![](https://www.dharitri.com/wp-content/uploads/2024/05/cr.jpg)
ପରଜଙ୍ଗ,୨୦ା୫(ନିଗମାନନ୍ଦ ଦଳବେହେରା): ଢେଙ୍କାନାଳ ଜିଲା ପରଜଙ୍ଗ ବିଧାନସଭା ନିର୍ବାଚନମଣ୍ଡଳୀରେ ୨୦୧୯ ନିର୍ବାଚନରେ ଅଳ୍ପକେ ବିଜୟ ପାଇଥିଲା ବିଜେଡି। ଭାଜପା ଏଠାରେ ପ୍ରମୁଖ ପ୍ରତିଦ୍ୱନ୍ଦ୍ୱୀ ରହିଥିଲା। ହେଲେ ୨୦୨୪ ନିର୍ବାଚନରେ ସ୍ଥିତି ବଦଳିଛି। ଏଥର ନିର୍ବାଚନ ମଇଦାନରେ ୩ ପ୍ରମୁଖ ଦଳର ପ୍ରାର୍ଥୀଙ୍କ ସହ ମୋଟ ୯ ଜଣ ରହିଛନ୍ତି। ବିଜେଡିରୁ ୪ର୍ଥ ଥର ପାଇଁ ବିଧାୟକ ଡା. ନୃସିଂହ ଚରଣ ସାହୁ, ଭାଜପାରୁ ୪ର୍ଥ ଥର ପାଇଁ ବିଭୂତି ଭୂଷଣ ପ୍ରଧାନ ପ୍ରତିଦ୍ୱନ୍ଦ୍ୱିତା କରୁଥିବା ବେଳେ କଂଗ୍ରେସ ପୂର୍ବଭଳି ପ୍ରାର୍ଥୀ ପରିବର୍ତ୍ତନ କରିଛି। କଂଗ୍ରେସ ଏଥର ଯୁବନେତା ରଣଜିତ କୁମାର ସାହୁଙ୍କୁ ନିର୍ବାଚନ ମଇଦାନକୁ ଓହ୍ଲାଇଛି। ସେହିପରି ଏସ୍ୟୁସିଆଇ (କମ୍ୟୁନିଷ୍ଟ)ରୁ ଗଦାଧର ପ୍ରଧାନ, ସ୍ବାଧୀନ
ପ୍ରାର୍ଥୀ ଭାବେ ବିଜୟ କୁମାର ରାଉତରାୟ, ରଘୁ ସିଂହ, ପତିତପାବନ ମହାପାତ୍ର, ହିମାଂଶୁ ଭୂଷଣ ବାରିକ ଓ ଅଜୟ କୁମାର ବିଶ୍ୱାଳ ପ୍ରତିଦ୍ବନ୍ଦି୍ବତା କରୁଛନ୍ତି। ହେଲେ ମୁଖ୍ୟତଃ ୩ ପ୍ରମୁଖ ଦଳ ବିଜେଡି-ଭାଜପା ଓ କଂଗ୍ରେସ ମଧ୍ୟରେ କଡ଼ା ଟକ୍କର ହେବାକୁ ଯାଉଥିବା ଆଲୋଚନା ହେଉଛି।
୨୦୦୯ରେ ଗଠିତ ପରଜଙ୍ଗ ବିଧାନସଭା ନିର୍ବାଚନମଣ୍ଡଳୀରେ ପରଜଙ୍ଗ ବ୍ଲକର ୨୯ ପଞ୍ଚାୟତ, କଙ୍କଡ଼ାହାଡ଼ ବ୍ଲକର ୨୧ ଓ କାମାକ୍ଷାନଗର ବ୍ଲକର ୬ ପଞ୍ଚାୟତ ରହିଛି। ଏଠାରେ ଶିକ୍ଷା, ଉଠା ଜଳସେଚନ ପ୍ରକଳ୍ପ, ଗମନାଗମନ, ପାନୀୟ ଜଳ ଓ ବେରୋଜଗାର ଠାରୁ ଆରମ୍ଭ କରି ଅନେକ ସମସ୍ୟା ଥିବାରୁ ତାହାକୁ ପ୍ରସଙ୍ଗ କରି ଏଥର ୩ ପ୍ରମୁଖ ଦଳ ଜୋର୍ଦାର ପ୍ରଚାର ଚଳାଇଛନ୍ତି। ୨୦୦୯, ୨୦୧୪ ଓ ୨୦୧୯ ନିର୍ବାଚନରେ ଏହି ନିର୍ବାଚନମଣ୍ଡଳୀରେ ବିଜେଡି ପ୍ରାର୍ଥୀ ଡା. ସାହୁ ବିଜୟୀ ହୋଇଥିଲେ। ତେବେ ୨୦୧୯ରେ ଡା. ସାହୁ ଓ ବିଭୂତିଙ୍କ ମଧ୍ୟରେ ହାର୍-ଜିତି ବ୍ୟବଧାନ ଥିଲା ମାତ୍ର ୭୪୦ ଭୋଟ। ତେଣୁ ଏଥର ଏହି ବିଜୟ ବ୍ୟବଧାନ ବଢ଼ାଇବାକୁ ବିଜେଡି ରଣନୀତି ପ୍ରସ୍ତୁତ କରୁଥିବା କୁହାଯାଉଛି। ଦଳର ହେଭିଓ୍ବେଟ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କାର୍ତ୍ତିକ ପାଣ୍ଡିଆନ ସଭାମାନ କରି ଦଳୀୟ ପ୍ରାର୍ଥୀଙ୍କୁ ବିପୁଳ ଭୋଟ ଦେବାକୁ ନିବେଦନ କରିଥିବାବେଳେ ଭାଜପା ବିଜେଡିକୁ ରୋକିବାକୁ ଆବଶ୍ୟକ ପ୍ରସ୍ତୁତି ଚଳାଇଥିବା ଆଲୋଚନା ହେଉଛି। ଦଳର ଷ୍ଟାର ପ୍ରଚାରକ ଭାବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରଚାରର ମଙ୍ଗ ଧରିଛନ୍ତି। ଅନ୍ୟପକ୍ଷରେ କଂଗ୍ରେସର ଯୁବ ଚେହେରା ଭାବେ ଲଢ଼ୁଥିବା ରଣଜିତ ପ୍ରମୁଖ ପ୍ରତିଦ୍ୱନ୍ଦ୍ୱୀ ବିଜେଡି ଓ ଭାଜପାକୁ ପଛରେ ପକାଇବାକୁ ଉଦ୍ୟମ କରୁଛନ୍ତି। ଏଯାଏ କଂଗ୍ରେସର ହେଭିଓ୍ବେଟ୍ ପ୍ରଚାର ପର୍ବକୁ ଆସି ନ ଥିଲେ ମଧ୍ୟ ଆଗାମୀ ଦିନରେ ଆସିବାକୁ ଥିବା ଷ୍ଟାର ପ୍ରଚାରକଙ୍କୁ ନେଇ ଦଳ ଆଶାବାଦୀ ରହିଛି।
ଏ ସମ୍ପର୍କରେ ବିଜେଡି ପ୍ରାର୍ଥୀ ସାହୁ କହିଛନ୍ତି, ବିକାଶ ହିଁ ବିଜେଡିର ପରିଚୟ। ବିକାଶ ହୋଇଛି, ଆଗକୁ ଆହୁରି ହେବ। ଭାଜପା ପ୍ରାର୍ଥୀ ବିଭୂତି କହିଛନ୍ତି, ମୋଦିଙ୍କ ଗ୍ୟାରେଣ୍ଟି ଓ ଜନହିତକର ଯୋଜନାକୁ ନେଇ ଲୋକଙ୍କ ନିକଟକୁ ଯାଉଛୁ। କଂଗ୍ରେସ ପ୍ରାର୍ଥୀ ରଣଜିତ କହିଛନ୍ତି, ନିର୍ବାଚନମଣ୍ଡଳୀରେ ଥିବା ବେରୋଜଗାର, ଶିକ୍ଷା ଓ ସ୍ବାସ୍ଥ୍ୟ ସମସ୍ୟାକୁ ନେଇ ଲୋକଙ୍କ ନିକଟତର ହେଉଛନ୍ତି। କଂଗ୍ରେସ ଅଧିକ ଭୋଟ ପାଇବା ଯୋଜନାରେ ରହିଛି।