କୋଲକାତା,୧।୧୨: ବୁଧବାର ପୂର୍ବାହ୍ନରେ ପଶ୍ଚିମବଙ୍ଗର ଦକ୍ଷିଣ ୨୪ ପ୍ରଗଣା ଜିଲାର ମୋହନପୁର ଗାଁର ଏକ ଆବାସିକ କୋଠାରେ ବଡ଼ ଧରଣର ବିସ୍ଫୋରଣ ଘଟିଛି। ଏଥିରେ ତିନି ଜଣଙ୍କର ମୃତ୍ୟୁ ଘଟିଥିବା ବେଳେ ବହୁ ଲୋକ ଆହତ ହୋଇଥିବା ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି। ପୋଲିସର ସୂଚନାନୁସାରେ, ଘରର ମାଲିକ ବାଣ ତିଆରି କରିବା ପାଇଁ ବିପୁଳ ପରିମାଣର ବେଆଇନ ବିସ୍ଫୋରକ ସାମଗ୍ରୀ ମହଜୁଦ୍ ରଖିଥିଲେ। ବିସ୍ଫୋରଣରେ ଘରର ମାଲିକ ଆଶିମ ମଣ୍ଡଳ ଏବଂ ତାଙ୍କର ଦୁଇ କର୍ମଚାରୀଙ୍କର ମୃତ୍ୟୁ ଘଟିଛି।
ସ୍ଥାନୀୟ ଲୋକଙ୍କ କହିବାନୁସାରେ, ଆଶିମ ଗତ ଦଶ ବର୍ଷ ଧରି ସ୍ଥାନୀୟ ଅଞ୍ଚଳରେ ଏକ ବେଆଇନ ବାଣ କାରଖାନା ଚଳାଉଥିଲେ। ଜଣେ ସ୍ଥାନୀୟ ବାସିନ୍ଦା କହିଛନ୍ତି, ଏହା ଏକ ଆବାସିକ ଅଞ୍ଚଳ ହୋଇଥିବାରୁ ଆମେ ଭୟ କରୁଥିଲୁ ଯେ ଏପରି ବିସ୍ଫୋରଣ ହୋଇପାରେ। ଆମେ ତାଙ୍କୁ ଅନେକ ଥର ଅନୁରୋଧ କରିଥିଲୁ ଏବଂ ପୋଲିସକୁ ମଧ୍ୟ ଜଣାଇଥିଲୁ, କିନ୍ତୁ କିଛି ଫଳ ମିଳି ନ ଥିଲା।
ସ୍ଥାନୀୟ ଲୋକଙ୍କ କହିବାନୁସାରେ, ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ ନିକଟସ୍ଥ କେତେକ ଘରର ଝରକା ଭାଙ୍ଗି ଯାଇଥିଲା ଏବଂ ବିସ୍ଫୋରଣ ସ୍ଥାନଠାରୁ ପ୍ରାୟ ୨୦୦ ମିଟର ଦୂରରେ ମୃତଦେହ ପଡ଼ିଥିଲା । ପୋଲିସର ସୂଚନାନୁସାରେ, ବିସ୍ଫୋରଣ ଛାତ ଉପରେ ଘଟିଥିଲା। ଏହା ଯୋଗୁ କଂକ୍ରିଟ ଛାତ ଭୁଶୁଡି ପଡିଥିଲା। ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି, ଶବଗୁଡ଼ିକୁ ପୋଷ୍ଟମର୍ଟମ ପାଇଁ ପଠାଯାଇଛି ଏବଂ ଫୋରେନସିକ ଟିମକୁ ମଧ୍ୟ ଜଣାଇ ଦିଆଯାଇଛି।
