ନୂଆଦିଲ୍ଲୀ,୧୩।୧୦ : କରୋନା ଭୂତାଣୁର ଓମିକ୍ରନ ଭାରିଆଣ୍ଟର ଦୁଇଟି ସବ୍ ଭାରିଆଣ୍ଟ ଚାଇନାରେ ପୁନର୍ବାର ସଂକ୍ରମଣ ବିସ୍ତାର କରିଛି। ଚାଇନାର ୫ରୁ ଅଧିକ ରାଜ୍ୟରେ ସଂକ୍ରମଣ ମାମଲାରେ ହଠାତ ବୃଦ୍ଧି ପାଇବାରେ ଲାଗିଛି।
ଏପରିସ୍ଥଳେ ଭାରତରେ ବର୍ତ୍ତମାନ ପର୍ଯ୍ୟନ୍ତ ଓମିକ୍ରନର ନଅଟି ସବ୍ ଭାରିଆଣ୍ଟ ଚିହ୍ନଟ କରାଯାଇଛି। ଯାହାର ସର୍ବାଧିକ ପ୍ରାଦୁର୍ଭାବ ରହିଛି, କିନ୍ତୁ ଚାଇନାରେ ମିଳୁଥିବା ଦୁଇଟି ସବ୍ ଭାରିଆଣ୍ଟ ଏଥିରେ ଅନ୍ତର୍ଭୁକ୍ତ ନୁହେଁ ବୋଲି ବିଶେଷଜ୍ଞ ସୂଚନା ପ୍ରଦାନ କରିଛନ୍ତି।
ଜେନୋମ କ୍ରମ ପାଇଁ ସେଟ ହୋଇଥିବା ଇନସାକୋଗ୍ ନେଟୱାର୍କର ଜଣେ ବରିଷ୍ଠ ବୈଜ୍ଞାନିକ କହିଛନ୍ତି ଯେ ଏପର୍ଯ୍ୟନ୍ତ ଓମିକ୍ରନର ବିଏ.୧, ବିଏ.୨, ବିଏ.୩, ବିଏ.୪, ବିଏ.୫, ବିଏ.୨.୯, ବିଏ.୧.୧୨.୧, ବିଏ,୨.୩.୮ ଏବଂ ବିଏ.୨.୭୩ ସବ୍ ଭାରିଆଣ୍ଟ ଗୁଡିକ ଭାରତରେ ମିଳିଛି। ତେବେ ଏସବୁ ଚାଇନାରେ ମିଳିଥିବା ବିଏଫ.୭ ଏବଂ ବିଏ.୫.୧.୭ ସହିତ ସମାନ ନୁହନ୍ତି। ଚାଇନାରେ ମିଳୁଥିବା ଉଭୟ ସବ୍ ଭାରିଆଣ୍ଟ ଗୁଡିକ ଅତ୍ୟଧିକ ସଂକ୍ରାମକ ଏବଂ ଦ୍ରୁତ ଗତିରେ ବ୍ୟାପିଥାଏ। ଏଥିମଧ୍ୟରୁ ସବଭାରିଆଣ୍ଟ ବିଏଫ୍.୭ ର ସର୍ବାଧିକ ସଂକ୍ରମଣ ସମ୍ଭାବନା ଥିବା ଜଣାଯାଇଛି ।
ବୈଜ୍ଞାନିକମାନେ କହିଛନ୍ତି ଯେ ଦେଶରେ ଚାଇନାର ନୂତନ ସବ-ଭାରିଆଣ୍ଟ ଚିହ୍ନଟ ହୋଇନାହିଁ, କିନ୍ତୁ ସରକାର ତୁରନ୍ତ ଏକ ସତର୍କ ସୂଚନା ଜାରି କରିବା ଉଚିତ ଏବଂ ବିଦେଶ ଯାତ୍ରା ଉପରେ ନଜର ରଖିବା ଜରୁରୀ। ଯଦି ଆମେ ଅତୀତର ଅଭିଜ୍ଞତା ଆଧାରରେ କଥାବାର୍ତ୍ତା କରୁ, ଏହା ଜରୁରୀ ନୁହେଁ ଯେ ଚାଇନାରେ ବ୍ୟାପିଥିବା ସମସ୍ତ ଭାରିଆଣ୍ଟ ଅନ୍ୟ ଦେଶରେ ମିଳିବ । ତେବେ ସତର୍କତା ଅବଲମ୍ବନ ଅପରିହାର୍ଯ୍ୟ।
