ବାରିପଦା,୨୬ା୬(ନୀଳାଦ୍ରି ବିହାରୀ ଦଣ୍ଡପାଟ): ଭୁବନେଶ୍ବରଠାରେ କର୍ତ୍ତବ୍ୟରତ ସାମ୍ବାଦିକଙ୍କୁ ପୂର୍ବତନ ମନ୍ତ୍ରୀ କୁକୁର ଲଗାଇ ଆକ୍ରମଣ କରିବା ଘଟଣାରେ ମୟୂରଭଞ୍ଜ ଜିଲାର କାର୍ଯ୍ୟରତ ବିଭିନ୍ନ ସାମ୍ବାଦିକ ସଂଗଠନ ପକ୍ଷରୁ ପ୍ରତିବାଦ ଜଣାଇଛନ୍ତି। ଦୋଷୀ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ରାଜ୍ୟରେ ସାମ୍ବାଦିକ ସୁରକ୍ଷା ଆଇନ ପ୍ରଣୟନ କରିବାକୁ ଦାବି କରିଛନ୍ତି। ଏ ନେଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ଜିଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେଙ୍କ ଜରିଆରେ ପ୍ରଦାନ କରିଛନ୍ତି।
ସୂଚନାଯୋଗ୍ୟ, ୨୫ ଜୁନ୍ରେ ୨୦୨୪ରେ ଭୁବନେଶ୍ୱରରେ କେତେକ ଟିଭି ସାମ୍ବାଦିକ ଓ ସେମାନଙ୍କ ସହିତ ରହିଥିବା କ୍ୟାମେରା ମ୍ୟାନ୍ ଏକ ଖବର ସଂଗ୍ରହ ନିମନ୍ତେ ପୂର୍ବତନ ମନ୍ତ୍ରୀ ରଘୁନନ୍ଦନ ଦାସଙ୍କ ସରକାରୀ ବାସଭବନ ପରିସରକୁ ଯାଇଥିଲେ। ଏହି ସମୟରେ ଶ୍ରୀ ଦାସ ଏକ ର୍ନିଦ୍ଦିଷ୍ଟ ଗଣମାଧ୍ୟମର ସାମ୍ବାଦିକ ଏବଂ କ୍ୟାମେରାମ୍ୟାନ୍ଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିଲେ। କେବଳ ସେତିକି ନୁହେଁ ସାମ୍ବାଦିକା ଚିନ୍ମୟୀ ସାହୁଙ୍କୁ କୁକୁର ଲଗାଇ ଆକ୍ରମଣ କରିବା ପାଇଁ ପୂର୍ବତନ ମନ୍ତ୍ରୀ ଶ୍ରୀ ଦାସ ତାଙ୍କ କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ। ସାମ୍ବାଦିକଙ୍କ ପଛରେ କୁକୁର ଲଗାଇ ଆକ୍ରମଣ ଧମକକୁ ଶ୍ରୀ ଦାସ ମଧ୍ୟ ସ୍ବୀକାର କରିଛନ୍ତି। ଶ୍ରୀ ଦାସଙ୍କ ଏପରି ଅମାନବୀୟ ଆଚରଣ ଏବଂ କୁକୁର ଲଗାଇ ହତ୍ୟା ଉଦ୍ୟମ ଭଳି ହୀନ ଘଟଣା ଅତ୍ୟନ୍ତ ଉଦ୍ବେଗଜନକ ଓ ନିନ୍ଦନୀୟ। କର୍ତ୍ତବ୍ୟରତ ସାମ୍ବାଦିକଙ୍କ ପ୍ରତି ହୋଇଥିବା ଆକ୍ରମଣ ଘଟଣାରେ ଆମେ ସମସ୍ତେ ମର୍ମାହତ ଓ ଦୁଃଖିତ। ମନ୍ତ୍ରୀଙ୍କ ଏଭଳି ଆଚରଣ ଓ ପ୍ରତିଶୋଧ ପରାୟଣତାକୁ ଜିଲାର ଉତ୍କଳ ସାମ୍ବାଦିକ ସଂଘ, ଓଡିଶା ସାମ୍ବାଦିକ ସଂଘ(ଓଜେୟୁ), ମୟୂରଭଞ୍ଜ ପ୍ରେସ୍ କ୍ଲବ ଓ ରାଜ୍ୟ ସାମ୍ବାଦିକ ସଂଘ ପକ୍ଷରୁ ଘୋର ନିନ୍ଦା କରାଯାଉଛି। ଏହାର ଉଚ୍ଚସ୍ତରୀୟ ତଦନ୍ତ ପୂର୍ବକ ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି। ଏହା ସହିତ ଅନ୍ୟ ରାଜ୍ୟ ଭଳି ଓଡ଼ିଶାରେ ସାମ୍ବାଦିକମାନଙ୍କ ସୁରକ୍ଷା ନିମନ୍ତେ ଆଇନ ପ୍ରଣୟନ କରିବାକୁ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି। ଏହି କାର୍ଯ୍ୟକ୍ରମରେ ଉତ୍କଳ ସାମ୍ବାଦିକ ସଂଘର ଜିଲା ସଭାପତି ସୌମ୍ୟରଞ୍ଜନ ପଟ୍ଟନାୟକ, ଓଡ଼ିଶା ସାମ୍ବାଦିକ ସଂଘ ରାଜ୍ୟ ଉପସଭାପତି ଦୀପକ କୁମାର ନାୟକ, ମୟୂରଭଞ୍ଜ ପ୍ରେସ୍ କ୍ଲବ ସଭାପତି ସତ୍ୟଜିତ ସୋମ, ରାଜ୍ୟ ସାମ୍ବାଦିକ ସଂଘର ଜାତୀୟ କାର୍ଯ୍ୟକାରିଣୀ ସଦସ୍ୟ ପ୍ରୟାଗ ରାଜ କର, ସାମ୍ବାଦିକ ଅକ୍ଷୟ କୁମାର ଅଗ୍ରଓ୍ବାଲ, ରଞ୍ଜନ କୁମାର ଦାଶ, ଦଳଗୋବିନ୍ଦ ବାରିକ, ମନୋଜ କୁମାର ପଣ୍ଡା, ପ୍ରିୟବ୍ରତ ମିଶ୍ର, ଅଭିଜିତ୍ ମହାନ୍ତି, ବିଶ୍ବଜିତ ଭୂୟାଁ, ଦିନେଶ ସେଠୀ, ରମାକାନ୍ତ ରାଉତ, ଲଳିତ କୁମାର ବାରିକ, ହରେକୃଷ୍ଣ ପାତ୍ର ଓ ଦେବେନ୍ଦ୍ର ନାଥ ଦାଶ ପ୍ରମୁଖ ଉପସ୍ଥିତ ଥିଲେ।
