ମୁମ୍ବାଇ,୨୮ ।୨: କରୋନା ମହାମାରୀ ପାଇଁ ଗତ ବର୍ଷ ଲଗାଯାଇଥିବା ଳକ୍ଡାଉନକୁ ଏବେ ବର୍ଷେ ପୂରଣ ହେବାକୁ ଯାଉଛି । ତେବେ କରୋନା ଯୋଗୁ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଥିବା ମହାରାଷ୍ଟ୍ରରେ ଲକ୍ ଡାଉନ ଯୋଗୁ ପ୍ରାୟ ୯୬ ପ୍ରତିଶତ ଲୋକଙ୍କର ରୋଜଗାର କମିଛି ବୋଲି ଏକ ସର୍ଭେରୁ ଜଣାପଡିଛି । ଅନ୍ନ ଅଧିକାର ଅଭିଯାନ ଦ୍ୱାରା କରାଯାଇଥିବା ଏହି ଅଭିଯାନରୁ ଏହା ସାମ୍ନାକୁ ଆସିଛି । ତେବେ ରୋଜଗାର କମ୍ ହେବାର ମୁଖ୍ୟ କାରଣ ହେଉଛି ଲକ୍ଡାଉନ ସମୟରେ ଅଧିକାଂଶ ଲୋକଙ୍କର ଚାକିରି ଚାଲିଯିବା । ବିଶେଷ କରି ବେସରକାରୀ କ୍ଷେତ୍ରରେ କାମ କରୁଥିବା ଅନେକ ଲୋକଙ୍କର ଚାକିରି ଚାଲିଯାଇଥିଲା । ଛୋଟ ଛୋଟ ବ୍ୟୟସାୟ ପ୍ରତିଷ୍ଠାନ ବନ୍ଦ ହୋଇଯିବା ପରେ ଏମାନେ ରୋଜଗାର ହରାଇ ବସିଥିଲେ । ଉକ୍ତ ସର୍ବେକ୍ଷଣ ଅନୁଯାୟୀ ଲକ୍ଡାଉନ୍ ସମୟରେ ପ୍ରତି ୫ ଜଣରେ ଜଣଙ୍କୁ ଉପାବାସ ରହିବାକୁ ପଡୁଥିଲେ । ଏବେ ପୁଣିଥରେ କରୋନା ଫେରିବା ଶୁଣିଲେ ଆପଣାଛାଏଁ କେମିତି ଏକ ଭୟ ମନରେ ଆସୁଛି । କାରଣ କରୋନା ସଂକ୍ରମଣ ଦେଶରେ କମ୍ ହେବା ପରେ ଧିରେ ଧିରେ ସମସ୍ତ ବ୍ୟବସାୟ ଏକ ପ୍ରକାର ଆରମ୍ଭ ହୋଇ ଯାଇଥିଲା କହିଲେ ଚଳେ । ଏବେ କିନ୍ତୁ କରୋନାର ନୂଆ ଷ୍ଟ୍ରେନ୍ ପୂର୍ବାପେକ୍ଷା ଅଧିକ କ୍ଷତିକାରକ ହୋଇଥିବାରୁ ଏବେ ଏହା ସମସ୍ତଙ୍କର ଚିନ୍ତା ବଢାଇ ଦେଇଛି ।