ଛତ୍ରପୁର,୧୬ା୯(ଡି.ଏନ୍.ଏ.): ଗଞ୍ଜାମ ଜିଲାରେ ଗତବର୍ଷ ଧାନ ଅମଳ ସମୟରେ ଅଦିନିଆ ବର୍ଷା ଫଳରେ ଅଧିକାଂଶ ଧାନ ଫସଲ ନଷ୍ଟ ହୋଇଯାଇଥିଲା। ଜିଲ୍ଲା ପ୍ରଶାସନ ପକ୍ଷରୁ ସର୍ଭେ କରି ରିପୋର୍ଟ ଦେବା ଫଳରେ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ମିଳିଥିଲା। କ୍ଷତିଗ୍ରସ୍ତ ଚାଷୀ ଲକ୍ଷାଧିକ ଟଙ୍କା ପ୍ରିମିୟମ୍ ଦେଇ ଫସଲ ବୀମା କରିଥିଲେ। କୃଷି, ରାଜସ୍ବ ଓ ଷ୍ଟାଟିଷ୍ଟକାଲ ବିଭାଗ ମିଳିତ ଭାବେ କ୍ରପ୍ କଟିଂ କରି ରିପୋର୍ଟ ଦେଇଥିଲେ। ମାତ୍ର ବୀମା କମ୍ପାନୀ ଚଞ୍ଚକତା କରି ସେଥିରୁ ଗଞ୍ଜାମ ଜିଲାର ୯ ପଞ୍ଚାୟତର କ୍ଷତିଗ୍ରସ୍ତ ଚଷୀଙ୍କୁ ଫସଲବୀମା ସହାୟତା ଦେଇନଥିବା ଋଷିକୁଲ୍ୟା ରୟତ ମହାସଭା ପକ୍ଷରୁ ଅଭିଯୋଗ ହୋଇଛି।
ମହାସଭା ପକ୍ଷରୁ ବାରମ୍ବାର କ୍ଷତିଗ୍ରସ୍ତ ଚାଷୀଙ୍କୁ ଫସଲ ବୀମା ସହାୟତା ଦେବା ପାଇଁ ଲିଖିତ ଭାବେ ଦାବିପତ୍ର ଦିଆଯାଇଥିଲା। ତଥାପି ଏପର୍ଯ୍ୟନ୍ତ ସେମାନଙ୍କୁ ଫସଲବୀମା ସହାୟତା ମିଳିନି। ଫସଲବୀମା ସହାୟତାରୁ ବାଦ୍ ପଡ଼ିଥିବା ପଞ୍ଚାୟତ ମଧ୍ୟରେ ଛତ୍ରପୁର ବ୍ଲକ୍ ବଡ଼ମାଧପୁର, ରଙ୍ଗେଇଲୁଣ୍ଡା ବ୍ଲକ୍ କେଳାଥି ଗାଁ, ଲୁଡ଼ିଗାଁ, ମାଣ୍ଡରାଜପୁର, ବୁଗୁଡ଼ା ବ୍ଲକ୍ର ଶଙ୍କୁରୁ ଓ କରଚୁଲୀ, ସାନଖେମୁଣ୍ଡି ବ୍ଲକ୍ର ଗାଙ୍ଗପୁର ଏବଂ କବିସୂର୍ଯ୍ୟନଗର ବ୍ଲକ୍ର ଆମ୍ବପୁଆ ଓ ନନ୍ଦିଆଗୁଡ଼ା ପଞ୍ଚାୟତ ରହିଛି। ଗୁରୁବାର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ମହାସଭା ପକ୍ଷରୁ ଏ ସମ୍ପର୍କରେ ସ୍ମାରକପତ୍ର ପ୍ରଦାନ କରାଯାଇଛି। ସ୍ମାରକପତ୍ର ପ୍ରଦାନ ବେଳେ ମହାସଭାର ସମ୍ପାଦକ ସିମାଞ୍ଚଳ ନାହାକ, ରମେଶ ଚନ୍ଦ୍ର କର, ଆର୍ ସହଦେବ ରେଡ୍ଡୀ, ଏସ୍ ଯୁଦ୍ଧିଷ୍ଠୀର ରେଡ୍ଡୀ, ଭାଗିରଥି ବେହେରା ପ୍ରମୁଖ ଉପସ୍ଥିତ ଥିଲେ।