ଲଣ୍ଡନ,୧୬ା୧୧: ସୁପରମାର୍କେଟଗୁଡ଼ିକରେ ବିକ୍ରି ହେଉଥିବା ୯୦ ପ୍ରତିଶତରୁ ଊର୍ଦ୍ଧ୍ୱ ମହୁ ଭେଜାଲ। ସେଥିରେ ଚିନିଶିରା ଭଳି ଶସ୍ତା ସିରପ୍ ମିଶାଯାଉଛି, ଯାହା ପ୍ରକୃତିର ଅମୃତକୁ ନକଲି କରିଦେଇଛି। ଠକମାନେ ଏଥିରୁ ଲାଭ ଉଠାଉଥିବାବେଳେ ମହୁମାଛି ଚାଷୀ ଏବଂ ଜୈବବିବିଧତାକୁ ମୂଲ୍ୟ ଦେବାକୁ ପଡ଼ୁଛି। ଗତ ମାସରେ ହନି ଅଥେଣ୍ଟିସିଟି ନେଟ୍ଓ୍ବର୍କ ଦ୍ୱାରା ମହୁର ଡିଏନ୍ଏ ପରୀକ୍ଷା କରାଯାଇଥିଲା। ବ୍ରିଟେନ୍ର ବୃହତ୍ ରିଟେଲରମାନେ ବିକ୍ରି କରୁଥିବା ମହୁ ବୋତଲରୁ ୯୦%ରୁ ଅଧିକ ଚିନିଶିରା ଭଳି ସାମଗ୍ରୀରେ ପୂରଣ ହୋଇଥିବା ଜଣାପଡ଼ିଥିଲା। ସ୍ଥାନୀୟ ବ୍ରିଟିଶ ମହୁମାଛି ଚାଷୀଙ୍କଠାରୁ ସଂଗୃହୀତ ସମସ୍ତ ୫ଟି ନମୁନା ସହ ବଜାର ମହୁ ମେଳ ଖାଇ ନଥିଲା।
ବ୍ରିଟେନ୍ରେ ବିକ୍ରି ହେଉଥିବା ମହୁ ଅସୁରକ୍ଷିତ ବୋଲି କୌଣସି ପ୍ରମାଣ ନ ଥିବାରୁ ଏଥିରେ ଜାଲିଆତି ସୁବିଧାଜନକ ବୋଲି ଖାଦ୍ୟ ଗୁଣବତ୍ତା ସଂସ୍ଥା (ଏଫ୍ଏସ୍ଏ) କହିଛି। ମୁଖ୍ୟତଃ ପ୍ରିମିୟମ ଲେବୁଲ କିମ୍ବା ଜଟିଳ ଯୋଗାଣ ଶୃଙ୍ଖଳା ଥିବା ଉତ୍ପାଦଗୁଡ଼ିକ ଠକମାନଙ୍କୁ ଆକର୍ଷିତ କରିଥାଏ। ସେମାନେ ଚାଉଳ, ବିଟ୍ କିମ୍ବା ଅନ୍ୟାନ୍ୟ ଶସ୍ୟରୁ ଶସ୍ତା ସିରପ୍ ପ୍ରସ୍ତୁତ କରି ଏହାକୁ ମହୁରେ ମିଶାଇଥାନ୍ତି। ଏହା ମହୁ ଭଳି ଦେଖାଯାଉଥିଲେ ମଧ୍ୟ ଏଥିରେ ସ୍ବାଦ, ପୋଷକ ତତ୍ତ୍ୱ ଏବଂ ଅନନ୍ୟ ଏଞ୍ଜାଇମ୍ ନ ଥାଏ। ଅପମିଶ୍ରଣ ଜଣା ନ ପଡ଼ିବା ପାଇଁ ଅତ୍ୟାଧୁନିକ ପଦ୍ଧତି ଆପଣାଯାଇଥାଏ ବୋଲି ବ୍ରିଟିଶ୍ ବି’କିପର୍ସ ଆସୋସିଏଶନ କହିଛି। ପ୍ରକୃତ ମହୁ ଟନ୍ ପ୍ରତି ମୂଲ୍ୟ ୩,୦୦୦ ଡଲାର ହୋଇଥିବାବେଳେ ସିରପ୍ ଦାମ୍ ୫୦୦ ଡଲାର। ସେଥିପାଇଁ ମହୁରେ ଅଧିକ ଅପମିଶ୍ରଣ କରାଯାଉଛି।