ନୂଆଦିଲ୍ଲୀ,୧୬।୧: ଦେଶରେ ଘଟୁଥିବା ସଡ଼କ ଦୁର୍ଘଟଣା ପାଇଁ ଗାଡ଼ି ଡ୍ରାଇଭର ମୁଖ୍ୟତଃ ଦାୟୀ। ୯୫ ପ୍ରତିଶତ ଡ୍ରାଇଭରଙ୍କୁ ଟ୍ରାଫିକ୍ ନିୟମ ଜଣା ନାହିଁ। ପ୍ରଚଳିତ ୫୦ ପ୍ରତିଶତ ଟ୍ରାଫିକ୍ ନିୟମ ସମ୍ପର୍କରେ ଡ୍ରାଇଭରଙ୍କୁ ଅଜଣା। ଏକ୍ଷେତ୍ରରେ ଦିଲ୍ଲୀ ଏବଂ ବେଙ୍ଗାଲୁରୁର ଡ୍ରାଇଭର ଟ୍ରାଫିକ୍ ନିୟମ ସମ୍ପର୍କରେ ସର୍ବନିମ୍ନ ତଥ୍ୟ ଜାଣିଥାନ୍ତି। ଅପରପକ୍ଷରେ କୋଲକାତା ଏବଂ ଚେନ୍ନାଇର ଡ୍ରାଇଭର ଟ୍ରାଫିକ୍ ନିୟମ ନେଇ ସର୍ବାଧିକ ସଚେତନ ବୋଲି ଏକ ସର୍ଭେ ରିପୋର୍ଟରେ ଉଲ୍ଲେଖ କରାଯାଇଛି। ଦିଲ୍ଲୀ, ମୁମ୍ବାଇ, ଚେନ୍ନାଇ, ବେଙ୍ଗାଲୁରୁ, ହାଇଦ୍ରାବାଦ୍ ଏବଂ କୋଲକାତା ଆଦି ୬ଟି ସହରରେ ଏହି ସର୍ଭେ କରାଯାଇଛି। ସର୍ଭେରେ ୧୫୬୧ ଡ୍ରାଇଭରଙ୍କୁ ସାମିଲ କରାଯାଇଥିଲା। ଗାଡ଼ି ଚଳାଇବା ସମୟରେ ମୋବାଇଲ୍ ଫୋନ୍ରେ କଥା ହେବା ଯୋଗୁ ଅଧିକ ଦୁର୍ଘଟଣା ଘଟୁଥିବା ୯୭ ପ୍ରତିଶତ ଡ୍ରାଇଭର କହିଛନ୍ତି। ସେହିପରି ୮୦ ପ୍ରତିଶତ ଡ୍ରାଇଭର ଦ୍ରୁତଗତିରେ ଗାଡ଼ି ଚଳାଇବାକୁ ନା ପସନ୍ଦ କରିଛନ୍ତି। କୋଲକାତାରେ ୩୦ ପ୍ରତିଶତ ଡ୍ରାଇଭର ଟ୍ରାଫିକ୍ ନିୟମ ପାଳନ କରୁଥିବା କହିଥିବାବେଳେ ୬୫ ପ୍ରତିଶତ ଡ୍ରାଇଭର ରଙ୍ଗ ସାଇଡ୍ ବ୍ୟବହାର କରୁଥିବା କହିଥିଲେ। ସେହିପରି ଦିଲ୍ଲୀର ୬୬ ଡ୍ରାଇଭର ଟ୍ରାଫିକ୍ ସିଗନାଲ୍ ପୂର୍ବରୁ ଗାଡି ରୋକୁ ନ ଥିବା କହିଥିବାବେଳେ ୩୦ ପ୍ରତିଶତ ନୋ ପାର୍କିଂ ଜୋନ୍ରେ ଗାଡ଼ି ପାର୍କ କରୁଥିବା କହିଥିଲେ।