ଚଶିକ୍ଷା ମନ୍ତ୍ରୀ ଅରୁଣ କୁମାର ସାହୁଙ୍କୁ ଟୁଇଟ୍ କରିଥିବା ଜଣାପଡ଼ିିଛି। ଶେଷ ସେମିଷ୍ଟର ଅକ୍ଟୋବର ୧୦ ସୁଦ୍ଧା ସରିବାକୁ ଥିବାବେଳେ ବିଶ୍ୱବିଦ୍ୟାଳୟ କରୋନା ଆଳରେ ଏପର୍ଯ୍ୟନ୍ତ ପରୀକ୍ଷାଫଳ ପ୍ରକାଶ କରୁନାହିଁ। ତେଣୁ ଛାତ୍ରୀଛାତ୍ର ଚିନ୍ତାରେ ପଡ଼ିଛନ୍ତି। ଏ ନେଇ ମୁଖ୍ୟ ପରୀକ୍ଷା ନିୟନ୍ତ୍ରକ ଡ. ସୁଦର୍ଶନ ମିଶ୍ରଙ୍କୁ ପଚାରିବାରୁ ତାଙ୍କ ପାଖରେ କୌଣସି ତଥ୍ୟ ନ ଥିବା କହିଛନ୍ତି। ଅନ୍ୟପକ୍ଷେ କୁଳପତି ପ୍ରଫେସର ଈଶାନ କୁମାର ପାତ୍ର କହିଛନ୍ତି ଯେ, କରୋନା ଯୋଗୁ ଶିକ୍ଷା କ୍ଷେତ୍ରରେ ସମସ୍ୟା ଦେଖାଦେଇଛି। ଯେଉଁଥିପାଇଁ ଫଳ ପ୍ରକାଶ ପାଇବାରେ ବିଳମ୍ବ ହେଉଛି। ତେବେ ଶୀଘ୍ର ଫଳ ପ୍ରକାଶ ଲାଗି ପଦକ୍ଷେପ ନିଆଯାଉଛି।