![](https://www.dharitri.com/wp-content/uploads/2023/06/n-3-17.jpg)
ନୂଆଦିଲ୍ଲୀ,୨୧।୬ : ପ୍ରଥମ ଥର ପାଇଁ ଦେଶର ୯୩ ପ୍ରତିଶତ ଜନସଂଖ୍ୟାଙ୍କଠାରେ କରୋନା ବିରୁଦ୍ଧରେ ଶକ୍ତିଶାଳୀ ଆଣ୍ଟିବଡି ସୃଷ୍ଟି ହୋଇଛି। ଯାହା ଛଅ ମାସ ପାଇଁ ସୁରକ୍ଷା ଦେଇପାରେ । ଯେଉଁମାନେ କରୋନା ଟିକା ଗ୍ରହଣ କରିଛନ୍ତି ଏହି ସ୍ତର ଅଧିକ ପ୍ରଭାବଶାଳୀ ରହିଛି । ଦିଲ୍ଲୀ, ଓଡ଼ିଶା, ଉତ୍ତରପ୍ରଦେଶ, ପୁଡୁଚେରୀ ଏବଂ ତ୍ରିପୁରାର ୧୦ ହଜାରରୁ ଅଧିକ ଲୋକଙ୍କ ଉପରେ କରାଯାଇଥିବା ଏକ ସେରୋ ଅଧ୍ୟୟନରେ ଏହି ଅନୁସନ୍ଧାନ ସାମ୍ନାକୁ ଆସିଛି। ଏହା ମଧ୍ୟ ଜଣାପଡିଛି ସହର, ଗ୍ରାମ ଏବଂ ଆଦିବାସୀ ଅଞ୍ଚଳରେ ରହୁଥିବା ଲୋକଙ୍କ ମଧ୍ୟରେ ଆଣ୍ଟିବଡି ସମାନ ।
ଏମ୍ସ ଦିଲ୍ଲୀ, ଭୁବନେଶ୍ୱର ଏବଂ ଗୋରଖପୁର ବ୍ୟତୀତ ଆଇସିଏମଆର, ଡବ୍ଲୁଏଚଓ, ଜିପମର ଏବଂ ଅଗରତାଲା ମେଡିକାଲ କଲେଜର ଡାକ୍ତରମାନେ ଏହି ଅଧ୍ୟୟନ କରିଛନ୍ତି। ରକ୍ତ ନମୁନାକୁ ତିନୋଟି ଭିନ୍ନ ପର୍ଯ୍ୟାୟରେ ନିଆଯାଇଥିଲା ଏବଂ ଛଅ ମାସ ମଧ୍ୟରେ ବିଶ୍ଳେଷଣ କରାଯାଇଥିଲା। ମେଡିକାଲ ଜର୍ନାଲ ମେଡରେକ୍ସିଭରେ ପ୍ରକାଶିତ ଅଧ୍ୟୟନ ଅନୁଯାୟୀ, ମାର୍ଚ୍ଚରୁ ଅଗଷ୍ଟ ୨୦୨୧ ମଧ୍ୟରେ ୧୦,୧୧୦ ଲୋକଙ୍କ ରକ୍ତ ନମୁନା ନିଆଯାଇଥିଲା। ଏହି ଲୋକଙ୍କ ମଧ୍ୟରୁ ୭୩,୯୦ ପ୍ରତିଶତରେ ଆଣ୍ଟିବଡି ମିଳିଥିଲା। ଦ୍ୱିତୀୟ ପର୍ଯ୍ୟାୟ ମେ ରୁ ଡିସେମ୍ବର ୨୦୨୧ ମଧ୍ୟରେ କରାଯାଇଥିଲା ଯେଉଁଥିରେ ୬୫୦୩ ଲୋକଙ୍କ ନମୁନା ନିଆଯାଇଥିଲା । ଏହି ବ୍ୟକ୍ତିମାନେ ପ୍ରଥମ ପର୍ଯ୍ୟାୟରେ ମଧ୍ୟ ଜଡିତ ଥିଲେ। ଏହି ସମୟରେ, ୯୦.୭୦ ପ୍ରତିଶତ ଲୋକଙ୍କଠାରେ ଆଣ୍ଟିବଡି ମିଳିଥିଲା। ଏହା ପରେ, ଅଗଷ୍ଟ ୨୦୨୧ ରୁ ଜାନୁୟାରୀ ୨୦୨୨ ମଧ୍ୟରେ ତୃତୀୟ ପର୍ଯ୍ୟାୟ ନମୁନା ସଂଗ୍ରହ କରାଯାଇଥିଲା, ଯେଉଁଥିରେ ୯୨.୯୦ ପ୍ରତିଶତ ଲୋକଙ୍କଠାରେ ଆଣ୍ଟିବଡି ମିଳିଥିଲା ।
ଅଧ୍ୟୟନ ଅନୁଯାୟୀ, ଦେଶର ୬୭ ପ୍ରତିଶତ ଜନସଂଖ୍ୟାରେ କରୋନା ବିରୁଦ୍ଧରେ ଆଣ୍ଟିବଡି ବିକଶିତ ହେବାର ପ୍ରମାଣ ରହିଛି। ଆଇସିଏମଆରର ଚତୁର୍ଥ ସେରୋ ସର୍ଭେରେ ସମାନ ସିଦ୍ଧାନ୍ତ ବାହାରିଲା। କିନ୍ତୁ ଜୁନ ୨୦୨୧ ପରଠାରୁ କ’ଣ ପରିବର୍ତ୍ତନ ହୋଇଛି? ଏହା ଉପରେ କୌଣସି ପ୍ରମାଣ ନାହିଁ। ଏହି କାରଣରୁ ଦେଶର ବିଭିନ୍ନ ଶୀର୍ଷ ଅନୁଷ୍ଠାନ ମିଳିତ ଭାବରେ ଏହି ଅଧ୍ୟୟନ କରିଛନ୍ତି। ଦିଲ୍ଲୀ ଏମ୍ସର ବରିଷ୍ଠ ଡକ୍ଟର ପୁନିତ ମିଶ୍ରଙ୍କ ଅନୁଯାୟୀ, ଆଣ୍ଟିବଡି ସ୍ତର କେତେ ଦିନ ପର୍ଯ୍ୟନ୍ତ ରହିବ ଜାଣିବା ପାଇଁ ଆଣ୍ଟିବଡି ସମ୍ବନ୍ଧରେ ଆଉ ଏକ ଅଧ୍ୟୟନ ହେବା ଉଚିତ।