ଭୁବନେଶ୍ୱର/ବାଲେଶ୍ବର,୧୨।୪: ଏକଦା ବିରୋଧୀ ଦଳରେ ଥିବା ବେଳେ ବିଜେଡି ସୁପ୍ରିମୋଙ୍କୁ ଶବ୍ଦବାଣରେ କଟାକ୍ଷ କରିବାର ଗୋଟିଏ ବି ସୁଯୋଗ ଛାଡ଼ୁ ନ ଥିଲେ। ହେଲେ ୨୦୨୪ ନିର୍ବାଚନ ପରିସ୍ଥିତି ବଦଳାଇଦେଇଛି। ଭାଜପା ହାତ ଛାଡ଼ି ଶଙ୍ଖ ଫୁଙ୍କିଥିବା ଲେଖାଶ୍ରୀ ସାମନ୍ତସିଂହାରଙ୍କୁ ବିଜେଡି ବାଲେଶ୍ୱର ଲୋକ ସଭା ଆସନ ଲାଗି ପ୍ରାର୍ଥୀ ଘୋଷଣା କରିଛି। ସେ ଦୀର୍ଘ ବର୍ଷ ଧରି ଭାଜପାରେ କାର୍ଯ୍ୟ କରିଥିଲେ ହେଁ ଦଳ ତାଙ୍କୁ ଟିକେଟ ଦେଇ ନ ଥିଲା। ଏଣୁ ନିକଟରେ ସେ ବିଜେଡିରେ ସାମିଲ ହୋଇଥିଲେ। ଏବେ ସେ ଆଗାମୀ ନିର୍ବାଚନରେ ଭାଜପା ଲୋକ ସଭା ପ୍ରାର୍ଥୀ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କ ସହ ମୁକାବିଲା କରିବେ।
ଲେଖାଶ୍ରୀଙ୍କ ବିଷୟରେ କହିଲେ ସେ ବାଲେଶ୍ବର ଜିଲା ନୀଳଗିରି ମାଟିର ବୋହୂ। ସ୍ବାମୀ ବିଜୟ ମହାନ୍ତି ସର୍ବଭାରତୀୟ ସେବା (ଆଲାଏଡ୍)ର ଜଣେ ବରିଷ୍ଠ ଅଧିକାରୀ। ଲେଖାଶ୍ରୀ ପ୍ରାଣୀବିଜ୍ଞାନ ସ୍ନାତକୋତ୍ତର ପରୀକ୍ଷାରେ ସ୍ବର୍ଣ୍ଣପଦକ ହାସଲ କରିବା ସହ ପରିବେଶ ବିଜ୍ଞାନରେ ପିଏଚ୍ଡି କରିଛନ୍ତି। ରେଭେନ୍ସା ସମେତ ବିଭିନ୍ନ ମହାବିଦ୍ୟାଳୟରେ ସେ ପ୍ରାଣୀବିଜ୍ଞାନ ବିଭାଗର ଅଧ୍ୟାପିକା ମଧ୍ୟ ଥିଲେ। ତେବେ ୨୦୧୪ରେ ସେ ବିଜେଡିରୁ ନୀଳଗିରି ଆସନ ପାଇଁ ଚେଷ୍ଟା କରି ନିରାଶ ହେବାପରେ ଭାଜପାରେ ସାମିଲ ହୋଇଥିଲେ।
୨୦୧୯ରେ ଭାଜପାରୁ ବାଲେଶ୍ବର ଲୋକ ସଭା ଆସନ ପାଇଁ ମଧ୍ୟ ଆଶାୟୀ ଥିଲେ। ହେଲେ ତାଙ୍କୁ ଦଳ ଉପସଭାପତି, ମୁଖପାତ୍ର ସମେତ ରାଷ୍ଟ୍ରାୟତ୍ତ କମ୍ପାନୀ ‘ବିଏଚ୍ଇଏଲ୍’ର ସ୍ବାଧୀନ ନିର୍ଦ୍ଦେଶକ ଭଳି ଗୁରୁତ୍ୱପୂର୍ଣ୍ଣ ପଦ ଦେଇଥିଲା। ମାତ୍ର ଆଗାମୀ ନିର୍ବାଚନରେ ସେ ଲଢ଼ିବେ ବୋଲି ଆଶାବାଦୀ ଥିଲେ। ଭାଜପାର ଦ୍ବିତୀୟ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା ସରିଥିଲେ ବି ନିଜ ନାଁ ନ ଥିବା ଦେଖି ଲେଖାଶ୍ରୀ ଅସନ୍ତୁଷ୍ଟ ଥିବା କୁହାଯାଉଛି। ଶେଷରେ ଦଳ ତାଙ୍କୁ ଗରୁତ୍ୱ ଦେଉ ନ ଥିବା ଅଭିଯୋଗ କରି ଚଳିତ ମାସ ୮ ତାରିଖରେ ସେ ଭାଜପାରୁ ଇସ୍ତଫା ଦେବା ସହ ବିଜେଡିରେ ସାମିଲ ହୋଇ ସମସ୍ତଙ୍କୁ ଚମକାଇଥିଲେ। ଏବେ ସେ ପ୍ରତାପଙ୍କ ବିରୋଧରେ ନିର୍ବାଚନ ରଣାଙ୍ଗନକୁ ଓହ୍ଲାଇବାକୁ ଯାଉଥିବାରୁ ଚର୍ଚ୍ଚା ବଢ଼ୁଛି।
