ବେଜିଂ: ଆଜିକା ଯୁଗରେ ସୁନାର ମୂଲ୍ୟ ଆକାଶଛୁଅଁ।। ଏଥିସହ ଚୋରି ମଧ୍ୟ ବଢ଼ିଗଲାଣି। ହେଲେ ଅପରି ଅନେକ ଲୋକ ଅଛନ୍ତି, ଯେଉଁମାନେ ସବୁବେଳେ ସୁନା ପିନ୍ଧିବାକୁ ଭଲ ପାଇଥା’ନ୍ତି। ଚାଇନାର ଜଣେ ୯୦ ବର୍ଷୀୟ ବୃଦ୍ଧଙ୍କ ଏପରି ସୁନାପିନ୍ଧା ସଉକ ତାଙ୍କୁ ସ୍ବତନ୍ତ୍ର ପରିଚୟ ଦେଇଛି। ବୃଦ୍ଧ ଜଣକ ଝାଙ୍ଗଝୋଉ ସହରର ବାସିନ୍ଦା ହୋଇଥିବାବେଳେ ସେ ନିକଟରେ ଏକ ସୁନା ଦୋକାନରୁ ସୁନା କିଣୁଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏପରି ଭିଡିଓ ଦେଖିବା ପରେ ତାଙ୍କୁ ଅନେକେ ବିବାହ ପ୍ରସ୍ତାବ ମଧ୍ୟ ଦେଇଛନ୍ତି। ତେବେ ତାଙ୍କ ପାଖରେ ଏକ ସୁନା ବେଲ୍ଟ ମଧ୍ୟ ରହିଛି, ହେଲେ ପରିବାରର ବାରଣ ଯୋଗୁ ସେ ତାକୁ ବାହାରକୁ ପିନ୍ଧି ଯାଇପାରୁନାହାନ୍ତି। ସେ ସର୍ବଦା ୮୦୦ ହଜାର ୟୁଆନ୍ ଅର୍ଥାତ୍ ଭାରତୀୟ ମୁଦ୍ରାରେ ୯୫ ଲକ୍ଷର ସୁନା ପିନ୍ଧି ବାହାରକୁ ଯାଇଥା’ନ୍ତି। ଭିଡିଓରେ ପିନ୍ଧିଥିବା ସୁନା ବ୍ରେସଲେଟ୍କୁ ଓଜନ କରି ତାହା ୨ କେଜିର ହେବ ବୋଲି କହିଛନ୍ତି। ଭାଇରାଲ ଭିଡିଓରେ ଅନେକ ୟୁଜର୍ସଙ୍କ ମଜାଳିଆ ପ୍ରତିକ୍ରିୟା ଦେଖିବାକୁ ମିଳିଛି। ଜଣେ ଲେଖିଛନ୍ତି, ମୋ ଜେଜେମା’ ଏକାକୀ ଅଛନ୍ତି, ଆପଣ ତାଙ୍କୁ ବିବାହ କରିବେ କି? ଅନ୍ୟ ଜଣେ କହିଛନ୍ତି, ମୁଁ ଏହି ବ୍ୟକ୍ତିଙ୍କୁ ବିବାହ କରିବାକୁ ରାଜି ଅଛି। ସୂଚନାଯୋଗ୍ୟ, ଦେଶରେ ସୁନା କ୍ରୟ ମାମଲାରେ ଚାଇନା ୨୦୧୩ରୁ ପ୍ରଥମ ସ୍ଥାନରେ ରହିଛି। ବାର୍ଷିକ ଚାଇନାବାସୀ ୯୪୫ ଟନ୍ ସୁନା କ୍ରୟ କରିଥା’ନ୍ତି। ସେଠାରେ ବିଶେଷତଃ ବୃଦ୍ଧାବୃଦ୍ଧମାନେ ସୁନା କିଣିବାକୁ ଅଧିକ ଆଗ୍ରହ ପ୍ରକାଶ କରିଥା’ନ୍ତି। ସୁନା କିଣିବାକୁ ସେଠାରେ ଟଙ୍କା ସଞ୍ଚୟ ଏବଂ ପରମ୍ପରା ଭାବେ ଗ୍ରହଣ କରାଯାଏ।