ଜେନାପୁର,୨୫ା୮(ଡି.ଏନ.ଏ.): ଧର୍ମଶାଳା ବ୍ଲକ ଅନ୍ତର୍ଗତ ଜେନାପୁର ପଞ୍ଚାୟତ ଉତ୍ତର ଆରିମୂଳ ଗଁାର କୁନ ଚନ୍ଦ୍ର ବେହେରା(୫୯) କିଡ୍ନୀ ରୋଗରେ ଆକ୍ରାନ୍ତ ହୋଇଛନ୍ତି। ତାଙ୍କର ୨ଟି ଯାକ କିଡ୍ନୀ ଖରାପ ହୋଇଯାଇଛି। ମାତ୍ର ତାଙ୍କ ଚିକିତ୍ସା ପାଇଁ ଅର୍ଥ ବାଧକ ସାଜିଛି। ସେ ଜଣେ ଦିନ ମଜୁରିଆ ହୋଇଥିବାରୁ ପାଖରେ ଚିକିତ୍ସା ପାଇଁ ଟଙ୍କା ନାହିଁ। ଫଳରେ ସେ ଘରେ ରହି ମୃତ୍ୟୁ ସହ ସଂଗ୍ରାମ କରୁଛନ୍ତି। ଦିନ ମଜୁରିଆ ଭାବେ କାମ କରି କୁନ ଯାହା ରୋଜଗାର କରନ୍ତି ସେଥିରେ ସ୍ତ୍ରୀ, ୬ ଝିଅ, ଗୋଟିଏ ପୁଅଙ୍କୁ ଚଳାଇ ନେଉଥିଲେ। ଝିଅମାନଙ୍କୁ ଧାର ଉଦ୍ଧାର କରି ବିବାହ କରାଇ ଦେଇଛନ୍ତି। କିଛିଦିନ ପରେ ତାଙ୍କ ଦେହ ଅସୁସ୍ଥ ହେବାରୁ ଯାଜପୁର ଟାଉନ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ୨ଟି ଯାକ କିଡ୍ନୀ ଖରାପ ହୋଇଯାଇଛି ବୋଲି ଡାକ୍ତର ପରିବାର ଲୋକଙ୍କୁ କହିଥିଲେ। ତାଙ୍କୁ ଅଧିକ ଚିକିତ୍ସା ପାଇଁ କଟକ ବଡ଼ ମେଡିକାଲକୁ ନେବାକୁ ଡାକ୍ତର ପରାମର୍ଶ ଦେଇଥିଲେ। ଚିକିତ୍ସା ପାଇଁ ତାଙ୍କ ପାଖରେ ଅଧିକ ଅର୍ଥ ନ ଥିବାରୁ କିପରି ଚିକିତ୍ସିତ ହେବେ ବୋଲି ସେହି ଚିନ୍ତାରେ କୁନ ଦିନ କାଟୁଛନ୍ତି। ଯଦି ସରକାରୀ ସହାୟତା ମିଳନ୍ତା ତେବେ ସ୍ବାମୀଙ୍କ ଚିକିତ୍ସା କରାଯାଇ ପାରନ୍ତା ବୋଲି ସ୍ତ୍ରୀ ପ୍ରମୋଦିନୀ କହିଛନ୍ତି। ଏହି ପରିପ୍ରେକ୍ଷୀରେ ଜିଲା ପ୍ରଶାସନ, ବଦାନ୍ୟ ବ୍ୟକ୍ତି ବା ଅନୁଷ୍ଠାନ ପକ୍ଷରୁ ତାଙ୍କ ଫୋନ ନଂ. ୭୮୭୩୦୧୩୬୫୬ରେ ଯୋଗାଯୋଗ କରି ସହଯୋଗ କରିବାକୁ ପ୍ରମୋଦିନୀ ଆକୁଳ ନିବେଦନ କରିଛନ୍ତି। ଖବରଦାତା ଅଭିମନ୍ୟୁ ଧଳ, ସାମାଜିକ କର୍ମୀ ରଞ୍ଜିତ କୁମାର ଦୋରା, ସୁଧାଂଶୁ ମହାନ୍ତି, ଅଶୋକ କୁମାର ଦାସ କୁନଙ୍କ ଆସୁ ଆରୋଗ୍ୟ କାମନା କରିଛନ୍ତି। ଏଥିସହ ସହୃଦୟ ବ୍ୟକ୍ତି ସହାୟତା କରିବାକୁ ସେମାନେ ଅନୁରୋଧ କରିଛନ୍ତି।
