ନୂଆଦିଲ୍ଲୀ,୩।୭: ରାଜ୍ୟ ସଭାରେ ନିଜ ଅଭିଭାଷଣରେ ପ୍ରଧାନମନ୍ତ୍ରୀ ମୋଦି ଆମ ଆଦମୀ ପାର୍ଟି(ଏଏପି)ଏବଂ କଂଗ୍ରେସକୁ ଟାର୍ଗେଟ କରିଛନ୍ତି। ସେ କହିଛନ୍ତି, ଅନୁସନ୍ଧାନକାରୀ ସଂସ୍ଥା ବିରୋଧରେ ଅଭିଯୋଗ ଆସିଛି। କୁହାଯାଉଛି ଯେ, କେନ୍ଦ୍ର ସରକାର ଅନୁସନ୍ଧାନକାରୀ ସଂସ୍ଥାଗୁଡ଼ିକର ଅପବ୍ୟବହାର କରୁଛନ୍ତି। ଏଏପି ମଦ ସ୍କାମ କରିଛି, ଏଏପି ଦୁର୍ନୀତି କରିଛି, ଏଏପି ଶ୍ରେଣୀଗୃହ ନିର୍ମାଣରେ ସ୍କାମ କରିଛି, ଏଏପି ଜଳ ସ୍କାମ କରିଛି। କଂଗ୍ରେସ ଏଏପି ନାଁରେ ଏସବୁ ଅଭିଯୋଗ କରି କୋର୍ଟ ପର୍ଯ୍ୟନ୍ତ ଟାଣି ଆଣିଛି। କିନ୍ତୁ ଯଦି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ତେବେ ମୋଦିଙ୍କୁ ଗାଳି ଦିଆଯାଉଛି।
ପ୍ରଧାନମନ୍ତ୍ରୀ ମୋଦି କହିଛନ୍ତି, ବର୍ତ୍ତମାନ ଏଏପି ଏବଂ କଂଗ୍ରେସ ସାଥୀ ହୋଇଯାଇଛନ୍ତି। ଯଦି ଏଏପିର ସାହସ ଅଛି, ତେବେ କଂଗ୍ରେସ ପାର୍ଟିକୁ ଜବାବ ମାଗୁ। କଂଗ୍ରେସ ଦେଶକୁ କହିବା ଉଚିତ ଯେ, ଏଏପିର ଦୁର୍ନୀତିର ସମସ୍ତ ପ୍ରମାଣ ଯାହା ସାମ୍ବାଦିକ ସମ୍ମିଳନୀରେ ଦେଶକୁ ଉପସ୍ଥାପନ କରିଛି ତାହା ସତ କି ମିଥ୍ୟା?
ପ୍ରଧାନମନ୍ତ୍ରୀ କହିଛନ୍ତି, ମୁଁ ଏହା ବିନା ଦ୍ୱିଧାରେ କହୁଛି, ଦୁର୍ନୀତି ଏବଂ ଦୁର୍ନୀତିଗ୍ରସ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଆମେ ଏଜେନ୍ସିଗୁଡ଼ିକୁ ଖୋଲା ଅଧିକାର ପ୍ରଦାନ କରିଛୁ। ସେମାନେ ସଚ୍ଚୋଟ ଭାବରେ କାର୍ଯ୍ୟ କରିବା ଉଚିତ୍। କୌଣସି ଦୁର୍ନୀତିଗ୍ରସ୍ତ ବ୍ୟକ୍ତି ରକ୍ଷା ପାଇବେ ନାହିଁ, ଏହା ହେଉଛି ମୋଦିଙ୍କ ଗ୍ୟାରେଣ୍ଟି।
