![](https://www.dharitri.com/wp-content/uploads/2021/03/n-1-1.png)
ପାରାଦୀପ, ୭ା୩(ସ୍ବ.ପ୍ର.): ପାରାଦୀପ ସମେତ ଓଡ଼ିଶାର ୪ ସ୍ଥାନରେ ସପ୍ତାହେ ହେଲା ପ୍ରଥମ କରି ସାମୁଦ୍ରିକ ଶୈବାଳ ଚାଷ ଆରମ୍ଭ ହୋଇଛି। ଅନ୍ୟ ସ୍ଥାନ ହେଲା ଗଞ୍ଜାମ, ପୁରୀ ଓ ବାଲେଶ୍ୱର। ଓଡ଼ିଶା ସରକାରଙ୍କ ମତ୍ସ୍ୟ ବିଭାଗ ଓ ତାମିଲନାଡୁର ଏକ ସଂସ୍ଥା ପିଏମ୍ଏସ୍ଆର୍ଆଇ ପକ୍ଷରୁ ମିଳିତଭାବେ ଏହି ଶୈବାଳ ଚାଷ କରାଯାଇଛି। ଏହା ଦେଖିବାକୁ ଚିଙ୍ଗୁଡିଆ ଦଳ ଭଳି। ଗଭୀର ସମୁଦ୍ରର ତଳେ ହୋଇଥାଏ। ଶୈବାଳ ଅନେକ ସାମୁଦ୍ରିକ ଜଳଜୀବଙ୍କ ଜୀବନଚକ୍ର ସାଜିଥାଏ। ଏହାଛଡ଼ା ଶୈବାଳଗୁଡିକ ଔଷଧ, ସେଭିଂ ଲୋଶନ, ପ୍ରସାଧନ ସାମଗ୍ରୀ ଓ ଆଇସକ୍ରିମ ତିଆରିରେ ବ୍ୟବହାର କରାଯାଏ। ଏହାର ବଜାର ମୂଲ୍ୟ କିଲୋ ପ୍ରତି ୫୦ ଟଙ୍କା ରଖାଯାଇଛି। ଏହାକୁ ଇଂଲିଶରେ କାପାଫାଇଜର କୁହାଯାଏ। ପୂର୍ବରୁ ଭାରତର ତାମିଲନାଡୁରେ ଶୈବାଳ ଚାଷ ଚାଲିଛି। ସେଠାରେ ମତ୍ସ୍ୟଜୀବୀଙ୍କୁ ସଫଳତା ମିଳୁଛି ବୋଲି ମତ୍ସ୍ୟ ବିଭାଗ ପକ୍ଷରୁ ସୂଚନା ମିଳିଛି। ପାରାଦୀପର ମହାନଦୀ ମୁହାଣ ସଂଲଗ୍ନ ପଥରବନ୍ଧ ପାଖ ପାଣିରେ ଏହି ଚାଷ କରାଯାଇଛି। ଚତୁଃପାଶର୍ବରେ ଚାରିକଣିଆ ବାଉଁଶ ଭିତରେ ସରୁ ରଶି ଲଗାଯାଇଛି। ସେଥିରେ ଶୈବାଳଗୁଡିକୁ ଛନ୍ଦି ଦିଆଯାଇଛି। ସମୁଦ୍ର ଲହଡିରେ ତାହା ଭାସୁଛି। ଭାସିବା ବେଳେ ଶୈବାଳଗୁଡିକ ପାଣିରେ ଦୋହଲି ରହିଛି। ଏହି ପ୍ରକ୍ରିୟାରେ ଶୈବାଳ ବୃଦ୍ଧି ପାଇବ ବୋଲି ସାମୁଦ୍ରିକ ମତ୍ସ୍ୟ ଅଧିକାରୀ ମନୋରଞ୍ଜନ ମହାପାତ୍ର କହିଛନ୍ତି। ଏହା ବ୍ୟବହାର ଉପଯୋଗୀ ହେବା ପାଇଁ ସର୍ବାଧିକ ୪୫ ଦିନ ଲାଗିବ। ଏହି ଚାଷ ସଫଳ ହେଲେ ମତ୍ସ୍ୟଜୀବୀଙ୍କ ପାଇଁ ବେଶ୍ ଉପାଦେୟ ହେବ। ସେଥିପାଇଁ ବିଭାଗ ପକ୍ଷରୁ ଏହା ଆରମ୍ଭ ହୋଇଛି। ଏହି ପ୍ରାକୃତିକ ଉଦ୍ଭିଦ ଏବେ ମାନବ ଜୀବିକା ସାଜିବାକୁ ଯାଉଛି।