![](https://www.dharitri.com/wp-content/uploads/2022/08/fd-23.jpg)
ନୂଆଦିଲ୍ଲୀ,୨୨।୮: ଦିଲ୍ଲୀ ଉପ ମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ଘରେ ସିବିଆଇ ଚଢ଼ାଉକୁ ନେଇ ରାଜନୀତି ଜୋର ଧରିଛି। ଉଭୟ ଆମ ଆଦମୀ ପାର୍ଟି ଓ ଭାଜପା ମଧ୍ୟରେ ଆରୋପ ପ୍ରତ୍ୟାରୋପ ଲାଗି ରହିଛି। ସୋମବାର ସିସୋଡିଆ କହିଛନ୍ତି, ଏଏପି ଭାଙ୍ଗି ଭାଜପାରେ ଯୋଗଦେଲେ ସିବିଆଇ ଏବଂ ଇଡି କେସ୍ ସବୁ ବନ୍ଦ ହୋଇଯିବ ବୋଲି ଭାଜପା ତାଙ୍କୁ ଅଫର୍ ଦେଇଛି। ସେପଟେ ଭାଜପା ଜାତୀୟ ମୁଖପାତ୍ର ଗୌରବ ଭାଟିଆ ଏକ ଖବରଦାତା ସମ୍ମିଳନୀ ଡକାଇ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ସିସୋଡିଆଙ୍କୁ ଟାର୍ଗେଟ କରିଛନ୍ତି।
ସେ କହିଛନ୍ତି,ଆମ ଆଦମୀ ପାର୍ଟିର ଦୁର୍ନୀତି ଏବଂ ଭ୍ରଷ୍ଟାଚାର ଭାଜପା ଉଜାଗର କରିଛି। ମନୀଷ ସିସୋଡିଆ ଏବଂ ଆମ ଆଦମୀ ପାର୍ଟି ପାଖରେ ଏହାର କୌଣସି ଉତ୍ତର ନାହିଁ। ଆମେ ଆହୁରି ଏକ ବଡ଼ ଖୁଲାସା କରିବୁ। ମନୀଷ ସିସୋଡିଆ କହୁଛନ୍ତି ଭାଜପା ପକ୍ଷରୁ ଏକ ଅଫର୍ ଆସିଛି। ମୁଁ କହିବାକୁ ଚାହେଁ, ଯାହାର ଚିନ୍ତାଧାରା ଏତେ ଛୋଟ। କିଏ ଏହାକୁ ଭାଙ୍ଗିବ?
ଏଏପିକୁ ଟାର୍ଗେଟ କରି ସେ ଆହୁରି ମଧ୍ୟ କହିଛନ୍ତି, ଯଦି ତୁମେ ସଚ୍ଚୋଟ, ତେବେ ପଚରାଯାଇଥିବା ପ୍ରଶ୍ନର ଉତ୍ତର ଦିଅ। ଏଏପି ସରକାର ଆଣିଥିବା ଅବକାରୀ ପଲିସିରେ କ’ଣ ଅଛି ତାହା ଜାଣିବାର ଅଧିକାର ଜନସାଧାରଣଙ୍କର ଅଛି। କେଜରିୱାଲ ଯଦି ଏତେ ସଚ୍ଚୋଟ ତେବେ ଏହାର ଉତ୍ତର ଦିଅନ୍ତୁ। ସିସୋଡିଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପରିବର୍ତ୍ତେ ସେ ତାଙ୍କୁ ସମର୍ଥନ କରୁଛନ୍ତି। ଦିନେ ନା ଦିନେ କେଜରିୱାଲଙ୍କ ଅହଙ୍କାର ଭାଙ୍ଗିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ଅବକାରୀ ଦୁର୍ନୀତି ମାମଲାରେ ସିସୋଡିଆଙ୍କ ଅଡୁଆ ବଢିବାରେ ଲାଗିଛି। ସିବିଆଇ ଗୋଟେପଟେ ତାଙ୍କ ବିରୋଧରେ ଲୁକ ଆଉଟ ନୋଟିସ ଜାରି କରିଥିବା ବେଳେ ଏବେ ପ୍ରବର୍ତ୍ତନ ନିର୍ଦ୍ଦେଶାଳୟ ମଧ୍ୟ ଆକ୍ସନ ନେବ। ମନି ଲଣ୍ଡରିଂ ଆଧାରରେ ତାଙ୍କ ବିରୋଧରେ ମାମଲା ଚାଲିବବୋଲି ଜଣାପଡିଛି। ସିବିଆଇ ପକ୍ଷରୁ ଇଡିକୁ କିଛି ଡକ୍ୟୁମେଣ୍ଟ ହସ୍ତାନ୍ତର କରାଯାଇଛି। ଏହା ପୂର୍ବରୁ ସିବିଆଇ ତରଫରୁ ସିସୋଡିଆଙ୍କ ସମେତ ୧୪ ଜଣ ଲୋକଙ୍କ ବିରୋଧରେ ଲୁକ ଆଉଟ ନୋଟିସ ଜାରି କରିଥିଲା।