ଲକ୍ଷ୍ନୌ, ୧ା୮: ସ୍ବାଧୀନତା ସଂଗ୍ରାମୀ ଶହୀଦ ଭଗତ ସିଂଙ୍କ ଚରିତ୍ରରେ ଅଭିନୟ ପାଇଁ ପୂର୍ବାଭ୍ୟାସ କରିବାବେଳେ ସତସତିକା ଜୀବନ ହରାଇଛନ୍ତି ଜଣେ ୯ ବର୍ଷର ବାଳକ। ଅଗଷ୍ଟ ୧୫ ଉପଲକ୍ଷେ ନାଟକ ପାଇଁ ରିହର୍ସଲ କରିବା ସମୟରେ ଉତ୍ତରପ୍ରଦେଶ ବଦାୟୁଁ ବାବତ ଗ୍ରାମରେ ଗୁରୁବାର ଏଭଳି ଦୁଃଖଦ ଘଟଣା ଘଟିଛି। ମୃତକଙ୍କ ନାଁ ଶିବମ ବୋଲି ଜଣାପଡ଼ିଛି।
ସୂଚନା ଅନୁଯାୟୀ, ଶିବମ୍ ଏବଂ ତାଙ୍କ ସାଙ୍ଗମାନେ ସ୍ବାଧୀନତା ଦିବସରେ ଶହୀଦ ଭଗତ ସିଂ, ରାଜଗୁରୁ ଏବଂ ଶୁଖଦେବଙ୍କ ଜୀବନୀ ଉପରେ ନାଟକ ପରିବେଷଣ କରିବାକୁ ସ୍ଥିର କରିଥିଲେ। ଶିବମଙ୍କ ମା’ବାପା ଗୁରୁବାର କ୍ଷେତକୁ କାମ କରିବାକୁ ଯାଇଥିବାବେଳେ ସାଙ୍ଗମାନେ ତାଙ୍କ ଘରକୁ ନାଟକର ପୂର୍ବାଭ୍ୟାସ କରିବା ପାଇଁ ଆସିଥିଲେ। ଶେଷରେ ଫାଶୀ ଦୃଶ୍ୟ ଥିବାରୁ ଶିବମ୍ ଏକ ରଶି ବାନ୍ଧି ଫାଶକୁ ବେକରେ ଲଗାଇଥିଲେ। ହେଲେ ଦୁର୍ଭାଗ୍ୟବଶତଃ ଷ୍ଟୁଲ୍ରୁ ତାଙ୍କ ଗୋଡ଼ ଖସିଯାଇଥିଲା। ଶିବମ ନିଶ୍ୱାସପ୍ରଶ୍ୱାସ ନେଇ ନ ପାରି ଛଟପଟ ହେଉଥିଲେ ହେଁ ସେ ଅଭିନୟ କରୁଥିବା ସାଙ୍ଗମାନେ ଭାବିଥିଲେ। କିଛି ସମୟ ପରେ ଶିବମଙ୍କ ଶରୀର ନିସ୍ତେଜ ହୋଇଯିବା ପରେ ପିଲାମାନେ ଡରିଯାଇ ଗ୍ରାମବାସୀଙ୍କୁ ଜଣାଇଥିଲେ। ଲୋକେ ସେଠାରେ ପହଞ୍ଚିଲାବେଳକୁ ଶିବମଙ୍କ ମୃତ୍ୟୁ ଘଟିସାରିଥିଲା। ତେବେ ପୋଲିସକୁ ନ ଜଣାଇ ଘରଲୋକ ତାଙ୍କ ଶେଷକୃତ୍ୟ କରିଦେଇଛନ୍ତି। ଘଟଣାର ତଦନ୍ତ ଚାଲିଥିବା ପୋଲିସ କହିଛି। ଏକ ଅନୁରୂପ ଘଟଣାକ୍ରମରେ ଗତ ବର୍ଷ ମଧ୍ୟପ୍ରଦେଶର ଜଣେ ୧୨ ବର୍ଷୀୟ ବାଳକ ଭଗତ ସିଂଙ୍କ ଚରିତ୍ରରେ ଅଭିନୟ କରୁଥିବାବେଳେ ଦୁର୍ଘଟଣାବଶତଃ ଫାଶୀ ଲଗାଇଦେଇଥିଲେ। ଫଳରେ ତାଙ୍କର ମୃତ୍ୟୁ ଘଟିଥିଲା।
