ଭୁବନେଶ୍ୱର, ୨୩।୧୦(ବ୍ୟୁରୋ): ମାଧ୍ୟମିକ ଶିକ୍ଷା ନିର୍ଦ୍ଦେଶକଙ୍କ ତରଫରୁ ରାଜ୍ୟର ସରକାରୀ ମାଧ୍ୟମିକ ବିଦ୍ୟାଳୟଗୁଡ଼ିକରେ ଖାଲି ଥିବା ହିନ୍ଦୀ ଶିକ୍ଷକ ପଦବୀରେ ନିଯୁକ୍ତି ପାଇଁ ହୋଇଥିବା ପରୀକ୍ଷା ଫଳ ଶନିବାର ପ୍ରକାଶ ପାଇଛି। ପରୀକ୍ଷାରେ ମୋଟ୍ ୯୫୩ ପ୍ରାର୍ଥୀ ଉତ୍ତୀର୍ଣ୍ଣ ହୋଇଛନ୍ତି। ସେମାନଙ୍କ ମଧ୍ୟରୁ ୨୦୭ଜଣ ସାଧାରଣ ବର୍ଗର ଥିବା ବେଳେ ୫୯୬ଜଣ ଏସ୍ଇବିସି ବର୍ଗର, ୧୦୧ଜଣ ଅନୁସୂଚିତ ଜାତିର ଓ ୪୯ଜଣ ଅନୁସୂଚିତ ଜନଜାତିର ପ୍ରାର୍ଥୀ ଅଛନ୍ତି। ପ୍ରାର୍ଥୀମାନେ ତାଙ୍କ ପରୀକ୍ଷା ଫଳ dseodisha.in ଓ୍ବେବ୍ସାଇଟ୍ରେ ଲଗ୍ ଇନ୍ କରି ଦେଖିପାରିବେ। ପରୀକ୍ଷାରେ ସଫଳ ହୋଇଥିବା ପ୍ରାର୍ଥୀମାନଙ୍କ ଡକ୍ୟୁମେଣ୍ଟ ଯାଞ୍ଚ ୨୯ ତାରିଖରୁ ନିଜ ସ୍ଥାୟୀ ଠିକଣା ଜିଲାରେ ହେବ। ଏଥିପାଇଁ ସବିଶେଷ ସୂଚନା ଖୁବ୍ ଶୀଘ୍ର ଓ୍ବେବ୍ସାଇଟ୍ରେ ପ୍ରକାଶିତ ହେବ ବୋଲି ମାଧ୍ୟମିକ ଶିକ୍ଷା ନିର୍ଦ୍ଦେଶକଙ୍କ ପକ୍ଷରୁ ସୂଚନା ଦିଆଯାଇଛି। ସୂଚନାଯୋଗ୍ୟ, ଗତ ୪ ତାରିଖରେ ଏହି ପରୀକ୍ଷା ଅନ୍ଲାଇନ୍ ମାଧ୍ୟମରେ ହେଇଥିଲା।