ବେଜିଂ,୬।୭: ଜଳବାୟୁ ପରିବର୍ତ୍ତନ ଯୋଗୁ ବିଶ୍ୱତାପନ ବୃଦ୍ଧି ପାଇବାରେ ଲାଗିଛି। ଏହାଯୋଗୁ ମେରୁ ଅଞ୍ଚଳରେ ବରଫ ପାହାଡ଼ ତରଳିବାରେ ଲାଗିଛି। ଏହାର ପ୍ରଭାବରେ ସମୁଦ୍ର ଜଳସ୍ତର ୧୯୫୧ ତୁଳନାରେ ଯଥେଷ୍ଟ ବୃଦ୍ଧି ପାଇଛି। ଏହିଧାରା ଜାରି ରହିଲେ ୨୦୫୦ ବେଳକୁ ବହୁ ଉପକୂଳ ସହର ସମୁଦ୍ରରେ ବୁଡ଼ିଯିବ ବୋଲି ଚାଇନାର ଲାନଝୋଉ ବିଶ୍ୱ ବିଦ୍ୟାଳୟରେ ହୋଇଥିବା ଏକ ଗବେଷଣା ରିପୋର୍ଟରେ ଉଲ୍ଲେଖ କରାଯାଇଛି। ଗବେଷକ ଦଳର ନେତୃତ୍ୱ ନେଉଥିବା ଭୂବିଜ୍ଞାନୀ ଶିଆଓକିଙ୍ଗ୍ ପେଙ୍ଗ୍ କହିଛନ୍ତି ଯେ, ବିଶ୍ୱତାପନ ବଢ଼ିବା ଯୋଗୁ ପ୍ରତିବର୍ଷ ମେରୁ ଅଞ୍ଚଳର ୫୩ ହଜାର ବର୍ଗ କିଲୋମିଟର ବରଫ ତରଳୁଛି। ୨୦୨୦ ବିଶ୍ୱର ସବୁଠାରୁ ଅଧିକ ଉତପ୍ତ ବର୍ଷ ରହିଥିବା ନେଇ ଆମେରିକାର ମହାକାଶ ଗବେଷଣା ସଂସ୍ଥା ନାସା ପକ୍ଷରୁ କୁହାଯାଇଥିଲା। ଜଳବାୟୁ ପରିବର୍ତ୍ତନ ଯୋଗୁ ପୃଥିବୀର ତାପମାତ୍ରା ଧୀରେଧୀରେ ପୂର୍ବର ସମସ୍ତ ରେକର୍ଡକୁ ଭାଙ୍ଗିବାରେ ଲାଗିଛି। ୧୯୭୯ରୁ ୨୦୧୬ ମଧ୍ୟରେ ତରଳିଥିବା ବରଫ ଦ୍ୱାରା ବିରାଟ ହ୍ରଦ ସୃଷ୍ଟି ହୋଇପାରିଥାନ୍ତା। ୩୦ ବର୍ଷ ପରେ ଏହାଯୋଗୁ ପୃଥିବୀର ୪୦ ପ୍ରତିଶତ ଲୋକେ ପ୍ରଭାବିତ ହେବେ ବୋଲି ପେଙ୍ଗ୍ କହିଛନ୍ତି।
