ସମ୍ବଲପୁର,୨୯।୧(ବ୍ୟୁରୋ): ଚଳିତ ଶିକ୍ଷାବର୍ଷ ଶେଷ ହୋଇନାହିଁ, ହେଲେ ଶେଷ ବର୍ଷର ୭୧ ପ୍ରତିଶତ ଛାତ୍ରୀଛାତ୍ରଙ୍କୁ ବିଭିନ୍ନ କମ୍ପାନୀ ପକ୍ଷରୁ ନିଯୁକ୍ତ ଦେବାକୁ ଅଫର ଦିଆସରିଛି। ସମ୍ବଲପୁର ଭିସୁଟ୍ ପକ୍ଷରୁ ୯୯ ପ୍ରତିଶତ ଛାତ୍ରୀଛାତ୍ରଙ୍କୁ ନିଯୁକ୍ତି ସୁଯୋଗ ଦେବାର ଲକ୍ଷ୍ୟ ରହିଛି ବୋଲି ଶୁକ୍ରବାର ଭିସୁଟ୍ ସମ୍ମିଳନୀ କକ୍ଷରେ ଅନୁଷ୍ଠିତ ଖବରଦାତା ସମ୍ମିଳନୀରେ କୁଳପତି ପ୍ରଫେସର ବଂଶୀଧର ମାଝି କହିଥିଲେ। ସେ ଆହୁରି କହିଥିଲେ, ଜାନୁୟାରୀ ୩୧ରେ ଭିସୁଟ୍ର ୧୩ତମ ସମାବର୍ତ୍ତନ ଉତ୍ସବ ଭର୍ଚୁଆଲ ମାଧ୍ୟମରେ ଅନୁଷ୍ଠିତ ହେବ। କୋଭିଡ୍ ସମୟରେ ମଧ୍ୟ ଶିକ୍ଷାଦାନ ଓ ନିଯୁକ୍ତି କ୍ଷେତ୍ରରେ ପ୍ରଭାବ ପଡିନାହିଁ। ବିଗତ ବର୍ଷରେ ୯୫ ପ୍ରତିଶତ ଛାତ୍ରୀଛାତ୍ର ନିଯୁକ୍ତି ପାଇଛନ୍ତି। ଉନ୍ନତମାନର ଶିକ୍ଷାଦାନ ଓ ଗବେଷଣା ନେଇ ଯୋଜନା କରାଯାଉଛି। ରାଜ୍ୟ ବାହାର ଶିକ୍ଷା ଅନୁଷ୍ଠାନ ସହିତ ଏମ୍ଓୟୁ ସ୍ବାକ୍ଷର ହୋଇଛି। ବିଭିନ୍ନ ବିଭାଗ ଏକାଠି ଗବେଷଣା କରିବା ନେଇ ସୁବିଧା ଯୋଗାଇଦେବାକୁ ରାଜ୍ୟ ସରକାରଙ୍କୁ ପ୍ରସ୍ତାବ ଦିଆଯାଇଛି। ସମାବର୍ତ୍ତନ ଉତ୍ସବରେ ୧୨୩୪ ଛାତ୍ରୀଛାତ୍ରଙ୍କୁ ସମ୍ମାନିତ କରାଯିବାକୁ ସ୍ଥିର କରାଯାଇଛି। ସେମାନଙ୍କ ମଧ୍ୟରେ ୮୭୨ ବିଟେକ, ୨୪ ବି-ଆର୍ଚ,୧୦୯ ଜଣ ଏମ୍ଟେକ, ୨୬ ଏମ୍ସିଏ, ୫୭ ଏମ୍ଏସ୍ସି, ୨୬ ଡୁଆଲ ଡିଗ୍ରୀ, ୩୬ ଜଣ ଇଣ୍ଟିଗ୍ରେଟେଡ ଏମ୍ଏସ୍ସି ରହିଛନ୍ତି। ୨୪ ଛାତ୍ରୀଛାତ୍ରଙ୍କୁ ସ୍ବର୍ଣ୍ଣ ପଦକ ଦିଆଯିବ ବୋଲି କହିଥିଲେ। କେନ୍ଦ୍ରୀୟ ଅନୁଦାନ ପାଇବା ପାଇଁ ସରକାରଙ୍କୁ ଅନୁରୋଧ କରାଯାଇଛି। ଏହା ହେଲେ ଅନୁଷ୍ଠାନର ବହୁବିଧ ଅନୁସନ୍ଧାନ ପାଇଁ ବାଟ ଖୋଲିବ। ଅନୁଷ୍ଠାନରେ ଅଧ୍ୟାପନା ସହ ଛାତ୍ରୀଛାତ୍ର ସୁବିଧା ପାଇପାରିବେ ବୋଲି କହିଥିଲେ।