ଚମ୍ପୁଆ, ୬।୪(ଡି.ଏନ୍.ଏ.) – କେନ୍ଦୁଝର ଜିଲା ଚମ୍ପୁଆ ଓ ଭଣ୍ଡା ଲ୍ୟାମ୍ପର ୯୭୪ ଜଣ ଚାଷୀ ଧାନ ବିକ୍ରିରୁ ବଞ୍ଚିତ ହୋଇଛନ୍ତି। ୨୦୨୧-୨୨ର ଖରିଫ ଋତୁରେ ଟୋକନ୍ ପାଇ ମଧ୍ୟ ଧାନ ବିକ୍ରି କରିପାରି ନାହାନ୍ତି। ସୂଚନା ଅନୁସାରେ, ଚମ୍ପୁଆ ଲ୍ୟାମ୍ପ ଅଧୀନରେ ଚମ୍ପୁଆ, କରଞ୍ଜିଆ, ରଜିଆ ଓ ଜାମୁଦଲକ ବ୍ରାଞ୍ଚ ଥିବାବେଳେ ଭଣ୍ଡା ଲ୍ୟାମ୍ପ ଅଧୀନରେ ଭଣ୍ଡା, ଭୂଇଁପୁର, ଫୁଲକଳେଇଁ, ଜ୍ୟୋତିପୁର ବ୍ରାଞ୍ଚ ରହିଛି।
୨୦୨୧-୨୨ ମସିହାରେ ଚମ୍ପୁଆ ଲ୍ୟାମ୍ପରେ ୨୫୪୦ଚାଷୀ ଧାନ ବିକ୍ରି କରିବା ପାଇଁ ରେଜିଷ୍ଟ୍ରେସନ କରିଥିବା ବେଳେ ଚମ୍ପୁଆ ଲ୍ୟାମ୍ପକୁ ୪୯ ହଜାର କୁଇଣ୍ଟାଲ ଧାନ କ୍ରୟ ପାଇଁ ଟାର୍ଗେଟ ରହିଥିଲା। ଚାଷୀମାନେ ଧାନ ବିକ୍ରି ପାଇଁ ୨୦୨୧ ମସିହା ଅଗଷ୍ଟରୁ ସେପ୍ଟେମ୍ବର ମଧ୍ୟରେ ନାମ ପଞ୍ଜୀକରଣ କରିଥିଲେ। ଚାଷୀମାନଙ୍କୁ ଟୋକନ୍ ମିଳିବା ସହିତ ଧାନ କ୍ରୟର ଦିନ ମୋବାଇଲ ମେସେଜ ମାଧ୍ୟମରେ ସୂଚନା ଦିଆଯାଇଥିଲା। ମାତ୍ର ମିଳୁଥିବା ଟୋକନ ଅନୁଯାୟୀ ଉଭୟ ଲ୍ୟାମ୍ପରେ ଟାର୍ଗେଟ ଅଭାବ ରହିଥିବାରୁ ଚାଷୀମାନେ ଟୋକନ ପାଇ ମଧ୍ୟ ଧାନ ବିକ୍ରି କରିପାରି ନ ଥିଲେ। ଏପରିକି ଟୋକନର ଅବଧି ଶେଷ ହୋଇ ଯାଇଥିଲେ ମଧ୍ୟ ଟାର୍ଗେଟର ଅଭାବ ଦେଖା ଦେଇଥିଲା। ଉଭୟ ଲ୍ୟାମ୍ପର ଏମ.ଡି କହିଛନ୍ତି ଚମ୍ପୁଆରେ ୫୨୪ ଜଣ ଚାଷୀ ୧୬ ହଜାର କୁଇଣ୍ଟାଲ ଧାନ ବିକ୍ରି ପାରି ନଥିବା ବେଳେ ଭଣ୍ଡା ଲ୍ୟାମ୍ପର ୪୫୦ ଜଣ ଚାଷୀ ୧୮୫୭୧ କୁଇଣ୍ଟାଲ ଧାନ ବିକ୍ରି କରି ପାରି ନାହାନ୍ତି। ଫଳରେ ଚାଷୀମାନେ ଦଲାଲ୍ମାନଙ୍କ ଦ୍ୱାରା କମ୍ ଦାମ୍ରେ ରାଜ୍ୟ ବାହାରେ ଧାନ ବିକି ଥିବା ଜଣାଯାଇଛି। ଚମ୍ପୁଆ ଲ୍ୟାମ୍ପ ଅଧୀନରେ ୮୨ ଗାଁ ରହିଥିବା ବେଳେ ୧୨ ହଜାର ଚାଷୀ ଲ୍ୟାମ୍ପର ମେମ୍ବର ରହିଥିବା ଜଣାଯାଇଛି। ଏ ନେଇ ଚମ୍ପୁଆ ଏମ.ଡି. ବିଭୁତି ଗିରିଙ୍କୁ ପଚାରିବାରୁ ଟାର୍ଗେଟ ଆସୁ ଆସୁ ଟୋକନ୍ର ଅବଧି ଶେଷ ହୋଇଯାଇଥିବାରୁ ଚାଷୀମାନେ ଧାନ ବିକ୍ରି କରି ପାରି ନଥିଲେ।