କଥାରେ ଅଛି ପ୍ରେମ ମାନେନା ବୟସ। ବିଗତ ଦିନରେ ଏପରି ଅନେକ ଘଟଣା ଦେଖିବାକୁ ମିଳିଛି ଯେଉଁଠି ଲୋକମାନେ ପ୍ରେମ ପାଇଁ ସବୁ ସୀମା ପାର୍ କରିଛନ୍ତି। ଆଜି ଆମେ ଏଭଳି ଏକ ପ୍ରେମକାହାଣୀ ବିଷୟରେ କହିବାକୁ ଯାଉଛୁ ଯେଉଁଥିରେ ପ୍ରେମ ସହ ଭାବପ୍ରବଣତା ଓ ଦୁଃଖ ଭରି ରହିଛି। କାରଣ ଏହା ଜଣେ ୯୧ ବର୍ଷୀୟ ମହିଳା ଏବଂ ୨୩ ବର୍ଷୀୟ ଯୁବକଙ୍କ ପ୍ରେମକାହାଣୀ।
ଆର୍ଜେଣ୍ଟିନାରେ ରହୁଥିବା ଉକ୍ତ ୯୧ ବର୍ଷୀୟ ମହିଳା ନିଜ ବନ୍ଧୁଙ୍କ ପୁଅ(୨୩ ବର୍ଷ)ଙ୍କ ପ୍ରେମରେ ପଡ଼ିଥିଲେ। ଉଭୟ ବିବାହ ମଧ୍ୟ କରିଥିଲେ। ହେଲେ ହନିମୁନ୍ରେ ଏପରି ଘଟଣା ଘଟିଥିଲା ଯାହା ସବୁକିଛି ବଦଳାଇ ଦେଇଥିଲା।
ବୃଦ୍ଧା ମହିଳାଜଣଙ୍କ ନିଜ ବନ୍ଧୁଙ୍କ ଘରେ ରହୁଥିଲେ। ତାଙ୍କ ଘରେ ପୁଅ ମଧ୍ୟ ଥିଲେ। ବନ୍ଧୁଙ୍କ ଆର୍ଥିକ ସ୍ଥିତି ସ୍ବଚ୍ଛଳ ନ ଥିଲା। ଏଣୁ ମହିଳା ଯାହା ପେନସନ ପାଉଥିଲେ ସେଥିରେ ତାଙ୍କ ସହାୟତା କରିଆସୁଥିଲେ। ହେଲେ ଯଦି ତାଙ୍କ ମୃତ୍ୟୁ ହୁଏ ବନ୍ଧୁଙ୍କ ଅବସ୍ଥା କ’ଣ ହେବ ବୋଲି ମହିଳାଙ୍କ ମନରେ ପ୍ରଶ୍ନ ଉଠିଥିଲା। ଏଣୁ ମହିଳା ବଡ଼ ନିଷ୍ପତ୍ତି ନେଇଥିଲେ। ସେ ନିଜ ବନ୍ଧୁଙ୍କ ପୁଅଙ୍କୁ ବିବାହ କରିବାକୁ କହିଥିଲେ।
ମହିଳାଜଣଙ୍କ ବନ୍ଧୁଙ୍କ ପୁଅଙ୍କୁ ବିବାହ ପାଇଁ ପ୍ରପୋଜ କରିଥିଲେ। ସେ ହଁ ଭରିଥିଲେ। ଏବେ ତାଙ୍କ ମୃତ୍ୟୁ ବି ହୋଇଗଲେ ଉକ୍ତ ଯୁବକଙ୍କୁ ପେନସନ୍ ମିଳିବ ବୋଲି ମହିଳା ଭାବିଥିଲେ। ବିବାହ ପରେ ସେମାନେ ହନିମୁନରେ ଯାଇଥିଲେ। ସେଠାରେ ହଠାତ୍ ମହିଳାଙ୍କ ମୃତ୍ୟୁ ହୋଇଥିଲା। ଏହାପରେ ଯୁବକ ପେନସନ୍ ପାଇଁ ଆବେଦନ କରିଥିଲେ। ହେଲେ ସେଠାରେ ଥିବା ଅଧିକାରୀମାନେ ଯୁବକ ଠକ ବୋଲି ଅଭିଯୋଗ କରିଥିଲେ। ଟଙ୍କା ପାଇଁ ମହିଳାଙ୍କୁ ସେ ବିବାହ କରିଛନ୍ତି ବୋଲି କହି ଜେଲ ପଠାଇବାକୁ ପ୍ରସ୍ତୁତି ଆରମ୍ଭ କରିଥିଲେ। କୌଣସି ପ୍ରକାରେ ସେମାନଙ୍କୁ ବୁଝାଇ ଯୁବକଙ୍କୁ ଜେଲ ଯିବାରୁ ରକ୍ଷା କରାଯାଇଛି। ହେଲେ ଏବେ ବି ସେ ଅସୁବିଧାରେ ଥିବା କୁହାଯାଉଛି।
