ନୂଆଦିଲ୍ଲୀ,୩।୨: ୨୦୨୦ ଜୁନରେ ଗଲଓ୍ବାନ ଘାଟିରେ ଦୁଇ ଦେଶର ସୈନ୍ୟ ମୁହଁମୁହିଁ ହୋଇଥିଲେ। ଏଥିରେ ୪୨ ଚାଇନିଜ ଯବାନଙ୍କ ମୃତ୍ୟୁ ହୋଇଥିଲା, ଯାହାକି ଚାଇନା ସରକାରଙ୍କ ପକ୍ଷରୁ ଦିଆଯାଇଥିବା ତଥ୍ୟଠାରୁ ୧୦ ଗୁଣା ଅଧିକ। ତେବେ ବେଜିଂ ପକ୍ଷରୁ ଗଲଓ୍ବାନ ଘାଟି ଘଟଣାରେ ୪ ଯବାନ ପ୍ରାଣ ହରାଇଥିବା କୁହାଯାଇଥିଲା।
“ଅତିକମ୍ରେ ୪୨ ପିଏଲ୍ଏ ଯବାନ ସେହି ରାତିରେ ବୁଡ଼ି ଯାଇଥିଲେ” ବୋଲି ଅଷ୍ଟ୍ରେଲିଆନ ଖବର କାଗଜ ‘ଦି କ୍ଲାକ୍ସଅନ୍’ ଦାବି କରିଛି। ଏହି ଖବର କାଗଜରେ ଅନେକ ସୋସିଆଲ ମିଡିଆ ଗବେଷକଙ୍କ ଦ୍ୱାରା ପ୍ରସ୍ତୁତ ଏକ ରିପୋର୍ଟ ପ୍ରକାଶ ପାଇଛି। ଉଲ୍ଲେଖଯୋଗ୍ୟ, ୨୦୨୦ ଜୁନ ୧୫ ତାରିଖରେ ପୂର୍ବ ଲଦାଖସ୍ଥିତ ଗଲଓ୍ବାନ ଘାଟିରେ ଖଣ୍ଡଯୁଦ୍ଧରେ ୨୦ ଭାରତୀୟ ଯବାନ ଶହୀଦ ହୋଇଥିଲେ।
“ଚାଇନାର ଯବାନମାନେ ଜୁନ ୧୫ ତାରିଖ ରାତି ଅନ୍ଧାରରେ ଗଲଓ୍ବାନ ନଦୀର ଥଣ୍ଡା ପାଣିରେ ନଦୀ ପାର ହେବାକୁ ନିଷ୍ପତ୍ତି ନେଇଥିଲେ। ସେତେବେଳେ ତାପମାତ୍ର ଜିରୋ ତଳେ ଥାଏ। ହଠାତ୍ ନଦୀର ଜଳ ସ୍ତର ବୃଦ୍ଧି ପାଇବାରୁ ଅନେକ ଭାଷି ଯାଇଥିଲେ। ସେମାନଙ୍କ ମୃତଦେହକୁ ପ୍ରଥମେ ଶିକାନେ ଶ୍ମଶାନ ନିଆଯାଇଥିଲା। ସେଠାରୁ ପ୍ରତ୍ୟେକ ମୃତକଙ୍କୁ ସେମାନଙ୍କ ଗାଁଙ୍କୁ ପଠାଇଥିଲେ। ମୃତକଙ୍କ ମଧ୍ୟରୁ ଚାଇନା କେବଳ ଜଣଙ୍କୁ ଜୁନିୟର ସର୍ଜାଣ୍ଟ ଓ୍ବାଙ୍ଗ ଝୁରାନଙ୍କୁ ଶହୀଦ ବୋଲି ଦର୍ଶାଇଛି” ବୋଲି ଏହି ତାଦନ୍ତକାରୀ ଖବର କାଗଜରେ ରିପୋର୍ଟରେ ଉଲ୍ଲେଖ କରାଯାଇଛି। ଏହି ରିପୋର୍ଟର ନାମ ‘ଗଲଓ୍ବାନ ଡିକୋଡେଡ୍’ ରଖାଯାଇଛି।
