ଭୁବନେଶ୍ବର,୭ା୧(ବ୍ୟୁରୋ): ଓଡିଶା ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ଦ୍ୱାରା ପରିଚାଳିତ ମାଟ୍ରିକ ସମ୍ମେଟିଭ୍ ଆସେସ୍ମେଣ୍ଟ(ଏସ୍ଏ-୨) ପରୀକ୍ଷା ମାର୍ଚ୍ଚ ୧୦ରୁ ଆରମ୍ଭ ହୋଇ ୧୭ ତାରିଖରେ ସରିବ। ସେହିପରି ନବମ ସମ୍ମେଟିଭ-୨ ପରୀକ୍ଷା ଫେବୃୟାରୀ ୨୦ରୁ ୨୫ ତାରିଖ ପର୍ଯ୍ୟନ୍ତ ଚାଲିବ। ସମ୍ମେଟିଭ୍ ଆସେସ୍ମେଣ୍ଟ-୧ ପରି ଉଭୟ ସମ୍ମେଟିଭ-୨ ପରୀକ୍ଷା ପଦ୍ଧତି ସମାନ ରହିବ। ହେଲେ ଚଳିତ ବର୍ଷ ରାଜ୍ୟ ସରକାର ୯ମ ଓ ୧୦ମ ସମ୍ମେଟିଭ-୨ ପରୀକ୍ଷା ଫି’ ଛାଡ଼ କରିବାକୁ ଯୋଜନା କରିଛନ୍ତି। ଏନେଇ ରାଜ୍ୟ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ଚିଠି ହୋଇସାରିଥିବାବେଳେ କେବଳ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଅନୁମୋଦନ ବାକି ରହିଛି। ମୁଖ୍ୟମନ୍ତ୍ରୀଙ୍କ ଅନୁମୋଦନ ପରେ ଖୁବ୍ଶୀଘ୍ର ଏନେଇ ଘୋଷଣା ହେବ ବୋଲି ସୂଚନା ମିଳିଛି।
ବୋର୍ଡ ପକ୍ଷରୁ ଦିଆଯାଇଥିବା ଚିଠିରେ ଉଲ୍ଲେଖ କରାଯାଇଛି ଯେ, ୧୦ମ ସମ୍ମେଟିଭ୍-୧ ଓ ୨ ପାଇଁ ୪୨୦ ଟଙ୍କା ଲେଖାଏ ପରୀକ୍ଷା ଫି’ ନିଆଯାଇଥାଏ। ସେହିପରି ନବମ ସମ୍ମେଟିଭ-୧ ଓ ୨ ଲାଗି ୧୫୦ ଟଙ୍କା ଲେଖାଏ ଆଦାୟ ହୋଇଥାଏ। ପରୀକ୍ଷା ପରିଚାଳନା ବାବଦ ଖର୍ଚ୍ଚ ଲାଗି ସରକାର ଏହି ଫି’ ଛାତ୍ରୀଛାତ୍ରଙ୍କଠାରୁ ନେଇଥାନ୍ତି। ହେଲେ କୋଭିଡ୍ ଯୋଗୁ ଅଭିଭାବକଙ୍କ ସ୍ଥିତି ଭଲ ନ ଥିବାରୁ ରାଜ୍ୟ ସରକାର ଏହି ଫି’ ଛାଡ଼ କରିବାକୁ ନିଷ୍ପତ୍ତି ନେଇଛନ୍ତି। ଗୋଟିଏଥର ନବମ ଓ ଦଶମ ସମ୍ମେଟିଭ ପରୀକ୍ଷା ପରିଚାଳନା ଲାଗି ବୋର୍ଡ ୩୦ କୋଟି ଟଙ୍କାର ଫି’ ଆଦାୟ କରିଥାଏ। ହେଲେ ଚଳିତ ବର୍ଷ ଏହି ଅର୍ଥ ସରକାର ବହନ କରିବାକୁ ନିଷ୍ପତ୍ତି ନେଇଥିବା ଜଣାପଡିଛି।
ସୂଚନାଯୋଗ୍ୟ, ଦଶମ ସମ୍ମେଟିଭ-୧ରେ ହୋଇଥିବା ସମସ୍ତ ନୋଡାଲ ସେଣ୍ଟରରେ ସମ୍ମେଟିଭ୍-୨ ପରୀକ୍ଷା ହେବ। ଏଥିରେ କୌଣସି ପରିବର୍ତ୍ତନ ହେବନାହିଁ। ରାଜ୍ୟରେ ମୋଟ ୩୦୨୯ଟି ପରୀକ୍ଷା କେନ୍ଦ୍ରରେ ୫ ଲକ୍ଷ ୩୨ ହଜାର ୭୦୦ରୁ ଊର୍ଦ୍ଧ୍ୱ ବିଦ୍ୟାର୍ଥୀ ପରୀକ୍ଷା ଦେବେ। ଫର୍ମ ପୂରଣ ଲାଗି ଖୁବ୍ଶୀଘ୍ର ବିଜ୍ଞପ୍ତି ପ୍ରକାଶ ପାଇବ। ଚଳିତବର୍ଷ ଦଶମ ସମ୍ମେଟିଭ-୧ ପରୀକ୍ଷା ଫଳ ଆସନ୍ତା ୧୦ଦିନ ମଧ୍ୟରେ ପ୍ରକାଶ ପାଇବ। ଯେଉଁମାନେ ସମ୍ମେଟିଭ-୧ ପରୀକ୍ଷା ଦେଇଛନ୍ତି ସେମାନେ ସମ୍ମେଟିଭ-୨ ପରୀକ୍ଷା ଦେଇପାରିବେ। ସମ୍ମେଟିଭ-୧ ପରୀକ୍ଷା ଦେଇ ନ ଥିବା ବିଦ୍ୟାର୍ଥୀମାନେ ମଧ୍ୟ ସମ୍ମେଟିଭ-୨ ପରୀକ୍ଷା ଦେଇପାରିବେ। ହେଲେ ସମ୍ମେଟିଭ-୧ର ମାର୍କ ସେମାନଙ୍କ ମାର୍କିଂରୁ ବାଦ୍ ପଡିବ। ଉଭୟ ସମ୍ମେଟିଭ ପରୀକ୍ଷା ପଦ୍ଧତି ସମାନ ରହିବ।