![](https://www.dharitri.com/wp-content/uploads/2024/04/Untitled-1-81.jpg)
ନୂଆଦିଲ୍ଲୀ,୧୦।୪: ଚଳିତ ଆର୍ଥିକ ବର୍ଷର ୨ସପ୍ତାହ କାରବାରର ୨ଦିନରେ ଘରୋଇ ଶେୟାର ବଜାର ଏକ ଉଲ୍ଲେଖନୀୟ ସଫଳତା ସହ ନୂଆ ମାଇଲଖୁଣ୍ଟ ହାସଲ କରିଥିଲା। ଏପରିକି ଶେୟାର ବଜାରର ପ୍ରାଥମିକ ପର୍ଯ୍ୟାୟ କାରବାର (ସକାଳ ୧୦ ଘଟିକା) ସମୟରେ ବମ୍ବେ ଷ୍ଟକ୍ ଏକ୍ସଚେଞ୍ଜ ବା ବିଏସ୍ଇ ସେନ୍ସେକ୍ସ ପ୍ରଥମ ଥର ପାଇଁ ୭୫,୦୦୦ (୭୫,୧୨୪.୨୮) ଅଙ୍କ ଅତିକ୍ରମ କରିଥିଲା। ସେହିଭଳି ନ୍ୟାଶନାଲ ଷ୍ଟକ ଏକ୍ସଚେଞ୍ଜ ବା ଏନ୍ଏସ୍ଇ ନିଫ୍ଟି-୫୦ର କାରବାର ମଧ୍ୟ ୨୩,୦୦୦(୨୨,୭୬୫.୧୦) ଅଙ୍କର ନିକଟବର୍ତ୍ତୀ ହୋଇଥିଲା। ଉଲ୍ଲେଖଯୋଗ୍ୟ, ଘରୋଇ ଶେୟାର ବଜାରର କାରବାର ମଙ୍ଗଳବାର ସକଳା ସମୟରେ ବିଏସ୍ଇ ସେନ୍ସେକ୍ସର କାରବାର ୩୮୧.୭୮ ପଏଣ୍ଟ ବା ୦.୫୧% ବଢି ୭୫,୧୨୪.୨୫ ଅଙ୍କରେ ରହିଥିଲାବେଳେ ଏନ୍ଏସଇ ନିଫ୍ଟି-୫୦ର କାରବାରରେ ମଧ୍ୟ ୯୮.୮ ବା ୦.୪୪% ବୃଦ୍ଧି ଘଟି ୨୨,୭୬୫.୧୦ଅଙ୍କରେ ପହଞ୍ଚତ୍ୟାଇଥିଲା। ସୂଚନାଯୋଗ୍ୟ, ପୁଞ୍ଜିବଜାରର ସୂଚନା ଅନୁଯାୟୀ, ସୋମବାର ଘରୋଇ ଶେୟାର ବଜାରର କାରବାର ୪୦୦ ଲକ୍ଷ କୋଟିରେ ସାମିଲ ହୋଇଥିଲାବେଳେ ଉଭୟ ବିଏସ୍ଇ ଏବଂ ଏନ୍ଏସ୍ଇ ପାଇଁ ମଧ୍ୟ ଏହା ଏକ ଏତିହାସିକ ସଫଳତା ବୋଲି ବଜାର ବିଶେଷଜ୍ଞମାନେ ମତପ୍ରକାଶ କରିଥିଲେ।